Pisalema ya 85

₁We HOSI, u vile ni tintswalo eka vanhu va wena,

u vuyisile va ka Yakobo lava a va ri evukhumbini.

₂U dlayile milandzu ya vanhu va wena,

u va rivalela swidyoho swa vona hinkwaswo.

₃U rheletile vukari bya wena hinkwabyo,

u tshika ku hlundzuka ka wena lokukulu.

₄We Xikwembu muponisi wa hina, hi vuyisele exiyin'weni xa hina xa khale,

u nga ha tlheli u hi karihela.

₅Xana u ta hi hlundzukela hilaha ku nga heriki xana?

Xana u ta ya emahlweni u karihela ni lava va ha taka xana?

₆Leswi hi nga vanhu va wena,

a wu nga tlheli u hi nyika vutomi leswaku hi ta titsakela eka wena xana?

₇We HOSI, hi kombe rirhandzu ra wena,

u tlhela u hi ponisa!

₈Ndzi navela ku yingisa leswi HOSI Xikwembu xi swi vulaka;

marito ya xona ma tisa ku rhula eka vanhu va xona lava va xi khongelaka.

Ntsena va nga ha tlheleli eswidyohweni swa vona!

₉Hakunene Xikwembu xi le kusuhi ni lava va xi chavaka: Xi ta va ponisa,

kutani ku dzuneka ka xona a ku nga ha suki etikweni ra hina.

₁₀Rirhandzu ni ku tshembeka swi hlanganile,

ku lulama ni ku rhula swa vukarhana.

₁₁Ku tshembeka ku hluka ku huma emisaveni,

loko ku lulama ku ri karhi ku rhelela hi le tilweni.

₁₂HOSI Xikwembu hi xiviri xa xona xi nyika leswinene,

kutani misava yi hi humesela mihandzu.

₁₃Ku lulama ku rhangela HOSI Xikwembu emahlweni;

laha xi fambaka kona, ku pfuleka tindlela.