Pisalema ya 67

₁Xikwembu a xi hi twele vusiwana xi hi katekisa,

a xi hi langute hi tintswalo,

₂kutani vanhu va misava hinkwayo

va ta tiva hilaha xi tirhaka hakona, ni leswaku hi xona xi ponisaka.

₃Vanhu va matiko a va ku dzunise we Xikwembu,

hinkwavo a va ku dzunise.

₄Matiko a ma tsake ma ba nkulungwana,

hikuva u ma fuma hi ku lulama,

hi wena u fambisaka vanhu laha misaveni.

₅Vanhu va matiko a va ku dzunise we Xikwembu,

hinkwavo a va ku dzunise.

₆Misava yi hi humesele mihandzu,

Xikwembu, xona Xikwembu xa hina, xi hi katekisile.

₇Hakunene Xikwembu xi hi katekisile;

hinkwako emisaveni, vanhu a va chave xona!