Pisalema ya 5

₁Rhiya ndleve, we HOSI, u twa leswi ndzi swi vulaka,

u yingisa ku konya ka mina.

₂Twana ku rila ka mina,

wena Hosi yanga ni Xikwembu xanga,

hikuva hi wena ndzi ku khongelaka.

₃Nimixo, wa ri twa rito ra mina, we HOSI;

loko dyambu ri xa, ndzi ku vekela magandzelo hi ndlela ya kona, kutani ndzi langutela ...

₄Wena u Xikwembu lexi nga tsakeriki leswo homboloka,

lowo biha a nga na ndhawu eka wena.

₅Lava tikurisaka a va amukeriwi emahlweni ka wena,

vaendlaswivi hinkwavo wa va wenga.

₆We HOSI, u herisa lava vulavulaka mavunwa,

lava halataka ngati ni lava kanganyisaka, wa va nyenya.

₇Kasi mina ndzi ta nghena endlwini ya wena,

hikwalaho ka tintswalo ta wena leto tala;

ndzi ta nkhinsama emahlweni ka Tempele ya wena leyo hlawuleka;

ndzi ku khongela hi xichavo.

₈HOSI, leswi ndzi nga ni valala,

ndzi fambise endleleni ya wena leyo lulama,

u yi khulela yi basa emahlweni ka mina.

₉Leswi humaka emilon'wini ya vona a swi na ntiyiso,

timbilu ta vona ti tele vumbabva;

hambiloko va vulavula swo tsakisa vanhu,

minkolo ya vona i masirha lama ahlameke.

₁₀We Xikwembu, va rhwexe milandzu ya vona,

va tshike va lovisiwa hi makungu ya vona;

va hlongole va suka emahlweni ka wena hikwalaho ka swidyoho swa vona leswo tala,

hikuva va ku hundzukerile.

₁₁Kambe hinkwavo lava tumbelaka eka wena va ta tsaka,

va ba minkulungwana hilaha ku nga heriki;

wena u ta va biyelela

leswaku lava ku rhandzaka

va kuma ntsako lowukulu eka wena.

₁₂We HOSI, u katekisa munhu wo lulama,

nsovo wa wena wu n'wi vhikela ku fana ni xitlhangu.