Pisalema ya 44

₁We Xikwembu, vatata wa hina va hi byerile

leswi u swi endleke khale eminkarhini ya vona,

hi swi twile hi tindleve ta hina:

₂Hi wena hi xiviri xa wena u hlongoleke vamatiko,

kambe vanhu va wena, u va nyikile vutshamo;

u bile vamatiko,

kambe vanhu va wena, u va katekisile.

₃Vatatana va hlurile valala va va tekela tiko,

kambe ku nga ri hi matimba ya vona ni matlhari ya vona;

va ri kumile hi matimba ya wena lamakulu,

hikuva a wu ri kusuhi na vona, u va komba leswaku wa va tsakela.

₄Hi wena Mufumi wanga ni Xikwembu xanga,

hi wena u lerisaka leswaku va ka Yakobo va hlula.

₅Valala va hina, hi va wisela hansi hi ku pfuniwa hi wena,

hi va kandziyela hi vito ra wena,

₆vurha bya mina kumbe fumu ra mina

a ndzi swi tshembi, hikuva a hi swona swi nga ndzi ponisaka.

₇Hi wena u hi poniseke emavokweni ya valala va hina,

lava va hi vengaka, u va hlanganisa tinhloko.

₈We Xikwembu, minkarhi hinkwayo hi ta tinyungubyisa hi wena;

vito ra wena hi ta ri twarisa hilaha ku nga heriki.

₉Hambiswiritano, u hi tshikile u hi khomisa tingana,

mavuthu ya hina a wu yanga na wona enyimpini.

₁₀U hi tshikile hi hluriwa hi valala va hina,

va phangha ni rifuwo ra hina.

₁₁U hi khayimile kukota tinyimpfu leti yaka eku tlhaviweni,

u hi hangalasa ni matiko.

₁₂U xavisile vanhu va wena hi nxavo wa le hansi,

u nga lavi ku vuyeriwa hi nchumu!

₁₃U hi sorisile hi vaakelani va hina,

va hi hlekula ni ku hi sandza.

₁₄U hi hundzurile xihlambanyiso exikarhi ka vanhu,

loko va hi vona, va hlakahla tinhloko.

₁₅Siku hinkwaro ndzi khomiwa hi tingana,

ti vonaka exikandzeni xa mina,

₁₆hikuva ndzi twa vasandzi va ri karhi va rhuketela

emahlweni ka valala ni ka lava tsakelaka ku tirihisela.

₁₇Hinkwaswo leswi swi hi humelerile,

hambiloko hi nga ku rivalanga

kumbe ku tshova ntwanano wa wena.

₁₈A hi tlhelelanga ndzhaku,

naswona a hi hambukanga etindleleni ta wena.

₁₉Hambiswiritano u hlaserile tiko ra hina ri hundzuka ndhawu ya timhungubye,

u ri funengeta hi xinyami xo chavisa.

₂₀We Xikwembu xa hina, loko hi rivele vito ra wena

kumbe loko hi tlakusile mavoko hi khongela Xikwembu xin'wana,

₂₁xana a wu nga ta swi tiva xana,

leswi u tivaka swihundla swa le mbilwini ya munhu?

₂₂Masiku hinkwawo, va ka hina va dlayiwa hikwalaho ka wena,

va fanisiwa ni tinyimpfu leti yaka eku tlhaviweni.

₂₃We N'wini wa hina, suka u yima, u nga etleri!

Phaphama, u nga hi cukumeteli makumu.

₂₄Hikwalaho ka yini u tisiva mahlo xana?

Xana u rivalela yini mahlomulo ni ku xanisiwa ka hina?

₂₅Hi biwile hi wiseriwa hansi,

hi lo nhàvàlàlà, eritshurini.

₂₆Suka u yima u hi lamulela!

Hi kutsule hikwalaho ka rirhandzu ra wena lero tshembeka.