Pisalema ya 39

₁Ndzi vurile ndzi ku: “Eku hanyeni ka mina, ndzi ta tivonela

leswaku ndzi nga dyohi hi ku vulavula ka mina;

loko lavo homboloka va ha ri kusuhi na mina,

ndzi ta pfala nomo,

ndzi ku whí!”

₂Hikokwalaho, ndzi timiyelerile, ndzi nga vuli nchumu,

kambe ku miyela loku a ku ndzi pfunanga nchumu:

Ku karhateka ka mina ku yile ku nyanya,

₃mbilu ya mina a yi pfurha endzeni ka mina;

eku konyeni ka mina a ndzi tshwa kunene,

kutani eku heteleleni ndzi vulavurile ndzi ku:

₄“We HOSI, ndzi tivise leswaku ndzi ta hanya ku fikela rini,

ndzi byele ntsengo wa malembe ya mina,

leswaku ndzi ta tiva ku koma ka vutomi bya mina.

₅Vona! U ndzi pfumelela ku hanya masikunyana ntsena;

emahlweni ka wena malembe ya mina a hi nchumu;

hakunene munhu hambi o titwa a tiyile,

i moyanyana ntsena.

₆Vanhu va ya hala ni hala, wonge i mindzhuti,

va tikarhatela swa hava, va tihlengeletela swilo,

va nga tivi leswaku swi ta va swa mani.

₇“Hikokwalaho, xana ndzi nga ha tshemba yini, we N'wini wanga?

Hi wena ntsena loyi ndzi n'wi tshembaka.

₈Ndzi kutsule eku tiariseni ka mina hinkwako,

u nga pfumeli leswaku swiphukuphuku swi tlanga hi mina.

₉Sweswi ndzi ta timiyelela, a ndzi nga ha pfuli nomo,

hikuva ntirho lowu i wa wena.

₁₀U nga ha ndzi bi,

hikuva nkhavi wa wena wa ndzi vavisa.

₁₁U tshinya munhu ni ku n'wi bela swidyoho swa yena,

kutani swilo leswi a swi tsakelaka, wena u swi herisa wonge swi lo dyiwa hi muhlwa.

Hakunene munhu un'wana ni un'wana i moyanyana ntsena.

₁₂“We HOSI, ndzi huwelela eka wena,

rhiya ndleve u yingisa ku khongela ka mina,

u nga tshiki ku ndzi pfuna loko ndzi ri eku rileni,

hikuva eka wena ndzo va muhundzi wa ndlela,

ndzi muluveri kukota vatata wa mina.

₁₃U nga ndzi swondzoloti, leswaku ndzi kota ku tsaka,

ku nga si fika nkarhi wa mina wa ku rhurha, ndzi siya misava.”