Pisalema ya 38

₁We HOSI, ndzi be u nga hlundzukanga,

u ndzi tshinya u nga karihanga.

₂Miseve ya wena yi ndzi tlhaveterile,

u ndzi tshikelerile hi voko ra wena.

₃Ndzi twa ku vava emirini wa mina hinkwawo,

vuvabyi byi ndzi pandzisa ni marhambu,

hikuva ndzi tivangele vukari bya wena

hi leswi ndzi dyoheke.

₄Milandzu ya mina yi tele ngopfu, ya ndzi khubumeta,

yi hundzuka ndzhwalo lowu ndzi hlulekaka ku wu rhwala.

₅Swilondza swa mina swa nun'hwa swi huma vuvopfu,

hikwalaho ka vuphukuphuku bya mina.

₆Ndzi tikeriwa ni ku tshikeleriwa ku tlula mpimo,

siku hinkwaro ndzi famba-famba ndzi ri eku rileni.

₇Endzeni ka mina ku hisa ngopfu,

ndzi twa ku vava emirini wa mina hinkwawo.

₈Matimba ya mina ma herile, a ndza ha koti nchumu,

ndzi le ku konyeni, mbilu ya mina yi karhateka ngopfu.

₉We N'wini wanga, u tiva hinkwaswo leswi ndzi swi navelaka,

ku konya ka mina, wa ku twa.

₁₀Mbilu ya mina yi ba hi ku hatlisa, ndzi hela ntamu,

ni mahlo ya mina a ma ha voni.

₁₁Vanghana va mina, vona lava ndzi va rhandzaka, va ndzi tshikile ekhombyeni,

va ka hina na vona va ndzi fularhela.

₁₂Lava va lavaka ku ndzi dlaya, va rhiya mintlhamu,

lava tsakelaka ku ndzi vavisa, va kanela swa ku ndzi lovisa,

siku hinkwaro va vulavula swo kanganyisa.

₁₃Mina ndzi fana ni munhu wo fa tindleve, a ndzi twi nchumu,

ndzi fana ni mbheveve, a ndzi vulavuli.

₁₄Hakunene ndzi fana ni munhu loyi a nga ha twiki nchumu,

loyi a nga ha hlamulaniki na van'wana.

₁₅Kambe we HOSI, ndzi ta langutela wena,

hi wena u nga ta hlamula, we Xikwembu N'wini wanga.

₁₆Xikhongelo xa mina hi lexi: “U nga pfumeli leswaku lava va tikurisaka

va tsakisiwa hi ku khuguka ka mina.”

₁₇Sweswi ndzi le kusuhi ni ku wa,

ni switlhavi swa mina swa nyanya.

₁₈A ndzi fihli ku homboloka ka mina,

ndzi tivona nandzu hikwalaho ka swidyoho swa mina.

₁₉Valala va mina va tsakile swinene, va ni matimba;

lava va ndzi vengaka mahala, va tele.

₂₀Lava va ndzi tlheriselaka leswinene hi leswo biha,

va lwa na mina, hikuva ndzi tsakela ku endla leswo saseka.

₂₁U nga ndzi fularheli we HOSI,

we Xikwembu xanga, u nga vi kule na mina.

₂₂Hatlisa u ndzi lamulela

we N'wini wanga, muponisi wa mina.