Pisalema ya 32

₁Ku katekile munhu loyi ku homboloka ka yena ku nga ha hlayiwiki,

loyi swidyoho swa yena swi rivaleriweke.

₂Munhu loyi HOSI Xikwembu xi nga n'wi voniki nandzu,

loyi mbilu ya yena yi nga riki na vukanganyisi, ú katekile ngopfu!

₃Enkarhini lowu a ndza ha fihla swidyoho swa mina,

miri wa mina a wu tsanile, ndzi tshamela ku konya.

₄Vusiku ni nhlekanhi, a wu ndzi ba we HOSI,

ndzi hela matimba kukota ximila lexi hisiwaka hi mumu.

₅Kutani ndzi boxile ku dyoha ka mina,

a ndzi ku fihlelanga ku homboloka ka mina.

Ndzi vurile ndzi ku: “Ndzi ta tisola eka HOSI, ndzi vula nandzu wa mina.”

Kutani we HOSI, u ndzi rhurile ndzhwalo wa swidyoho swa mina.

₆Hikokwalaho, hinkwavo lava va ku tshembaka

a va ku khongele loko nkarhi wa ha ri kona.

Hambiloko khombo ri va tela kukota ndhambi,

a ri nga va dlayi.

₇We HOSI, ndzi tumbela eka wena,

u ndzi sirhelela emakhombyeni;

leswi u ndzi sirheleleke ni ku ndzi lwela,

ndzi ta ba nkulungwana wa ntsako.

₈HOSI Xikwembu xi ri: “Ndzi ta ku dyondzisa,

ndzi ku komba ndlela leyi u fanelaka ku famba ha yona;

ndzi ta ku letela, ndzi nga ka ndzi nga tshiki ku ku lwela.

₉U nga tshuki u fana ni hanci kumbe mbhongolo,

swi nga swifuwo leswi pfumalaka ku twisisa:

A swi yingisi loko swi nga nghenisiwanga matomu emilon'wini.

Loko wena u yingisa, a wu nga weli hi khombo.”

₁₀Vanhu lavo homboloka va wela hi maxangu layo tala,

kambe lava tshembaka HOSI Xikwembu, va sirheleriwa hi rirhandzu ra xona lero tshembeka.

₁₁N'wina hinkwenu lava lulameke, tsakani mi tsakela HOSI,

banani minkulungwana, n'wina hinkwenu va timbilu to basa!