Pisalema ya 26

₁We HOSI, kombisa leswaku a ndzi na nandzu,

hikuva ndzi endlile leswinene ntsena;

mina a ndzi tshiki ku titshembela wena.

₂We HOSI, ndzi kambele u ndzi xiyaxiya,

kambela leswi nga mbilwini ya mina ni le miehleketweni ya mina.

₃Ndzi tshama ndzi ri karhi ndzi anakanya rirhandzu ra wena,

ndzi rhangeriwa emahlweni hi ku tshembeka ka wena.

₄A ndzi tshami ni vaxisi,

ni tinyoka-hansi a ndzi famba-fambi na tona.

₅Ndzi swi venga ngopfu ku hlangana-hlangana ni lava endlaka leswo biha,

ni vanhu lavo homboloka a ndzi swi tsakeli ku hungasa na vona.

₆We HOSI, ku komba leswaku a ndzi na nandzu, ndzi hlamba mavoko ya mina,

kutani ndzi ya rhendzeleka alitari ya wena,

₇ndzi ri karhi ndzi yimbelela risimu ra minkhenso hi rito leri tlakukeke,

ndzi twarisa mintirho ya wena hinkwayo leyo hlamarisa.

₈We HOSI, yindlu leyi u tshamaka eka yona ndzi yi rhandza ngopfu,

yona leyi ku dzuneka ka wena ku tikombaka eka yona.

₉U nga ndzi herisi swin'we ni vadyohi,

u nga ndzi katsi ni vanhu lava tsakelaka ngopfu ku halata ngati,

₁₀va nga vanhu lava endlaka swa manyala,

lava khomeke swilo swo tala leswi va xaviweke ha swona.

₁₁Loko ndzi ri mina, ndzi endla leswinene ntsena;

ndzi twele vusiwana we HOSI, u ndzi ponisa!

₁₂Mina ndzi titwa ndzi tshamisekile,

kutani ndzi ta dzunisa HOSI Xikwembu enhlengeletanweni ya xona leyikulu.