Pisalema ya 17

₁We HOSI, twana ntiyiso wa mhaka,

rhiya ndleve, u twa xirilo xa mina;

yingisa xikhongelo xa mina,

hikuva xi huma enon'weni lowu nga riki na vuxisi.

₂Ku pembela ka mina a ku hume eka wena,

mahlo ya wena a ma vone ntiyiso wa mhaka!

₃U ndzi endzerile nivusiku, ku ta xiya mbilu ya mina,

ni ku ndzi kambisisa,

kambe a wu kumanga nchumu xa tingana;

₄a ndzi vulanga nchumu xo biha hi tlhelo ra leswi vanhu va swi endlaka,

swiletelo swa wena, ndzi swi hlayisile.

₅Ndzi tiyiserile ku famba hi tindlela leti u ndzi leriseke tona,

milenge ya mina a yi hambukanga emintileni ya wena.

₆Ndzi huwelela eka wena,

hikuva u ta ndzi hlamula, we Xikwembu.

Tshineta ndleve ya wena eka mina,

u yingisa leswi ndzi swi vulaka.

₇Komba ku hlamarisa ka tintswalo ta wena leto tshembeka,

wena muponisi wa lava balekaka valala va vona,

va ta lava vutumbelo evokweni ra wena ra xinene.

₈Ndzi hlayise tanihi ndzololo ya tihlo ra wena,

ndzi tumbete endzhutini wa timpapa ta wena,

₉u ndzi fihla eka lavo homboloka lava va ndzi hlaselaka,

vona valala va mina lavo chavisa, lava va ndzi rhendzeleke.

₁₀Va file ripfalo, a va tsetseleli,

va tikurisa hi ku vulavula.

₁₁Va ndzi hlongorisa, sweswi va ndzi rhendzerile,

va lo honoo, mahlo, va lava ku ndzi wisela hansi.

₁₂Va fana ni nghala, leyi nga ni mahika ya ku bvanyangeta;

va bvutamile tanihi n'wana wa nghala exihlahleni.

₁₃Suka u yima, we HOSI! Va hlanganise, u va wisela ehansi.

Ndzi lwele hi fumu ra wena eka vanhu lava vo homboloka.

₁₄We HOSI, ndzi ponise hi voko ra wena eka vanhu lava vo biha,

lava averiweke vutomi bya nkarhinyana ntsena.

Va xurhise hi leswi u nga va vekela swona,

vana va vona a va kolwe ha swona, va siyela ni vatukulu va vona.

₁₅Loko a ri mina, ndzi ta vona mombo wa wena ndzi ri loyi a pembeleke;

loko ndzi pfuka, ndzi ta kolwa hi ku ku vona, wena hi xiviri xa wena!