Pisalema ya 149

₁Dzunisani HOSI!

Yimbelelani risimu lerintshwa mi dzunisa HOSI Xikwembu,

xi tlangeleni exikarhi ka ntshungu wa vanhu va xona.

₂N'wina Vaisraele, tsakelani Muvumbi wa n'wina,

tlangelani Loyi a mi fumaka n'wina va le Siyoni.

₃Dzunisani vito ra yena hi ku cina,

mi ri karhi mi n'wi chayela swingomana ni switende.

₄HOSI Xikwembu xi tsakela vanhu va xona,

lava titsongahataka xi va hlulela valala.

₅Lava tshembaka Xikwembu a va yimbelele tinsimu va xi kurisa,

a va be minkulungwana hambiloko byi ri vusiku.

₆A va tlakuse rito va xi tlangela,

va hlomile matlhari.

₇Va ta fanela ku rihiseta leswi vamatiko va nga va endla swona,

va tshinya vanhu lava.

₈Va ta khoma tihosi ta vamatiko va ti boha hi tinketani,

va boha ni tindhuna ta kona hi tinsimbhi.

₉Va ta laya vamatiko valavo hilaha swi tsariweke hakona.

Lava tshembaka HOSI Xikwembu, va ta kurisiwa hinkwavo hi ndlela yeleyo.

Dzunisani HOSI!