Pisalema ya 143

₁We HOSI, yingisa xikhongelo xa mina,

rhiya ndleve u twa xirilo xa mina.

Wa tshembeka, ndzi hlamule hi ku lulama ka wena.

₂U nga tshuki u ndzi avanyisa mina nandza wa wena:

A ku na munhu na un'we la misaveni la nga riki na nandzu emahlweni ka wena.

₃Nala wa ndzi hlongorisa,

a ndzi wisela hansi ni ku ndzi kandziyela,

a ndzi susumetela exinyamini, ndzi fana ni lava feke khale.

₄Hikokwalaho mbilu ya mina yi hela ntamu,

ndza titivala.

₅Ndzi anakanya minkarhi ya khale we HOSI,

hinkwaswo leswi u swi endleke ndza swi tsundzuka,

a ndzi rivali mintirho ya wena ya matimba.

₆Ndza ku khongela ndzi tlakusile mavoko,

ndzi langutela ku pfuniwa hi wena

ku fana ni misava leyi omeke leyi langutelaka mpfula.

₇We HOSI hatlisa u ndzi hlamula,

hikuva ndzi karhele.

U nga tshuki u ndzi fularhela,

hikuva ndzi nga fana ni lava yaka eku feni.

₈Ndzi tsundzuxe rirhandzu ra wena mixo wun'wana ni wun'wana,

hikuva eka wena ndzi hlayisekile.

Ndzi kombe ndlela leyi ndzi fanelaka ku famba ha yona,

hikuva ndzi tinyiketile eka wena.

₉We HOSI, ndzi kutsule emavokweni ya valala,

ndzi tsutsumela eka wena, we xisirhelelo xanga.

₁₀Ndzi dyondzise ku endla leswi u swi tsakelaka,

hikuva u Xikwembu xanga.

Moya wa wena hi lowunene,

a wu ndzi basisele tindlela.

₁₁We HOSI, hlayisa vutomi bya mina hikwalaho ka vito ra wena;

hi vunene bya wena, ndzi humese ekhombyeni.

₁₂Leswi u ndzi rhandzaka, dlaya valala va mina,

u herisa hinkwavo lava va ndzi xanisaka,

hikuva ndzi nandza wa wena.