Pisalema ya 141

₁We HOSI, ndzi huwelela eka wena, hatlisa u ta eka mina,

rhiya ndleve u yingisa loko ndzi ku vitana.

₂Xikhongelo xa mina a xi fane ni mirhi ya risuna leyi hisiwaka emahlweni ka wena.

Loko ndzi khongela ndzi tlakusile mavoko, a swi fane ni magandzelo lama humesiwaka nimadyambu.

₃We HOSI, veka mulanguteri enon'weni wa mina

a rindza leswi ndzi swi vulaka.

₄U nga pfumeli leswaku miehleketo ya mina yi namarhela leswo biha,

ndzi nga tshuki ndzi endla leswo homboloka,

kumbe ku tirhisana ni vanhu lava dyohaka; ndzi nga tshuki ndzi dya na vona eminkhubyeni.

₅Loko munhu wo lulama a ndzi ba

ni ku ndzi tshinya hi rirhandzu,

eka mina i mafurha layo nun'hwela,

ndzi nge ali ku cheriwa wona enhlokweni;

kambe ndza ha ta khongela ndzi lwa ni mintirho ya lavo homboloka.

₆Siku varhangeri va vona va nga ta cukumetiwa ekheleni,

va ta ndzi twa ndzi ku: “Va layekile!”

₇Marhambu ya vona ma ta hangalasiwa enyangweni ya xivandla xa vafi

kukota ribye ra ku sila leri cukumetiwaka ehansi ri fayeka.

₈We HOSI N'wini wanga, ndzi languta eka wena,

vutumbelo bya mina ndzi byi lava eka wena, u nga ndzi cukumeti!

₉Ndzi ponise eka xirimbana lexi va ndzi rhiyeke ha xona,

u ndzi phonyokisa emintlhan'wini ya lava endlaka leswo biha.

₁₀Phasa lavo homboloka hi mintlhamu ya vona vinyi,

mina u ndzi ponisa eka yona.