Pisalema ya 119

₁Ku katekile vanhu lava mahanyelo ya vona ma tengeke,

lava landzaka nawu wa HOSI.

₂Ku katekile lava amukelaka switsundzuxo swa HOSI,

va yingisa yona hi mbilu hinkwayo,

₃va nga lava chavaka ku endla leswo biha,

lava fambaka etindleleni ta yona.

₄We HOSI, u lerisile vanhu

leswaku va hlayisa swinene swiletelo swa wena.

₅Ndzi navela ngopfu ku hanya hi ndlela yo tshembeka,

ndzi ri karhi ndzi hlayisa milawu ya wena.

₆Loko ndzi landzelela swileriso swa wena,

a ndzi nga khomiwi hi tingana.

₇Ndzi ta dyondza leswi u swi boheke eku lulameni ka wena,

ndzi ku tlangela hi mbilu yo basa.

₈Ndzi lava ku hlayisa milawu ya wena.

U nga ndzi tshiki ni siku ni rin'we!

₉Xana munhu lontshwa a nga hanya hi mukhuva wihi, loko a lava ku famba endleleni leyo tenga xana?

Hi loko a landzelela leswi u swi vulaka.

₁₀Ndzi lava ku ku yingisa hi mbilu ya mina hinkwayo,

u nga pfumeli leswaku ndzi hambana ni swileriso swa wena.

₁₁Leswi u swi vulaka, ndzi swi veka eku enteni ka mbilu yanga,

leswaku ndzi nga ku dyoheli.

₁₂We HOSI, vanhu a va tlangele wena!

Hambi a ri mina, ndzi dyondzise milawu ya wena.

₁₃Minkarhi hinkwayo, ndzi lava ku byela van'wana

hinkwaswo leswi u swi boheke loko u vulavula.

₁₄Ku hanya hi switsundzuxo swa wena swa ndzi tsakisa,

swi fana ni loko ndzi thumbha xuma lexo tala.

₁₅Ndzi ta anakanya swiletelo swa wena,

ndzi langutisisa ni tindlela ta wena.

₁₆Ku yingisa milawu ya wena, eka mina i ntsako lowukulu,

a ndzi nga rivali marito ya wena.

₁₇We HOSI, ndzi nandza wa wena, ndzi katekise,

leswaku ndzi ta hanya ndzi ri karhi ndzi yingisa rito ra wena.

₁₈Ndzi pfule mahlo, ndzi ta vona swihlamariso

leswi nga nawini wa wena.

₁₉Laha misaveni, ndzo va muhundzi ntsena,

u nga ndzi fihleri swileriso swa wena.

₂₀Minkarhi hinkwayo ndzi navela ngopfu

ku tiva leswi u swi boheke.

₂₁U tshinya vanhu lava titshembaka ngopfu,

lava tivangelaka khombo hi ku tshika swileriso swa wena.

₂₂Ndzi ponise loko va ndzi sola ni ku ndzi hlekula,

hikuva ndzi landzelela switsundzuxo swa wena.

₂₃Hambiloko varhangeri va tiko va ndzi lumbeta ehubyeni,

mina nandza wa wena a ndzi rivali milawu ya wena.

₂₄Ndzi tsakela ngopfu switsundzuxo swa wena,

ndzi fambisiwa hi swona.

₂₅We HOSI, ndzi wele entshurini!

Ndzi pfuxe hilaha u tshembiseke hakona.

₂₆Ndzi ku boxerile timhaka ta mina, kutani u ndzi hlamurile;

ndzi dyondzise milawu ya wena.

₂₇Ndzi pfune ku twisisa swiletelo swa wena,

leswaku ndzi ta anakanya mintirho ya wena leyo hlamarisa.

₂₈Nhlomulo wu ndzi pfumata vurhongo;

ndzi tiyise, hilaha u ndzi tshembiseke hakona.

₂₉Ndzi fambise kule ni vanhu vo hemba,

u ndzi pfuna ku hanya hi nawu wa wena.

₃₀Ndzi hlawurile ku tiyisela endleleni ya wena,

ndzi nga hambani ni leswi u swi boheke.

₃₁Switsundzuxo swa wena a swi suki eka mina;

we HOSI u nga pfumeli leswaku ndzi khomiwa hi tingana.

₃₂Ndzi hisekela ku endla leswi u ndzi lerisaka swona,

hikuva ha swona u anamisa miehleketo ya mina.

₃₃We HOSI, ndzi dyondzise ku hanya hi milawu ya wena,

kutani ndzi ta yi hlayisa minkarhi hinkwayo.

₃₄Ndzi nyike ku twisisa nawu wa wena,

ndzi wu landza hi mbilu ya mina hinkwayo.

₃₅Ndzi fambise entileni wa swileriso swa wena,

hikuva hi wona wu ndzi tsakisaka.

₃₆Ndzi susumete ku anakanya switsundzuxo swa wena,

ku tlula ku navela rifuwo.

₃₇Ndzi pfune ku fularhela swilo swa hava,

ndzi ta kuma vutomi etindleleni ta wena.

₃₈Hetisa leswi u ndzi tshembiseke swona mina nandza wa wena,

hikuva i swa lava va ku chavaka.

₃₉Ndzi lamulele eka vasandzi, hikuva va ndzi chavisa;

leswi pfunaka i swiletelo swa wena ntsena.

₄₀Vona, ndzi navela ngopfu swiletelo swa wena;

ponisa vutomi bya mina, hikuva u Xikwembu lexi lulameke.

₄₁We HOSI, ndzi kombe rirhandzu ra wena,

u ndzi kutsula hilaha u tshembiseke hakona,

₄₂ndzi ta kota ku hlamula lava va ndzi monyaka,

hikuva ndzi tshemba rito ra wena.

₄₃U nga pfumeli ni siku ni rin'we leswaku ndzi vulavula mavunwa,

hikuva ndzi tshemba leswi u swi boheke.

₄₄Vutomi bya mina hinkwabyo,

ndzi ta hlayisa nawu wa wena.

₄₅Ndzi ta hanya ndzi ntshunxekile,

hikuva ndzi ta va ndzi landzile swiletelo swa wena.

₄₆Switsundzuxo swa wena, ndzi ta swi vula emahlweni ka tihosi

ndzi nga ri na tingana.

₄₇Ndzi tsakisiwa ngopfu hi swileriso swa wena,

hikuva ndza swi rhandza;

₄₈swileriso swa wena leswi ndzi swi rhandzaka, ndza swi xixima;

a ndzi nga rivali milawu ya wena.

₄₉Anakanya leswi u ndzi byeleke swona mina nandza wa wena,

ma nga marito lawa ya ndzi nyikaka ku tshemba.

₅₀Loko ndzi ri nhlomulweni, ndza chaveleleka,

hikuva switshembiso swa wena swi ndzi nyika vutomi.

₅₁Vasandzi va ndzi hlekula ku tlula mpimo,

kambe a ndzi hambani ni nawu wa wena.

₅₂We HOSI, ndzi kuma matimba,

loko ndzi anakanya leswi u swi boheke khale.

₅₃Lavo homboloka va ndzi hlundzukisa ngopfu,

hikuva a va na mhaka ni nawu wa wena.

₅₄Loko ndza ha ri emisaveni leyi,

ndzi ta yimbelela tinsimu ndzi dzunisa milawu ya wena.

₅₅We HOSI, ndza ku anakanya hambi byi ri vusiku,

ndzi hlayisa nawu wa wena.

₅₆Eka mina, ku landza swiletelo swa wena,

hi byona vutomi.

₅₇We HOSI, mina ndzi ri,

nkateko wa mina i ku hlayisa rito ra wena.

₅₈Ndza ku kombela hi mbilu ya mina hinkwayo: Ndzi twele vusiwana

hilaha u tshembiseke hakona.

₅₉Ndzi xiyaxiyile tindlela ta mina,

kutani ndzi hundzulukile ndzi landzelela switsundzuxo swa wena.

₆₀A ndzi hlweli, ndzi tsutsumela

ku hlayisa swileriso swa wena.

₆₁Lavo homboloka va ndzi rhiya hi ntlhamu,

kambe mina a ndzi rivali nawu wa wena.

₆₂Ni le xikarhi ka vusiku, ndza pfuka ndzi ku tlangela,

hikwalaho ka leswo lulama leswi u swi boheke.

₆₃Ndzi twanana ni hinkwavo lava va ku chavaka,

lava hlayisaka swiletelo swa wena.

₆₄We HOSI, misava yi tele hi rirhandzu ra wena,

ndzi dyondzise milawu ya wena!

₆₅We HOSI, u ndzi endlerile leswinene, mina nandza wa wena,

hilaha u ndzi tshembiseke hakona.

₆₆Ndzi dyondzise ku tiva ni ku twisisa swinene swileriso swa wena,

hikuva ndzi tshemba wena.

₆₇Khale loko ndzi nga si wela ekhombyeni, a ndzi lahlekile ndlela,

kambe sweswi ndzi endla leswi u ndzi byelaka swona.

₆₈We HOSI, u ni vunene, naswona u endla leswinene,

ndzi dyondzise milawu ya wena.

₆₉Vasandzi va ndzi lumbeta,

kasi mina ndzi hlayisa swiletelo swa wena hi mbilu ya mina hinkwayo;

₇₀vanhu lava va tlanyele timbilu,

kambe mina ndzi tsakela ngopfu nawu wa wena;

₇₁ku wela ekhombyeni swi ndzi pfunile,

hikuva swi ndzi dyondzisile milawu ya wena.

₇₂Eka mina, nawu lowu humaka enon'weni wa wena

wu ni nkoka ku tlula mali yo tala ya nsuku ni silivhere.

₇₃We HOSI, u ndzi vumbile ni ku ndzi tiyisa hi mavoko ya wena,

hikokwalaho ndzi nyike vutlhari, leswaku ndzi ta twisisa swileriso swa wena.

₇₄Lava va ku chavaka, va ta tsaka loko va ndzi vona,

hikuva ndzi tshemba rito ra wena.

₇₅We HOSI, ndza swi tiva leswaku u boha timhaka hi ku lulama,

hikokwalaho a wu hoxanga loko u ndzi tshikile ndzi xaniseka.

₇₆Kambe sweswi rirhandzu ra wena a ri ndzi tiyise,

hikuva u ndzi tshembisile sweswo mina nandza wa wena.

₇₇Ndzi kombe tintswalo ta wena leswaku ndzi ta hanya,

hikuva ndzi tsakela ngopfu nawu wa wena.

₇₈Vasandzi vona a va khome hi tingana, hikuva va ndzi lumbetile,

kambe mina a ndzi tshiki ku anakanya swiletelo swa wena.

₇₉Hinkwavo lava va ku chavaka, a va te eka mina,

leswaku ndzi va dyondzisa switsundzuxo swa wena.

₈₀Ndzi navela ku landza milawu ya wena, ndzi nga yi tshiki,

kutani a ndzi nga khomiwi hi tingana.

₈₁Ndzi navela ngopfu ku ponisiwa hi wena,

hikuva ndzi tshemba leswi u swi vulaka.

₈₂Ndzi langutela hi mahlo-ngati ku hetiseka ka switshembiso swa wena,

ndzi ri: “We HOSI, xana u ta ta rini u ta ndzi pfuna xana?”

₈₃Hambileswi ndzi punyaleke kukota mbita exitikweni,

ndzi nga ka ndzi nga rivali milawu ya wena.

₈₄Xana mina nandza wa wena ndzi ta xanisiwa ku fikela rini,

ni lava va ndzi xanisaka, vona u ta va avanyisa rini xana?

₈₅Vasandzi lava va cela khele emahlweni ka mina;

a va na mhaka ni nawu wa wena.

₈₆Swileriso swa wena hinkwaswo swi tiyile,

hambiswiritano va ndzi xanisa ni ku ndzi lumbeta. Ndzi pfune!

₈₇Va lavile ku ndzi susa laha misaveni,

kambe mina a ndzi tshikanga swiletelo swa wena.

₈₈Leswi u ndzi rhandzaka, ponisa vutomi bya mina,

kutani ndzi ta hlayisa switsundzuxo leswi u swi vulaka.

₈₉We HOSI, rito ra wena ra tiyisiwa ematilweni

hilaha ku nga heriki.

₉₀Ku tshembeka ka wena a ku na ku hela,

hi wena u tumbuluxeke misava, kutani yi tiyile.

₉₁Swilo swa ha yimise sweswo ni namuntlha hi ku landza leswi u swi boheke,

kutani hinkwaswo swi tirhela wena.

₉₂Ndzi ponisiwile ekhombyeni leri a ndzi ri eka rona,

hikuva a ndzi tsakela ngopfu nawu wa wena.

₉₃Ndzi nga ka ndzi nga rivali swiletelo swa wena,

hikuva u ndzi hanyisa ha swona.

₉₄Ndzi wa wena, ndzi lamulele,

hikuva ndzi ringetile ku landza swiletelo swa wena.

₉₅Hambileswi lavo homboloka va lavaka ku ndzi dlaya,

switsundzuxo swa wena ndzi nga ka ndzi nga swi rivali.

₉₆Ndzi vonile leswaku swilo hinkwaswo leswo saseka swa hela,

kambe swileriso swa wena swona swi nga ka swi nga heli.

₉₇Nawu wa wena ndzi wu rhandza ngopfu,

siku hinkwaro ndzi le ku wu anakanyeni.

₉₈Swileriso swa wena swi ndzi nyika vutlhari lebyi tlulaka bya valala va mina,

kutani ndza swi hlayisa minkarhi hinkwayo.

₉₉Ndzi tlula vadyondzisi va mina hinkwavo hi ku twisisa timhaka,

hikuva ndzi anakanya switsundzuxo swa wena.

₁₀₀Ndzi tlharihile ku tlula ni vanhu lavakulu,

hikuva ndzi hlayisa swiletelo swa wena.

₁₀₁A ndzi pfumeli ku famba etindleleni leto homboloka,

hikuva ndzi rhandza ku hlayisa rito ra wena.

₁₀₂Swiboho swa wena a ndzi swi fularheli,

hikuva hi wena u ndzi dyondziseke swona.

₁₀₃Marito ya wena a hi ku nandziha ka wona,

ma tsokombela ku tlula ni vulombe enon'weni wa mina.

₁₀₄Swiletelo swa wena swa ndzi tlharihisa,

hikokwalaho ndzi vengaka tindlela hinkwato ta mavunwa.

₁₀₅Rito ra wena i rivoningo endleleni ya mina,

ni ku vonakala emilengeni ya mina.

₁₀₆Ndzi tiyisile hi ku hlambanya,

leswaku swiboho swa wena leswo lulama, ndzi ta swi hlayisa.

₁₀₇Ndzi le ku xanisekeni lokukulu!

Ndzi hanyise we HOSI, hilaha u vuleke hakona.

₁₀₈We HOSI, amukela xikhongelo xa mina xa ku nkhensa,

kutani u ndzi dyondzisa leswi u swi boheke.

₁₀₉Minkarhi hinkwayo ndzi le kusuhi ni ku dlawa,

kambe a ndzi rivali nawu wa wena.

₁₁₀Lavo homboloka va ndzi rhiyile hi ntlhamu,

kambe a ndzi tluli swiletelo swa wena.

₁₁₁Switsundzuxo swa wena, ndza swi amukela minkarhi hinkwayo,

hi swona swi ndzi tsakisaka.

₁₁₂Ndzi navela ku landzelela milawu ya wena

minkarhi hinkwayo ku kondza ndzi ya eku feni.

₁₁₃A ndzi twanani ni vakanganyisi,

hikuva ndzi rhandza nawu wa wena.

₁₁₄Wena HOSI, u xisirhelelo ni xitlhangu xanga,

ndzi tshemba rito ra wena.

₁₁₅N'wina mi endlaka leswo biha, hambanani na mina,

ndzi ta kota ku hlayisa swileriso swa Xikwembu xanga.

₁₁₆Ndzi seketele hilaha u tshembiseke hakona, ndzi ta hanya,

u nga ndzi tshiki empfhukeni hikuva ndzi tshembe wena.

₁₁₇Ndzi tiyise, leswaku ndzi ta pona,

ndzi tikarhatela milawu ya wena minkarhi hinkwayo.

₁₁₈U fularhela hinkwavo lava tlangaka hi milawu ya wena;

hakunene vukanganyisi bya vona byi xisa vona vinyi!

₁₁₉Lavo homboloka, eka wena i mavivi ntsena etikweni,

hikokwalaho ndzi rhandza switsundzuxo swa wena.

₁₂₀Ndza rhurhumela emahlweni ka wena hikuva ndza ku chava,

ndzi chava ni leswi u swi boheke.

₁₂₁Ndzi endlile leswo lulama, leswi nga nawini,

u nga ndzi nyiketi eka lava va ndzi xanisaka.

₁₂₂Tikombe eka mina, u ndzi katekisa,

u nga pfumeli leswaku vasandzi va ndzi xanisa.

₁₂₃Ndza ku langutela hi mahlo-ngati leswaku u ta ndzi lamulela,

ni leswaku switshembiso swa wena leswo lulama swi ta hetiseka.

₁₂₄Ndzi pfune mina nandza wa wena, hikuva wa ndzi rhandza.

Ndzi dyondzise ni milawu ya wena!

₁₂₅Ina, ndzi nandza wa wena, ndzi nyike vutlhari

leswaku ndzi ta twisisa switsundzuxo swa wena.

₁₂₆We HOSI, nkarhi wa wena wa ku tirha wu fikile,

lwana ni lava tlulaka nawu wa wena.

₁₂₇Mina ndzi rhandza swileriso swa wena

ku tlula nsuku, hambi wu ri lowo saseka ngopfu.

₁₂₈Hikokwalaho, swiletelo swa wena hinkwaswo hi swona swi ndzi kombaka ndlela leyinene;

a ndzi twanani ni mikhuva ya vakanganyisi.

₁₂₉Switsundzuxo swa wena swi tsakisa ngopfu,

hikokwalaho ndzi swi hlayisa embilwini yanga.

₁₃₀Loko vanhu va hlamuseriwa rito ra wena swi va pfula mahlo,

vanhu va xiyimo xa le hansi swi va nyika vutlhari.

₁₃₁Ndzi tsakela ngopfu swileriso swa wena,

ndzi swi amukela hi mandla mambirhi.

₁₃₂Ndzi langute, u ndzi twela vusiwana,

hikuva u bohile makungu yo pfuna lava va ku rhandzaka.

₁₃₃Switshembiso swa wena a swi ndzi kombe ndlela leyinene,

ndzi nga tshuki ndzi fumiwa hi vudyoho.

₁₃₄Ndzi lamulele eka vanhu lava va ndzi xanisaka,

leswaku ndzi ta hlayisa swiletelo swa wena.

₁₃₅Ndzi langute hi tintswalo hikuva ndzi nandza wa wena,

u ndzi dyondzisa ni milawu ya wena.

₁₃₆Mahlo ya mina ma tenga-tenga mihloti,

hikuva vanhu a va hlayisi nawu wa wena.

₁₃₇We HOSI, u lulamile,

ni swiboho swa wena a hi ku lulama ka swona!

₁₃₈Switsundzuxo swa wena, u hi nyikile swona

hi ku lulama ni ku tshembeka lokukulu.

₁₃₉Ndzi vaviseka ngopfu emoyeni,

hikuva valala va mina a va na mhaka ni rito ra wena.

₁₄₀Switshembiso swa wena swi tiyile swinene,

kutani mina nandza wa wena ndza swi tsakela.

₁₄₁Hambileswi ndzi nga munhu ntsena ni vanhu va ndzi langutelaka ehansi,

a ndzi rivali swiletelo swa wena.

₁₄₂Minkarhi hinkwayo ku lulama ka wena ku hetisekile,

ni nawu wa wena a wu hundzuki.

₁₄₃Hambiloko ndzi wela hi gome ni nhlomulo,

ndzi tsakela swileriso swa wena.

₁₄₄Switsundzuxo swa wena swi lulamile minkarhi hinkwayo;

ndzi nyike vutlhari, ndzi ta hanya.

₁₄₅We HOSI, ndzi huwelela eka wena hi mbilu ya mina hinkwayo! Ndzi hlamule,

kutani ndzi ta hlayisa milawu ya wena.

₁₄₆Ndzi huwelela eka wena! Ndzi ponise,

kutani ndzi ta yingisa switsundzuxo swa wena.

₁₄₇Ndzi pfuka nimpundzu swinene ndzi kombela ku pfuniwa,

hikuva ndzi tshemba marito ya wena.

₁₄₈Vusiku hinkwabyo vurhongo a byi khomi,

hikuva ndzi le ku anakanyeni ka swileriso swa wena.

₁₄₉We HOSI, ndzi yingise hi rirhandzu ra wena;

leswi u swi boheke a swi sirhelele vutomi bya mina.

₁₅₀Lava va ndzi xanisaka, va ndzi tshinelela va ri ni makungu layo biha,

ni nawu wa wena a va na mhaka na wona.

₁₅₁Hambiswiritano we HOSI, u le kusuhi na mina,

ni swileriso swa wena hinkwaswo swi tiyile.

₁₅₂Ndzi swi tivile khale leswaku switsundzuxo swa wena

swi ta tirha minkarhi hinkwayo.

₁₅₃Wa nga languta maxangu ya mina, u ndzi humesa ka wona,

hikuva a ndzi rivali nawu wa wena.

₁₅₄Kambisisa mhaka ya mina, u ndzi kutsula;

ndzi hanyise hilaha u tshembiseke hakona.

₁₅₅Lavo homboloka va le kule ni ku ponisiwa,

hikuva a va yingisi milawu ya wena.

₁₅₆We HOSI, tintswalo ta wena i tikulu,

ndzi hanyise hi swiboho swa wena.

₁₅₇Hambileswi vaxanisi ni valala va mina va nga tala,

a ndzi hambani ni switsundzuxo swa wena.

₁₅₈Loko ndzi vona lava nga pfumeriki, ndzi twa ku vava,

hikuva a va na mhaka ni switshembiso swa wena.

₁₅₉Vona hilaha ndzi tsakelaka swiletelo swa wena hakona;

ndzi hanyise, hikuva wa ndzi rhandza.

₁₆₀Mongo wa rito ra wena i ntiyiso;

hinkwaswo leswi u swi boheke hi ku lulama ka wena, swi ta va kona minkarhi hinkwayo.

₁₆₁Varhangeri va tiko va ndzi xanisa ndzi nga onhanga nchumu,

hambiswiritano embilwini ya mina, ndzi chava rito ra wena ntsena.

₁₆₂Ndzi tsakela switshembiso swa wena,

ku fana ni munhu la kumaka rifuwo lero tala.

₁₆₃Mavunwa ndza ma nyenya, a ndzi twanani na wona,

kambe nawu wa wena wona ndza wu rhandza.

₁₆₄Siku rin'wana ni rin'wana ndzi ku tlangela ka-7,

hikwalaho ka leswi u swi boheke hi ku lulama ka wena.

₁₆₅Lava rhandzaka nawu wa wena, va ni ku rhula lokukulu,

ku hava lexi xi nga va khugulaka va wa.

₁₆₆We HOSI, ndzi languta eka wena leswaku u ndzi ponisa,

ndzi ri karhi ndzi landzelela swileriso swa wena.

₁₆₇Ndzi hlayisa switsundzuxo swa wena embilwini ya mina,

hikuva ndzi swi rhandza ngopfu.

₁₆₈Ndzi hlayisa swiletelo ni switsundzuxo swa wena,

mintirho ya mina hinkwayo wa yi tiva!

₁₆₉We HOSI, amukela xirilo xa mina,

u ndzi nyika vutlhari hilaha u vuleke hakona.

₁₇₀Yingisa xikhongelo xa mina kutani u ndzi kutsula,

hikuva u ndzi tshembisile swona.

₁₇₁Ndzi ta ku tlangela hi nomo wa mina,

hikuva u ndzi dyondzisa milawu ya wena.

₁₇₂Ndzi ta yimbelela ndzi twarisa switshembiso swa wena,

hikuva milawu ya wena hinkwayo yi lulamile.

₁₇₃We HOSI, ndzi pfune minkarhi hinkwayo

hikuva ndzi hlawurile ku landzelela swiletelo swa wena.

₁₇₄We HOSI, ndzi navela ngopfu ku lamuleriwa hi wena.

Nawu wa wena ndzi wu tsakela ngopfu.

₁₇₅Ndzi tshike ndzi hanya, leswaku ndzi ta ku dzunisa;

swiboho swa wena a swi ve swona swi ndzi pfunaka.

₁₇₆Ndzi le ku pepetsekeni kukota nyimpfu leyi lahlekeke.

Tana u ta ndzi lava mina nandza wa wena, hikuva a ndzi rivali swileriso swa wena.