Pisalema ya 101

₁We HOSI, ndzi lava ku yimbelela risimu ndzi ku dzunisa,

ndzi twarisa ku tshembeka ka wena ni ku lulama ka wena;

₂ndzi navela ku famba hi ndlela leyi nkhensekaka.

Xana u ta ndzi endzela rini xana?

Emutini wa mina, ndzi ta rhandza ku hanya hi mbilu leyi tengeke,

₃ndzi tshika mintirho hinkwayo leyo hombokoka.

Lava landzulaka Xikwembu, ndzi ta lwa na vona,

ndzi nge pfuki ndzi twananile na vona!

₄Lavo biha timbilu a va ve kule na mina!

A ndzi nga lavi ku twa nchumu hi vanhu lavo homboloka.

₅La hlevaka van'wana ni ku va lumbeta,

ndzi ta n'wi herisela makumu;

munhu wa manyunyu ni ku tikukumuxa,

a ndzi nga twanani na yena.

₆Vaaki va tiko lavo tshembeka, ndzi ta va tsakela,

ndzi va rhurhela emutini wa mina;

vanhu va mahanyelo lamanene,

hi vona lava ndzi nga ta va hlawula leswaku va ndzi tirhela.

₇Kasi mukanganyisi a nge tshami emutini wa mina,

munhu wa vuheveheve, ndzi nge hanyisani na yena.

₈Siku rin'wana ni rin'wana

ndzi ta herisa lavo homboloka etikweni,

ndzi hlongola lava endlaka leswo biha,

va suka emutini wa HOSI Xikwembu.