Swivuriso 24

₁Vanhu vo biha timbilu, u nga va naveli,

u nga naveli ni ku tshama na vona,

₂hikuva leswi va swi ehleketaka i tihanyi ntsena;

minkarhi hinkwayo va vulavula hi ku onha swa van'wana.

₃Vutlhari byi aka muti,

wu tiyisiwa hi ku twisisa,

₄kutani vutivi byi nghenisa swilo swa nkoka,

swo saseka swa tinxaka-xaka, etindlwini ta wona.

₅Munhu wo tlhariha ú tiyile ku tlula munhu wa matimba,

ni munhu wa vutivi ú tlula loyi a nga ni ntamu.

₆Loko u ri ni vutlhari, u nga kota ku ya lwa nyimpi,

kutani u ta hlula loko u ri ni vatsundzuxi lavo tala.

₇Xiphukuphuku a xi fikeli laha ku nga ni vutlhari,

ehubyeni xi tsandzeka ni ku pfula nomo.

₈La nga ni makungu yo endla swo biha,

ú ta vuriwa mupfilunganyi;

₉makungu ya xiphukuphuku i ku dyoha ntsena,

musandzi, vanhu va n'wi venga.

₁₀Loko u hela mbilu hi siku ra khombo,

swi komba leswaku a wu tiyanga.

₁₁Ponisa lava yisiwaka eku dlayiweni,

ni lava dlidlimbeteriwaka kona, va lamulele.

₁₂Loko u ku: “Leswi, hina a hi nga swi tivi!”

xana Loyi a vonaka swa le mbilwini, a nge swi kumi leswaku wa hemba xana?

Loyi a hlayisaka vutomi bya wena, ú ta swi tiva,

kutani ú ta avanyisa un'wana ni un'wana hi ku ya hi mintirho ya yena.

₁₃N'wananga, dyana vulombe, hikuva i byinene,

ni xihlenge xa byona, a hi ku tsokombela ka xona.

₁₄Tiva leswaku vutlhari byi fana ni vulombe evuton'wini bya wena:

Loko u ri ni vutlhari, u nga kanakani hi leswi nga ta humelela enkarhini lowu taka,

naswona ku tshemba ka wena a ku nga heleli empfhukeni.

₁₅U nga yi u ya tumbelela munhu wo lulama laha a tshamaka kona,

muti wa yena, u nga tshuki u wu hlasela,

₁₆hikuva munhu la lulameke, hambiloko o wa ka 7, ú tlhela a pfuka,

kambe loko khombo ri fika, lavo homboloka va khuguka va wela makumu.

₁₇U nga tshuki u tsakisiwa hi ku wa ka nala wa wena,

ni ku khuguka ka yena, ma nga vi mafenya eka wena,

₁₈hikuva loko HOSI Xikwembu xo swi vona, xi nge swi tsakeli,

kutani xi ta tshika ku n'wi hlundzukela.

₁₉U nga tshuki u tipandzisa nhloko hikwalaho ka vadyohi,

ni lavo homboloka, u nga va naveli,

₂₀hikuva lavo homboloka, va nge hanyi ku ya kule,

ni rivoni ra vadyohi ri ta timiwa.

₂₁N'wananga, chava HOSI Xikwembu ni tihosi,

u nga twanani ni lava tisaka mpfilumpfilu,

₂₂hikuva vanhu lava va ta hatla va wela ekhombyeni,

naswona i mani loyi a tivaka siku leri va nga ta herisiwa ha rona, xana?

Ku ya hi nghohe eku avanyiseni ka timhaka,

a swi sasekanga.

₂₄Loyi a byelaka munhu wo homboloka, a ku: “A wu na nandzu”,

u ta tivangela ku rhuketeriwa, vanhu lavo tala va ta n'wi venga.

₂₅Kambe la nga chaviki ku tshinya vanhu vo homboloka,

ú ta tsakeriwa, a kuma ni minkateko leyo tala.

₂₆Munhu loyi a vulavulaka ntiyiso,

i munghana wa wena wa xiviri.

₂₇Rhanga u dyondza ku titirhela,

u lulamisa ni masimu ya wena,

hi kona u nga ta aka muti.

₂₈U nga tshuki u lumbeta muakelani wa wena,

ni ku n'wi hembela, u nga n'wi hembeli.

₂₉U nga tshuki u ku: “Ndzi ta n'wi endla leswi a ndzi endleke swona;

un'wana ni un'wana, ndzi ta n'wi hakela hi ku ya hi mintirho ya yena.”

₃₀Ndzi tshama ndzi hundza hi le nsin'wini ya munhu wo loloha loyi a nga ehleketiki swinene,

laha a byalaka vhinya ya yena kona.

₃₁Ndzi kuma nsimu yi tlhumile hi mitwa,

laha hansi ku ri nhova ntsena,

khumbi ra yona ra maribye ri wele hansi.

₃₂Kutani ndzi languta, ndzi xiyaxiya.

Eku languteni ka mina, ndzi kume dyondzo:

₃₃Loko u ku: “Ndza há kú bàà, ndzi etlelanyana switsongo,

ndza ha khondlanyana mavoko, ndzi wisa”,

₃₄vusiwana byi to nghena kukotisa khamba,

ni vusweti ku fana ni xigevenga.