Swivuriso 22

₁Ku va ni vito lerinene, swi tlula ku va ni rifuwo lero tala,

ku tsakeriwa, swi tlula silivhere ni nsuku.

₂Swifumi ni swisiwana swi hlangana eka xilo xin'we:

Hinkwavo va endliwile hi HOSI Xikwembu.

₃Munhu la twisisaka, ú vona khombo ra ha ri kule, kutani a tumbela,

kasi lowo-ke-mano, ú tihoxa eka rona, kutani endzhaku a tilaya.

₄Titsongahate, u chava HOSI Xikwembu,

kutani u ta kuma rifuwo, ni ku dzuneka, ni vutomi.

₅Ndlela ya munhu wa mahanyelo yo gombonyoka, yi ni mitwa ni mintlhamu,

loyi a hlayisaka vutomi bya yena, wa swi papalata.

₆Komba n'wana wa wena ndlela ya vutomi a ha ri ntsongo,

leswaku ni loko a kurile, a ta ka a nga hambuki eka yona.

₇Xisiwana xi ta fumiwa hi n'wankumi,

ni mulombi ú ta va hlonga ra loyi a lombeke eka yena.

₈Loyi a byalaka moya lowo biha, ú ta tshovela makhombo ntsena,

nkhavi lowu a baka vanhu ha wona, wu ta n'wi tshovekela.

₉Munhu loyi a hananaka, ú ta katekisiwa,

hikuva leswi a nga na swona, ú dya ni swisiwana.

₁₀Hlongola musandzi, kutani madzolonga ma ta yima,

ku holova ni ku rhuketelana swi ta hela.

₁₁Loyi a tsakelaka ku va ni miehleketo leyinene, ni ku titsongahata loko a vulavula,

ú ta va munghana wa hosi ya tiko.

₁₂HOSI Xikwembu xi sirhelela marito ya vutivi,

kambe leswi vulavuriwaka hi vakanganyisi, xa swi bakanya.

₁₃Lolo ri ri: “Ku ni nghala ehandle,

loko ndzo huma, ndzi ta dlawa!”

₁₄Marito ya wansati wa dlakuta, i khele leri enteke,

laha ku hojomelaka loyi a hlundzukeleke hi HOSI Xikwembu.

₁₅Vuphukuphuku byi namarhela mbilu ya lontshwa,

kambe nkhavi wa byi namurhuta byi suka eka yena.

₁₆Loyi a xanisaka xisiwana, wo xi fumisa,

loyi a nyikaka van'wankumi, wo tichela vusiwana.

₁₇Rhiya ndleve, u yingisa switsundzuxo swa tintlhari,

tikarhatele vutivi lebyi ndzi ku dyondzisaka byona;

₁₈loko u swi veka embilwini ya wena, ni loko swi tshama swi ri enon'weni wa wena,

u ta va ni ntsako lowukulu.

₁₉Ndzi lava leswaku u tshemba HOSI Xikwembu,

hikokwalaho namuntlha ndzi ku dyondzisaka wena hi xiviri.

₂₀Ndzi ku tsalerile switsundzuxo swa 30,

ma nga marito ya vutivi, lama tshinyaka.

₂₁Swi ta ku dyondzisa ku vona ntiyiso wa leswi vuriweke,

kutani u ta tlherisela ntiyiso ntsena eka lava va ku rhumeke.

₂₂U nga tshuki u tekela xisiwana swilo swa xona hi mhaka ya leswi xi nga xisiwana,

ni loko ku tengiwa timhaka, lava nga riki na nchumu, u nga va tshikeleli,

₂₃hikuva HOSI Xikwembu xi ta va lwela,

kutani xi herisa vutomi bya lava va va xanisaka.

₂₄U nga tshuki u endla xinakulobye ni munhu wa ximbilwa-mbilwana,

hambi munhu wa tihanyi, u nga tolovelani na yena,

₂₅hikuva u nga tekelela mikhuva ya yena,

kutani u wela entlhan'wini.

₂₆U nga tshuki u tshembisa munhu un'wana ku n'wi hakelela swikweleti,

kumbe ku tiboha ku dlaya milandzu ya yena,

₂₇hikuva loko u nga tshuka u pfumala swo hakela ha swona,

u ta tekeriwa mubedo, u sala u etlela ehansi.

₂₈U nga tshuki u hundzuluxa mindzilekana

leyi vatswari va wena va yi vekeke khale.

₂₉Munhu loyi a tivaka ntirho wa yena, ú ta tirhela tihosi,

a nge he tirheli vanhu va swiyimo swa le hansi.