Tinhlayo 5

₁HOSI Xikwembu xi ku ka Muxe: ₂“Lerisa Vaisraele leswaku va hlongola emixaxeni munhu un'wana ni un'wana loyi a nga ni vuvabyi bya nhlokonho kumbe bya tingana, ni loyi a tinyamiseke hi ku khumba ntsumbu. ₃U ta va humesa hinkwavo emixaxeni ya vona, vavanuna ni vavasati, u va veka ehandle ka yona leswaku va nga yi nyamisi, hikuva ndzi kona exikarhi ka yona.” ₄Kutani Vaisraele va endla hilaha HOSI Xikwembu xi byeleke Muxe hakona: Va va hlongola va huma emixaxeni.

₅Kutani HOSI Xikwembu xi ku ka Muxe: ₆“Tivisa Vaisraele leswaku loko munhu, wanuna kumbe wansati, a kumeka a nga tshembekanga eka HOSI Xikwembu, hi ku va a endlile xin'wana xa swidyoho leswi vanhu va dyohelanaka ha swona, ú ta va ni nandzu. ₇Hikokwalaho, ú fanele ku nkhensa nandzu wa yena, a riha hinkwaswo hi ku tlherisela loyi a n'wi dyoheleke swilo leswi onhakeke, a tlhela a tlhandlekela xiphemu xa ⅕ xa nxavo va swilo swa kona. ₈Kambe loko mudyoheriwa a nga ri na xaka leri swilo swo riha nandzu swi nga ta tlheriseriwa eka rona, swilo swa kona swi fanele ku yisiwa eka mina HOSI, swi va swa muprista, swi tlhandlekela nyimpfu ya mhamba leyi humeseriwaka ku basisa muonhi. ₉Mihlengo hinkwayo ni swilo hinkwaswo leswo hlawuleka leswi Vaisraele va swi yisaka eka muprista, swi ta va swa yena; ₁₀swilo leswo hlawuleka swa munhu un'wana ni un'wana swi ta va swa yena n'wini, kambe xin'wana ni xin'wana lexi munhu a xi nyikaka muprista, xi ta va xa muprista.”

₁₁Kutani HOSI Xikwembu xi ku ka Muxe: ₁₂“Tivisa Vaisraele mhaka leyi: Loko wansati a sukela nuna wa yena a ya hanya hi ndlela yo ka yi nga lulamanga, ₁₃ni loko a etlela ni wanuna un'wana, kutani mhaka yi nga fiki etindleveni ta nuna wa yena, kumbe loko nuna loyi wa yena a nga koti ku swi kuma hi leswi ku nga vangiki ni mbhoni leyi nga kumeta wansati loyi, ₁₄wanuna loyi a nga tshuka a ngheniwa hi moya wo ehleketela nsati wa yena, loyi a tinyamiseke; kumbe a nga tshuka a ngheniwa hi moya lowu, hambiloko nsati wa yena a nga tinyamisanga. ₁₅Loko swi ri tano, wanuna loyi ú fanele ku ya ni nsati wa yena eka muprista, a ri ni swo humesa gandzelo leri lavekaka eka wansati wo tano, xi nga xintewana xin'we xa mapa ya maxalana; a nga tshuki a chela mafurha kumbe murhi wa risuna emapeni lawa, hikuva i mapa ya gandzelo ra wanuna wo ehleketela nsati ni ra ku paluxa timhaka leswaku ntiyiso wu humela erivaleni.

₁₆“Muprista ú ta ta ni wansati loyi, a n'wi yimisa emahlweni ka mina HOSI, ₁₇a teka xikhuwana lexi nga ni mati layo hlawuleka, a teka ni ritshurinyana ra le hansi endzeni ka Ntsonga, a chela ematini lawa. ₁₈Loko muprista a yimisile wansati emahlweni ka mina, ú ta n'wi funungula nhloko, a n'wi tamerisa mapa ya gandzelo ro paluxa timhaka, ri nga gandzelo ra wanuna wo ehleketela nsati; muprista ú ta tamela mati layo bava lama tisaka ndzhukano, ₁₉kutani ú ta hlambanyisa wansati hi ku vula leswi a ku: ‘Loko u nga si tshama u etlela ni wanuna un'wana, ni loko u nga si tshama u sukela nuna wa wena u ya tinyamisa, mati lawa yo bava lama tisaka ndzhukano, ma nga tshuki ma ku endla nchumu.’ _20-21Muprista ú ta hlambanyisa wansati emhakeni leyi ya ndzhukano, hi ku ya emahlweni a ku: ‘Kambe loko u tshama u sukela nuna wa wena loyi a nga ku teka, ni loko u tshama u tinyamisa hi ku etlela ni wanuna loyi a nga riki nuna wa wena, HOSI Xikwembu a xi ku hundzule ndzhukano ni xihlambanyiso exikarhi ka vanhu va ka n'wina, xi ku endla leswaku u onhakeriwa, u pfimba ni swirho. ₂₂Mati lawa yo tisa ndzhukano, a ma nghene emirini wa wena, ma pfimbisa swirho swa wena, ma ku vangela ni ku onhakeriwa!’ Kutani wansati ú ta ku: ‘Amen, a swi ve tano!’

₂₃“Kutani muprista ú ta tsala marito lawa ya ndzhukano ebukwini, a tlhela a ma hlantswela ematini layo bava, ₂₄leswaku a ta nwisa wansati mati lawa yo bava lama tisaka ndzhukano, ma nghena emirini wa yena, kutani ma n'wi twisa ku vava. ₂₅Kutani muprista ú ta teka mapa ya gandzelo evokweni ra wansati, a ndzi komba wona, mina HOSI, kutani a ma yisa alitarini. ₂₆Kutani ú ta nusa xandla xa mapa ya gandzelo ro paluxa timhaka, a ma hisa alitarini, ku ri kona a nga ta nwisa wansati emati ya ndzhukano. ₂₇Loko wansati a tshama a tinyamisa, hi ku ya etlela ni wanuna un'wana, mati lawa ma ta nghena emirini wa yena ma n'wi twisa ku vava, swirho swa yena swi pfimba, a va ni ku onhakeriwa, a tlhela a hundzuka ndzhukano exikarhi ka vanhu va ka vona. ₂₈Kambe loko wansati a nga tinyamisanga, a ri loyi a tengeke, a nga ka a nga humeleriwi hi nchumu, ni vana ú ta va kuma.

₂₉“Lowu hi wona nawu etimhakeni ta ku ehleketela, loko wansati a sukerile wanuna loyi a nga n'wi teka, a ya tinyamisa, ₃₀ni loko wanuna a tshuka a ngheniwile hi moya wo ehleketela nsati wa yena. Wanuna ú ta ya ni nsati wa yena emahlweni ka HOSI Xikwembu, kutani muprista ú ta kambisisa mhaka ya wansati loyi hi ku landza swileriso hinkwaswo swa nawu lowu. ₃₁Wanuna a nga ka a nga vekiwi nandzu, kambe wansati loko a ri na wona ú ta wu byarha.”