Tinhlayo 30

₁Muxe a byela varhangeri va tinyimba ta Israele, a ku ka vona: “Leswi HOSI Xikwembu xi leriseke swona hi leswi: ₂Loko wanuna a tshembisa HOSI Xikwembu ku xi endlela swin'wana, kumbe loko a tiboha hi ku hlambanya leswaku ú ta titsona swin'wana, ú fanele ku hetisa leswi a swi vuleke, a endla hilaha a vuleke hakona a nga siyi nchumu.

₃“Loko nhwanyana loyi a nga si tekiwaka a tshembisa HOSI Xikwembu ku xi endlela swin'wana, ni loko a tiboha hi ku hlambanya leswaku ú ta titsona swin'wana, ₄kutani tata wa yena a swi twa, kambe a nga vuli nchumu, nhwanyana loyi ú fanele ku endla hinkwaswo leswi a swi tshembiseke ni leswi a tiboheke ku titsona swona. ₅Kambe loko tata wa yena a swi twa, kutani a n'wi arisa siku rero, nhwanyana loyi a nga fanelanga ku endla leswi a tshembiseke swona ni leswi a tiboheke ku titsona swona; HOSI Xikwembu xi ta n'wi rivalela, hikuva ú ta va a aleriwile hi tata wa yena. ₆Nkarhi wun'wana nhwanyana loyi a nga tekiwa a nga si hetisa leswi a tshembiseke ku swi endla, kumbe swin'wana leswi a nga tiboha swona hi xihatla. ₇Loko nuna wa yena a swi twa, kambe a nga vuli nchumu siku rero, nhwanyana loyi ú ta fanela ku endla leswi a swi tshembiseke ni leswi a tiboheke ku titsona swona. ₈Kasi loko nuna wa yena a n'wi arisa siku a swi twaka, ú ta va a herisile leswi nhwanyana loyi a a tshembisile ku swi endla ni leswi a a tibohile swona hi xihatla; kutani HOSI Xikwembu xi ta n'wi rivalela.

₉“Wansati un'wana ni un'wana wa noni, kumbe loyi vukati bya yena byi feke, ú fanele ku hetisa leswi a tshembiseke ni ku tiboha leswaku ú ta swi endla.

₁₀“Loko wansati loyi a nga evukatini a tshembisa ku endla swin'wana, kumbe a tiboha hi ku hlambanya leswaku ú ta titsona swin'wana, ₁₁kutani nuna wa yena a swi twa, kambe a nga vuli nchumu, naswona a nga n'wi aleli, wansati loyi ú fanele ku endla hinkwaswo leswi a swi tshembiseke ni leswi a tiboheke ku titsona swona. ₁₂Kambe loko nuna wa yena a swi twa, kutani a swi herisa siku rorero, wansati loyi a nga ha fanelanga ku endla leswi a swi tshembiseke ni leswi a tiboheke swona; HOSI Xikwembu xi ta rivalela wansati loyi, hikuva ú ta va a ri nuna wa yena loyi a n'wi ariseke. ₁₃Wanuna a nga tiyisa kumbe ku herisa xin'wana ni xin'wana lexi nsati wa yena a tshembiseke ku xi endla, kumbe lexi a hlambanyeke a tiboha ku titsona xona. ₁₄Kambe loko ku hundza siku rin'we wanuna a nga si vula nchumu, ú ta va a tiyisa hinkwaswo leswi nsati wa yena a nga tshembisa swona kumbe leswi a nga tiboha swona, hikuva ú ta va a nga vulanga nchumu siku leri a nga swi twa ha rona. ₁₅Loko wanuna a ya sala a swi kaneta endzhaku ka loko a swi twile khale, hi yena a nga ta rhwala nandzu wa nsati wa yena.”

₁₆Leyi hi yona milawu leyi HOSI Xikwembu xi leriseke Muxe, hi tlhelo ra wanuna ni nsati wa yena, kumbe tatana ni n'wana wa yena loyi a nga si tekiwaka.