Tinhlayo 28

₁HOSI Xikwembu xi ku ka Muxe: ₂“Byela Vaisraele leswaku va hamba va ndzi humesela swakudya swa magandzelo lama hisiwaka hi nkarhi wa kona, naswona swi va leswi ku nun'hwela ka swona ku nga ta ndzi tsakisa. ₃U ta va byela leswaku siku rin'wana ni rin'wana hilaha ku nga heriki, va ta tlhava swinyimpfana swimbirhi swa makhuna swa lembe rin'we leswi nga solekiki, va ndzi humesela magandzelo lama hisiwaka; ₄va ta humesa xinyimpfana xin'we nimixo, xin'wana namadyambu. ₅Va ta tlhela va humesa ni xintewana xin'we xa mapa lamanene lama pfanganyisiweke ni xikhudza xin'we xa mafurha layo tenga. ₆Lawa i magandzelo lama hisiwaka ya siku rin'wana ni rin'wana, lawa va ndzi humeseleke wona ro sungula entshaveni ya Sinayi; ku nun'hwela ka wona ka ndzi tsakisa mina HOSI. ₇Eka magandzelo lawa, xinyimpfana xin'wana ni xin'wana xi humesiwa ni jomela rin'we ra vhinyo leyo bava ya magandzelo; vhinyo leyi ya magandzelo, va fanele ku ndzi humesela yona mina HOSI, hi ku yi chela exivandleni lexo hlawuleka. ₈Xinyimpfana lexin'wana, va ta xi humesa namadyambu, xi ri ni mapa ya xona ni vhinyo ya xona, ku fana ni swa nimixo; ma ta va magandzelo lama hiseriwaka mina HOSI, lawa ku nun'hwela ka wona ku nga ta ndzi tsakisa.

₉“Hi siku ra Savata, va fanele ku ndzi humesela swinyimpfana swimbirhi swa makhuna swa lembe rin'we leswi nga solekiki; va humesa ni swintewana swimbirhi swa mapa lamanene lama pfanganyisiweke ni mafurha, va humesa ni vhinyo ya gandzelo ra kona. ₁₀Leri i gandzelo leri fanelaka ku hisiwa siku rin'wana ni rin'wana ra Savata, ehandle ka magandzelo lama hisiwaka, lama humesiwaka ni vhinyo ya wona masiku hinkwawo.

₁₁“Hi siku ro sungula ra n'hweti yin'wana ni yin'wana, va ta ndzi tlhavela swinkuzana swimbirhi mina Hosi, ni khuna rin'we, ni swinyimpfana swa 7 swa xinuna swa lembe rin'we leswi nga solekiki; va ndzi humesela magandzelo lama hisiwaka. ₁₂Nkuzi yin'wana ni yin'wana va ta yi humesa ni xitshatshana xin'we xa mapa lamanene lama pfanganyisiweke ni mafurha, kasi khuna va ta ri humesa ni swintewana swimbirhi swa mapa lamanene, lama pfanganyisiweke ni mafurha. ₁₃Xinyimpfana xin'wana ni xin'wana va ta xi humesa ni xintewana xin'we xa mapa lamanene lama pfanganyisiweke ni mafurha. Hi wona magandzelo lama hisiwaka, lawa ku nun'hwela ka wona ku nga ta ndzi tsakisa mina HOSI. ₁₄Eka magandzelo lawa, nkuzi yin'we yi ta humesiwa ni xikhuwana xin'we xa vhinyo, khuna ri ta humesiwa ni jomela rin'we ni hafu; kasi xinyimpfana xin'wana ni xin'wana xi ta humesiwa ni jomela rin'we ra vhinyo. Hi wona magandzelo lama hisiwaka, lama nga ta humesiwa n'hweti yin'wana ni yin'wana lembe ri kondza ri hela. ₁₅Va ta tlhela va tlhava xiphongho, va ndzi humesela mhamba yo susa swidyoho; gandzelo leri ri fanele ku humesiwa ehandle ka magandzelo lama hisiwaka, lama humesiwaka ni vhinyo ya wona masiku hinkwawo.

₁₆“Hi siku ra vu-14 ra n'hweti yo sungula, ku ta va ni nkhuvo wa Paseka wo tlangela mina HOSI. ₁₇Kutani hi siku ra vu-15 ra n'hweti leyi, ku ta sungula Nkhuvo wa Xinkwa lexo-ke-comela lowu nga ta dyiwa masiku ya 7. ₁₈Hi siku ro sungula ra nkhuvo lowu, Vaisraele va fanele ku hlengeletana va gandzela mina HOSI; va nga tshuki va tirha ntirho ni wun'we lowu tikaka, ₁₉kambe, hi siku rero, va fanele ku ndzi humesela magandzelo lama hisiwaka; va ta tlhava swinkuzana swimbirhi, ni khuna rin'we, ni swinyimpfana swa xinuna swa 7 swa lembe rin'we; va fanele ku vona leswaku swifuwo leswi swi va leswi nga solekiki. ₂₀Eka magandzelo lawa, nkuzi va fanele ku yi humesa ni xirhundzu xa mapa lamanene lama pfanganyisiweke ni mafurha; khuna rona va ta ri humesa ni xitshatshana xin'we; ₂₁kasi swinyimpfana leswa 7, xin'wana ni xin'wana va ta xi humesa ni xintewana xin'we xa mapa lawa. ₂₂Va ta tlhela va tlhava xiphongho xin'we, va humesa mhamba yo susa swidyoho, leswaku va ta basisiwa. ₂₃Magandzelo lawa hinkwawo, ma fanele ku humesiwa ehandle ka magandzelo lama hisiwaka ya nimixo, lama nga ya masiku hinkwawo. ₂₄Hi ndlela yoleyo, siku rin'wana ni rin'wana ra vhiki rolero, va ta humesa swakudya swa magandzelo leswi hisiwaka, leswi ku nun'hwela ka swona ku nga ta ndzi tsakisa mina HOSI; swi ta humesiwa ehandle ka magandzelo lama hisiwaka ya masiku hinkwawo ni vhinyo ya wona. ₂₅Hi siku ra vu-7, va fanele ku hlengeletana va gandzela mina HOSI, va nga tshuki va tirha ntirho ni wun'we lowu tikaka.

₂₆“Hi siku ra Nkhuvo wa Ntshovelo (hileswaku Nkhuvo wa Mavhiki), ri nga siku leri va ndzi humeselaka ha rona leswi va nga ta rhanga va swi tshovela, va fanele ku hlengeletana va ndzi gandzela mina HOSI; va nga tshuki va tirha ntirho ni wun'we lowu tikaka, ₂₇kambe va fanele ku ndzi humesela magandzelo lama hisiwaka, lawa ku nun'hwela ka wona ku nga ta ndzi tsakisa mina HOSI. Va ta tlhava swinkuzana swimbirhi, ni khuna rin'we, ni swinyimpfana swa xinuna swa 7 swa lembe rin'we. ₂₈Va ta humesa ni mapa ya kona lamanene lama pfanganyisiweke ni mafurha; nkuzi yin'wana ni yin'wana va ta yi humesa ni xirhundzu xin'we, khuna rona va ta ri humesa ni xitshatshana; ₂₉kasi swinyimpfana leswa 7, xin'wana ni xin'wana va ta xi humesa ni xintewana xin'we. ₃₀Va ta tlhela va tlhava ni xiphongho, xi va mhamba yo va basisa. ₃₁Magandzelo lawa ma fanele ku humesiwa ni vhinyo ya wona, ehandle ka magandzelo lama hisiwaka ya masiku hinkwawo ni mapa ya wona; va fanele ku vona leswaku swifuwo swa kona swi va leswi nga solekiki.