Tinhlayo 19

₁Kutani HOSI Xikwembu xi ku ka Muxe na Aroni: ₂“Nawu hi lowu, wu humesiwa hi mina HOSI. Byelani Vaisraele va mi tisela thokazi leri tengeke, ri tlhela ri va leri nga solekiki, naswona leri nga si tshamaka ri paniwa. ₃Thokazi leri, mi ta ri yisela muprista Eliyazara, kutani ri ta humeseriwa ehandle ka mixaxa, ri ya tlhaveriwa kona, muprista Eliyazara a ri karhi a swi vona. ₄Muprista Eliyazara ú ta peta ritiho ra yena engatini ya thokazi ka 7, a ri karhi a yi n'watseka a yi kongomisa etlhelweni ra nyangwa ya Ntsonga lowo Hlawuleka. ₅Kutani thokazi ri ta hisiwa emahlweni ka Eliyazara: Dzovo, ni nyama, ni ngati, ni swanyi, swi ta hisiwa hinkwaswo. ₆Muprista ú ta teka tihunyi ta murhi wa kedari ni rhavi ra ximudyana xa hisopa ni ngoti ya muhlovo wo tshwuka, a swi hoxa endzilweni lowu hisaka thokazi. ₇Kutani muprista ú ta hlantswa swiambalo swa yena, a hlamba ni miri, ku ri kona a nga ta tlhelela emixaxeni; kambe siku rero ú ta va a nga tenganga ku kondza dyambu ri pela. ₈Loyi a hisaka thokazi, na yena ú ta hlantswa swiambalo swa yena, a hlamba ni miri; siku rero ú ta va a nga tenganga, dyambu ri kondza ri pela. ₉Kutani wanuna loyi a tengeke ú ta olela nkuma wa thokazi, a ya wu fumba kusuhi ni mixaxa, endhawini leyi baseke. Nkuma lowu wu ta hlayisiwa leswaku ntshungu wa Vaisraele wu ta wu tirhisa eka mati yo basisa leswi nyameke, hikuva thokazi leri i mhamba yo susa swidyoho. ₁₀Munhu loyi a olelaka nkuma na yena ú ta hlantswa swiambalo swa yena; siku rero ú ta va a nga tenganga, dyambu ri kondza ri pela. Nawu lowu wu ta boha Vaisraele hilaha ku nga heriki, wu boha ni vanhu lava luveleke exikarhi ka vona.

₁₁“Un'wana ni un'wana loyi a khumbeke munhu wo fa, ú ta va a nga tenganga ku ringana masiku ya 7. ₁₂Kutani eka siku ra vunharhu, ú ta hlamba miri, a tlhela a hlamba hi siku ra vu-7, ku va kona a nga ta va a tengile; loko a nga endli sweswo, ú ta tshama a nga tenganga. ₁₃Un'wana ni un'wana loyi a khumbaka munhu la feke, kutani a nga tibasisi, ú nyamisa Ntsonga wa mina HOSI; munhu wo tano, ú fanele ku hlongoriwa a suka erixakeni ra Israele. Munhu wa kona ú ta tshama a nga tenganga, hikuva ú ta va a nga xuviwanga hi mati yo basisa leswi nyameke.

₁₄“Loko munhu a fela entsongeni, nawu wa kona hi lowu: Un'wana ni un'wana loyi a nga ta nghena entsongeni wolowo, kumbe loyi a a ri kona loko swi humelela, ú ta va a nga tenganga, ku ringana masiku ya 7. ₁₅Swibya hinkwaswo leswi nga ta va swi nga funengetiwanga swinene, swi ta va swi nga tenganga na swona. ₁₆Loko munhu a famba-famba ehandle, kutani a tshuka a khumbile ntsumbu wa munhu un'wana loyi a nga dlayiwa hi fumu kumbe loyi a nga lo tifela, ni loko a khumbile hambi ri ri rhambu ra munhu kumbe sirha, munhu yoloyi ú ta va a nga tenganga, ku ringana masiku ya 7. ₁₇Ku basisa leswi nga tengangiki, va ta teka nkuma wa thokazi ra mhamba yo susa swidyoho, va wu chela exibyeni, va chela ni mati ya nambu. ₁₈Kutani munhu loyi a tengeke ú ta lava rhavi ra ximudyana xa hisopa, a ri peta ematini lawa, a xuva ntsonga ni swingolongondzwana, a xuva ni vanhu lava a va ri kwala ndzeni ka ntsonga. Loko munhu a khumbile rhambu ra munhu wo fa, kumbe ntsumbu wa loyi a dlayiweke kumbe loyi a ngo lo tifela, ni loko a khumbile sirha, na yena ú ta xuviwa hi ndlela yoleyo. ₁₉Hi siku ra vunharhu, munhu loyi a tengeke ú ta xuva swilo leswi nga tengangiki, a tlhela a swi xuva hi siku ra vu-7; naswona, hi siku roleri ra vu-7 loko a hetile ku swi basisa, na yena ú ta tibasisa hi ku hlantswa swiambalo swa yena, a hlamba ni miri; kutani hi madyambu ya siku rero ú ta va a tengile.

₂₀“Munhu loyi a nga tengangiki, loko a nga tibasisi, ú ta hlongoriwa a suka exikarhi ka ntshungu wa Vaisraele, hikuva ú ta nyamisa xivandla xa mina lexo hlawuleka. Munhu wo tano ú ta va a nga tenganga, hikuva a nga xuviwanga hi mati yo basisa leswi nyameke. ₂₁Vaisraele va ta boheka ku landza nawu lowu, hilaha ku nga heriki. Munhu loyi a xuvaka hi mati yo basisa leswi nyameke, ú fanele ku hlantswa swiambalo swa yena; naswona munhu loyi a khumbaka mati lawa yo basisa leswi nyameke, ú ta va a nga tenganga, dyambu ri kondza ri pela. ₂₂Xin'wana ni xin'wana lexi khumbiwaka hi munhu loyi a nga tengangiki, na xona xi ta va xi nga tenganga; naswona un'wana ni un'wana la nga ta khumba xilo xexo, na yena ú ta va a nga tenganga, dyambu ri kondza ri pela.”