Tinhlayo 17

₁Xikwembu xi ku ka Muxe: ₂“Byela Vaisraele leswaku murhangeri un'wana ni un'wana a ku tisela nhonga leyi yi nga ta yimela nyimba ya ka vona; tinhonga leti ti ta va 12, kutani eka nhonga yin'wana ni yin'wana u ta tsala vito ra murhangeri wa nyimba ya kona. ₃Leswi murhangeri wa nyimba yin'wana ni yin'wana a nga ta va ni nhonga yin'we, eka nhonga ya ka Levhi u ta tsala vito ra Aroni. ₄Tinhonga leti u ta ya na tona eka Ntsonga lowo Hlawuleka, u fika u ti veka kusuhi ni Areka ya Ntwanano, exivandleni lexi ndzi hlanganaka na n'wina eka xona. ₅Nhonga ya munhu loyi ndzi n'wi hlawuleke yi ta hluka, kutani ndzi ta va ndzi miyetile Vaisraele lava tshamaka va ri karhi va mi dzumadzumela.” ₆Hiloko Muxe a ya tivisa Vaisraele mhaka leyi, kutani murhangeri un'wana ni un'wana a yisela Muxe nhonga yin'we leyi yimelaka nyimba ya ka vona, tinhonga hinkwato ka tona ti va 12, kutani ya Aroni yi tisiwa yi ta vekiwa na tona. ₇Kutani Muxe a ya veka tinhonga leti emahlweni ka HOSI Xikwembu, eka Ntsonga lowu nga ni Areka ya Ntwanano.

₈Hi siku leri tlhandlamaka, loko Muxe a ya nghena eka Ntsonga lowu nga ni Areka ya Ntwanano a kuma leswaku nhonga ya Aroni leyi yimelaka va ka Levhi, yi hlukile yi baleka swiluva, yi va ni mihandzu leyi vupfeke ya “alimondi”. ₉Kutani Muxe a teka tinhonga hinkwato emahlweni ka HOSI Xikwembu a ti humesela ehandle a ya komba Vaisraele hinkwavo. Loko va vonile leswi humeleleke, murhangeri un'wana ni un'wana a titekela nhonga ya yena. ₁₀Kutani HOSI Xikwembu xi ku ka Muxe: “Tlherisela nhonga ya Aroni emahlweni ka Areka ya Ntwanano. Nhonga leyi yi ta tshama kona, yi va xitsundzuxo eka Vaisraele lava tiarisaka; hi ndlela leyi, u ta va tshikisa ku ndzi dzumadzumela, hikuva loko va nga swi tshiki, va ta fa!” ₁₁Kutani Muxe a endla leswi HOSI Xikwembu xi n'wi leriseke swona, a nga siyi nchumu.

₁₂Hiloko Vaisraele va ku ka Muxe: “Loko swi ri tano, hi herile, hi file! Hiloko hi file, hina hinkwerhu! ₁₃Loko ku ri leswaku un'wana ni un'wana loyi a tshinelaka kusuhi ni Ntsonga wa HOSI Xikwembu ú to fa, swi vula leswaku hinkwerhu hi ta hela!”