Tinhlayo 14

₁Kutani ntshungu hinkwawo wu ba huwa wu rila vusiku hinkwabyo. ₂Ntshungu hinkwawo wa Vaisraele wu dzumadzumela Muxe na Aroni, wu ku ka vona: “A swi ta antswa loko a hi lo fela etikweni ra Egipta, kumbe hi fela kwala mananga. ₃Xana HOSI Xikwembu xi hi yisela yini etikweni leriya leswaku hi ya dlayiwa hi fumu xana? Vasati va hina va ta phanghiwa ni vana va hina; xana a swi antswi hi tlhelela etikweni ra Egipta xana?”

₄Kutani Vaisraele va byelana va ku: “A hi tihlawuleleni murhangeri, hi tlhelela etikweni ra Egipta.” ₅Hiloko Muxe na Aroni va wa hi mimombo emahlweni ka nhlengeletano hinkwayo ya Vaisraele; ₆kutani Yoxuwa n'wana Nuni na Kalebe n'wana Yefune, va nga van'wana va tinhlori leti a ti yile ti ya valanga tiko ra Kanana, va handzulela swiambalo swa vona. ₇Kutani va byela ntshungu hinkwawo wa Vaisraele, va ku: “Tiko leri hi ri voneke loko hi famba-famba exikarhi ka rona hi ri valanga, ri saseke ngopfu. ₈Loko HOSI Xikwembu xi hi tsakela, xi ta hi nghenisa etikweni ra kona, xi tlhela xi hi nyika rona, tiko leri khulukaka ntswamba ni vulombe. ₉Ntsena mi nga tshuki mi fularhela HOSI Xikwembu, naswona mi nga va chavi vanhu va tiko leriya, hikuva hi ta va hlula hi ku olova; swikwembu swa vona leswi a swi va sirhelela swi fambile, kasi HOSI Xikwembu xona xi na hina, kutani mi nga va chavi!” ₁₀Kambe ntshungu hinkwawo wa Vaisraele wu yima hi rito rin'we, wu lava ku khandla Yoxuwa na Kalebe hi maribye. Hiloko ku vonakala ka HOSI Xikwembu ku humelela eka Ntsonga lowo Hlawuleka, emahlweni ka Vaisraele hinkwawo.

₁₁HOSI Xikwembu xi ku ka Muxe: “Vanhu lava va ta ndzi sandza ku fika rini xana? Xana, hambileswi ndzi endleke mahlori layo tala exikarhi ka vona, va ha ta ya emahlweni va ala ku ndzi tshemba xana? ₁₂Ndzi ta va ba hi ntungu, ndzi tlhela ndzi va tekela ndzhaka ya vona. Kutani wena, ndzi ta ku endla rixaka lerikulu ro tiya ku tlula vona.”

₁₃Kambe Muxe a ku ka HOSI Xikwembu: “Vaegipta va ta yi twa mhaka leyi, hikuva hi wena u humeseke Vaisraele exikarhi ka vona, hi matimba ya wena. ₁₄Kutani va ta byela vaaki va tiko ra Kanana emhaka leyi. Vanhu lava va swi twile leswaku wena HOSI u kona exikarhi ka Vaisraele, ni leswaku u tikombile eka vona hi tindlela leto tala; naswona papa ra wena a ri hambani na vona; u va rhangela emahlweni u ri endzeni ka papa leri nembelelaka ninhlekanhi, u tlhela u nembeleta ndzilo u va voningela ndlela nivusiku. ₁₅Kutani loko u nga dlaya vanhu lava hinkwavo, vamatiko lava nga twa ndhuma ya wena va ta ku: ₁₆‘HOSI Xikwembu xi dlayeterile Vaisraele emananga, hikuva xi tsandzekile ku va fikisa etikweni leri xi hlambanyeke ku va nyika rona.’ ₁₇Kutani sweswi ndzi kombela leswaku u kombisa matimba ya wena lamakulu, we HOSI, tanihilaha u tshembiseke hakona, u ku: ₁₈‘Mina HOSI, ndzi hlwela ku kariha, ndzi tele tintswalo leto tshembeka, ndzi rivalela milandzu ni ku tiarisa, kambe a ndzi tshiki ku ba lava dyoheke, ndzi ba ni vana va vona ku fika eka rixaka ra vona ra vunharhu ni ra vumune.’ ₁₉Ku sukela loko va humile etikweni ra Egipta ku ta fika namuntlha, vanhu lava u va rivalerile milandzu ya vona, hikwalaho ka ku tala ka tintswalo ta wena; kutani nisweswi, ndzi kombela leswaku u va rivalela.”

₂₀Kutani HOSI Xikwembu xi ku: “Ndzi va rivalerile, hilaha u vulaka hakona. ₂₁Kambe, loko ku vonakala ka mina ka ha funengetile misava hinkwayo, ndzi vula ndzi tiyisile, ndzi ri: ₂₂Hambileswi vanhu lava hinkwavo va voneke ku vonakala loku ka mina ni mahlori lawa ndzi ma endleke etikweni ra Egipta ni kwala mananga, va ha ya emahlweni va ndzi ringa, va nga yingisi leswi ndzi swi vulaka; ₂₃hikokwalaho, va nga ka va nga ri voni tiko leri ndzi ri tshembiseke vatata wa vona hi ku hlambanya; hinkwavo lava va ndzi sandzeke, a va nga ri voni tiko ra kona. ₂₄Kambe Kalebe nandza wa mina, ndzi ta n'wi fikisa etikweni leri a a yile eka rona, hikuva yena ú ni moya wo hambana ni wa lavan'wana, naswona wa ndzi yingisa swinene, kutani vatukulu va yena va ta sala va teka tiko leri. ₂₅Leswi Vaamaleke ni Vakanana va tshamaka erivaleni ra tiko, mundzuku mi fanele ku suka mi tlhelela emananga, mi famba hi ndlela leyi kongomaka eLwandle-ro-Tshwuka.”

₂₆Kutani HOSI Xikwembu xi ku ka Muxe na Aroni: ₂₇“Xana ntshungu lowu wa vabihi wu ta ndzi dzumadzumela ku ya fika rini xana? Ndzi va twile Vaisraele lava loko va ri karhi va ndzi dzumadzumela. ₂₈Wena Muxe, byela vanhu lava leswaku mina HOSI ndzi vula ndzi tiyisile, ndzi ri: ‘Ndzi swi twile leswi mi swi vuleke, ndzi ta swi endla! ₂₉Mintsumbu ya n'wina yi ta sala kwala mananga. Vavanuna hinkwavo lava hlayiweke ni ku tsariwa exikarhi ka n'wina, va ri ni malembe ya 20 ni ku tlula, lava va nga ndzi dzumadzumela, ₃₀a ku na un'we wa vona loyi a nga ta nghena etikweni leri ndzi nga hlambanya leswaku mi ta tshama eka rona. Kambe Kalebe n'wana Yefune na Yoxuwa n'wana Nuni hi vona ntsena lava nga ta nghena etikweni ra kona. ₃₁Loko swi ri swihlangi swa n'wina leswi mi nge te swi ta phanghiwa, ndzi ta swi fikisa etikweni leri mi ri sandzeke, kutani swona swi ta ri tiva. ₃₂Kambe loko ku ri n'wina, mintsumbu ya n'wina yi ta sala kwala mananga. ₃₃Vana va n'wina va ta va varisi kwala mananga ku ringana malembe ya 40; hikwalaho ka ku tiarisa ka n'wina, va ta xaniseka, mi kondza mi hela hinkwenu kwala mananga. ₃₄Mi ta xaniseka malembe ya 40 hikwalaho ka milandzu ya n'wina, hikuva masiku lawa mi nga valanga tiko ha wona a ma ri 40, hileswaku siku rin'wana ni rin'wana ri yimela lembe rin'we. Mi ta swi tiva leswaku mi ndzi khunguvanyisile ngopfu! ₃₅Ndzi tiyisile swilo leswi, hakunene ndzi ta swi endla, eka n'wina hinkwenu, ntshungu wa vabihi lava hlengeletaneke ku ndzi dzumadzumela. Hinkwenu mi ta fela kwala mananga! Mina HOSI, ndzi vurile!’ ”

₃₆Kutani vavanuna hinkwavo lava Muxe a va rhumeke ku ya valanga tiko ra Kanana, vona lava vuyeke va hangalasa moya wo biha lowu endleke leswaku ntshungu wa Vaisraele wu dzumadzumela Muxe, ₃₇va hlaseriwa hi ntungu va fa emahlweni ka HOSI Xikwembu. ₃₈Exikarhi ka hinkwavo lava a va rhumiwile ku ya valanga tiko, Yoxuwa n'wana Nuni na Kalebe n'wana Yefune hi vona ntsena lava nga sala va hanya.

₃₉Loko Muxe a byela Vaisraele leswi HOSI Xikwembu xi vuleke swona, hinkwavo va tlhaveka timbilu. ₄₀Va pfuka nimpundzu swinene, va tilulamisela ku tlhandlukela emagangeni, va ku ka Muxe: “Ha swi vona leswaku hi dyohile, kambe sweswi hi tiyimiserile ku tlhandlukela etikweni leri HOSI Xikwembu xi hi tshembiseke rona.” ₄₁Kambe Muxe a ku: “Xana mi tlulela yini xileriso xa HOSI Xikwembu, leswi mi nga ta ka mi nga humeleli ke? ₄₂Mi nga tshuki mi tlhandlukela emagangeni, hikuva HOSI Xikwembu a xi kona exikarhi ka n'wina, kutani valala va n'wina va ta ya mi hlula. ₄₃Leswi mi fularheleke HOSI Xikwembu, na xona a xi nga vi na n'wina, kutani loko mi ya hlangana ni Vaamaleke ni Vakanana kwale tikweni, va ta mi dlaya hi fumu.” ₄₄Kambe vona va sindzisa va tlhandlukela emagangeni, hambileswi Muxe a a sarile emixaxeni ni Areka ya Ntwanano wa HOSI. ₄₅Kutani Vaamaleke ni Vakanana, lava a va tshama emagangeni, va rhelela va hlasela Vaisraele, va va hlongorisa ku ya fika eHorma.