Tinhlayo 12

₁Muxe a a tekile nsati wa Muetiyopiya, kutani Meriyamu na Aroni va n'wi hleva hikwalaho ka swona. ₂Kutani va ku: “Xana HOSI Xikwembu xi lo rhuma Muxe ntsena ku vulavula na vanhu ke? Xana hina, a xi hi rhumanga ku vulavula na vona xana?” Kutani mhaka leyi yi fika etindleveni ta HOSI Xikwembu. ₃Muxe a a ri wanuna wo titsongahata, ku tlula vanhu hinkwavo emisaveni. ₄HOSI Xikwembu xi hatla xi byela Muxe na Aroni na Meriyamu, xi ku: “N'wina vanharhu, humani mi ya eka Ntsonga lowo Hlawuleka.” Kutani va huma hivunharhu bya vona. ₅Kutani HOSI Xikwembu xi rhelela xi ri epapeni leri nembelelaka; papa ri fika ri yima enyangweni ya Ntsonga, kutani Xikwembu xi vitana Aroni na Meriyamu; havambirhi va tshinela kusuhi ni nyangwa, ₆kutani xi ku ka vona: “Yingisani marito ya mina: Loko ku ri ni muprofeta exikarhi ka n'wina, mina HOSI Xikwembu ndzi tikomba eka yena hi xivono, ndzi vulavula na yena hi norho. ₇Kasi eka Muxe nandza wa mina a ndzi endlisi sweswo. Ndzi vekile hinkwaswo swa yindlu ya mina emavokweni ya yena. ₈Muxe ndzi hlamulana na yena hi nomo, a twa leswi ndzi swi vulaka, hikuva a swi lavi nhlamuselo; ú vona ni xivumbeko xa mina. Kutani hikwalaho ka yini n'wina mi nga chavi ku hleva Muxe nandza wa mina xana?”

₉HOSI Xikwembu a xi va hlundzukerile swinene. Loko xi suka xi famba, ₁₀na rona papa ri suka ehenhla ka Ntsonga, kutani Meriyamu a kumeka a ri ni vuvabyi bya nhlokonho, miri wa yena hinkwawo wa basulukile ku fana ni gamboko. ₁₁Kutani Aroni a ku ka Muxe: “We n'wini wanga, u nga hi bi hi ndlela leyi, hambileswi hi endleke vuphukuphuku hi ku dyohela. ₁₂Meriyamu a nga tshuki a fana ni loyi a humaka ekhwirini ra mana wa yena a file, ni xiphemu xin'wana xa miri wa yena xi dyekile.” ₁₃Kutani Muxe a huwelela eka HOSI Xikwembu, a ku: “We Xikwembu, ndza ku kombela, n'wi horise!” ₁₄Kambe HOSI Xikwembu xi byela Muxe xi ku: “Xana, loko a a lo tshwuteriwa marha exikandzeni hi tata wa yena, a a nga ta khomiwa hi tingana ku ringana masiku ya 7 xana? N'wi humeseni emixaxeni a ya tshama ehandle masiku ya 7, kutani endzhaku ka sweswo a nga ha vuyisiwa emixaxeni.” ₁₅Hiloko Meriyamu a humesiwa emixaxeni a ya tshama ehandle masiku ya 7. Vaisraele a va sukanga laha a va govile kona, ku kondza Meriyamu a vuyisiwa exikarhi ka vona. ₁₆Endzhaku ka sweswo, Vaisraele va suka eHaseroti, va ya gova emananga ya Parani.