Nehemiya 6

₁Sanibalati na Tobiya na Gexeme lowa Muarabu ni valala va mina hinkwavo, va swi twile leswaku ndzi hetile ku aka rirhangu, ni leswaku a ka ha salanga ndhawu leyi nga akiwangiki, kambe enkarhini wolowo timbanti a ndzi nga si ti vekela. ₂Kutani Sanibalati na Gexeme va rhuma vanhu va ta ndzi vitana va ku: “A hi hlangane emutini wun'wana erivaleni ra Ono.” Makungu ya vona a ku ri ku ndzi vavisa. ₃Kutani ndzi rhuma vanhu ni marito lama nge: “Ndzi le ntirhweni lowukulu, a ndzi nga swi koti ku rhelela ndzi ta kwaleyo. Xana ndzi nga tshika ntirho wu yima, ndzi ta eka n'wina xana?” ₄Va rhumile vanhu va ta eka mina ku ringana ka mune, kambe ndzi va hlamula ku fana ni le ku sunguleni. ₅Kutani eka ndlela ya vuntlhanu, Sanibalati a rhuma nandza wa yena, a ndzi tisela papila ri nga pfariwanga. ₆Epapileni ra kona a ku tsariwile leswi: “Wena ni Vayuda va ka n'wina mi lava ku hundzukela hosi. Mhaka leyi, yi hangalakile exikarhi ka vamatiko, hambi a ri Gexeme u ri wa yi tiva: Leswi hi swona swi endlaka leswaku mi aka rirhangu. Hi ku ya hi leswi vuriwaka, wena u lava ku va hosi ya Vayuda. ₇U tivekele ni vaprofeta lava va nga ta tivisa vanhu eYerusalema, va ku: ‘Ku ni hosi eYuda!’ Mhaka leyi, yi ta ya vikeriwa hosi ya tiko, hikokwalaho, sweswi wena tana hi ta tsundzuxana.” ₈Kutani ndzi rhuma munhu a ya fika a ku: “Swilo leswi u swi vulaka, a swi kona, swo huma enhlokweni ya wena ntsena.” ₉Hinkwavo a va lava ku ndzi chavisa, hikuva a va ku: “Va ta tshika ku aka, kutani ntirho wu ta yima.” Kutani ndzi khongela ndzi ku: “We Xikwembu, ndzi nyike matimba!”

₁₀Siku rin'wana, ndzi endzerile Xemaya n'wana Delaya wa Mehetabele enkarhini lowu a a fanele ku ka a nga suki endlwini ya yena, kutani a ku ka mina: “A hi hlangane exivandleni lexo hlawuleka eTempeleni. Hi ta fika hi pfala timbanti ta Tempele, hikuva va lava ku ku dlaya; va ta ku tela nivusiku!” ₁₁Kutani ndzi ku: “Xana u vula leswaku munhu wo fana na mina a nga tsutsuma a baleka xana? U ehleketa leswaku mina ndzi nga ya tumbela eTempeleni xana? Sweswo mina ndzi nga ka ndzi nga swi endli!” ₁₂Kutani ndzi vona ni ku twisisa leswaku munhu loyi a a nga rhumiwanga hi Xikwembu; leswi a a swi vula, a a ringeta ku ndzi kanganyisa; a a xaviwile hi Tobiya na Sanibalati. ₁₃Vanhu lava a va xave Xemaya leswaku a ta ndzi dyohisa hi ku ndzi chavisa ndzi endla leswi va vulaka swona, kutani vona va ta bihisa vito ra mina, va endlela ku ndzi xanisa.

₁₄Kutani ndzi khongela ndzi ku: “We Xikwembu xanga, leswi Tobiya na Sanibalati va endlaka swona, u nga swi rivali; hambi a ri wansati lowa muprofeta loyi va nge i Nowadiya ni vaprofeta hinkwavo lava ringeteke ku ndzi chavisa, u nga va rivali!”

₁₅Ntirho wo aka rirhangu wu tekile masiku ya 52; wu hele hi siku ra 25 ra n'hweti ya Elulu. ₁₆Valala va hina ni vamatiko hinkwavo lava hi rhendzeleke, va tshuke ngopfu va tlhela va hela ni matimba loko va twa timhaka leti, hikuva a va swi vona leswaku Xikwembu xa hina hi xona xi hi pfuneke ku heta ntirho lowu. ₁₇Eminkarhini yoleyo, varhangeri va le Yuda a va hamba va tsalelana mapapila na Tobiya. ₁₈Tobiya a a twanana ni vanhu lavo tala va le Yuda hikuva a a ri mukon'wana wa Xekamiya n'wana Ara. Tlhandlakambirhi, n'wana wa yena Yohanani a a tekile n'wana Mexulama wa Berekiya. ₁₉Vanhu lava a va dzunisa Tobiya emahlweni ka mina va ku u endla swilo leswinene, kutani va tlhela va ya n'wi byela leswi mina ndzi vuleke swona. Tobiya a a hamba a ndzi tsalela mapapila a ndzi chavisa.