Marka 7

₁Vafarisi ni vatsari van'wana lava humaka Yerusalema, va ta hlengeletana laha a a ri kona; ₂loko va vona vadyondzisiwa van'wana va yena va dya swakudya hi mavoko lama nyameke, hileswaku lawa ma nga hlambiwangiki, va va sola.

₃Mhaka hileswaku Vafarisi ni Vayuda hinkwavo a va dyi va nga si hlamba mavoko hi nawu wa kona, kutani, hi ndlela yoleyo, va hlayisa mikhuva leyi va yi amukeleke eka lava khale. ₄Ni loko va vuya hi le ku xaveni, a va dyi va nga si hlamba, va ha hlayisa ni mikhuva yin'wana leyo tala leyi va yi toloveleke, tanihi leya ku hlantswa mindzheko, ni timbita, ni swibya swa koporo, ni switshamu.

₅Kutani Vafarisi ni vatsari va n'wi vutisa, va ku: “Hikwalaho ka yini vadyondzisiwa va wena va nga fambi hi mikhuva ya lava khale xana; naswona, hikwalaho ka yini va dya va nga hlambanga mavoko?” ₆A va hlamula a ku: “Esaya a a vula n'wina hakunene, n'wina vakanganyisi, loko a tsarile a ku:

₈“Mi tshika nawu wa Xikwembu, kambe mi namarhela mikhuva leyi mi yi kumeke eka vanhu ntsena.” ₉A tlhela a ku ka vona: “Mi ni tindlela to tala to tshika ha tona nawu wa Xikwembu, mi endlela ku hlayisa mikhuva ya n'wina leyi mi yi toloveleke. ₁₀Hikuva Muxe ú te: ‘U va ni xichavo ka tata wa wena ni ka mana wa wena.’ Naswona ú te: ‘La rhuketelaka tata wa yena, kumbe mana wa yena, a a dlawe!’ ₁₁Kasi n'wina mi ri, loko munhu a ku ka tata wa yena, kumbe ka mana wa yena: ‘Leswi ndzi nga ku pfunaka ha swona, i korbani’ (hileswaku mhamba leyi hlayiseriweke Xikwembu), ₁₂a nga ha pfumeleriwi ku endlela tata wa yena kumbe mana wa yena xa nchumu; ₁₃hi ndlela leyi, mi onha rito ra Xikwembu hi mikhuva ya n'wina leyi mi nyikaka ni van'wana; mi endla ni swin'wana leswo tala swo fana ni sweswo.”

₁₄Yesu a engeta a vitana kambe ntshungu a ku ka vona: “Ndzi yingiseni hinkwenu, mi twisisa. ₁₅A ku na nchumu lexi nga handle ka munhu, lexi kotaka ku n'wi nyamisa loko xi nghena eka yena, kambe leswi humaka ka munhu, hi swona leswi swi n'wi nyamisaka.” [ ₁₆La nga ni tindleve ku yingisa, a a yingise.]

₁₇Loko a sukile entshungwini, ni ku nghena ndlwini, vadyondzisiwa va yena va n'wi vutisa xifaniso lexi. ₁₈A ku ka vona: “Kasi na n'wina, a mi twisisi xana? A mi swi tivi xana leswaku hinkwaswo swa le handle, loko swi nghena eka munhu, a swi koti ku n'wi nyamisa, ₁₉hikuva a swi ngheni embilwini ya yena, kambe swi ya ekhwirini, kutani swi ya humela enhoveni ke?” (Hi ku vula sweswo Yesu a a komba leswaku swakudya hinkwaswo swi tengile.) ₂₀A tlhela a ku: “Leswi humaka eka munhu hi swona leswi n'wi nyamisaka, ₂₁hikuva endzeni, etimbilwini ta vanhu, hi kona ku humaka miehleketo leyo biha, ni vuphukuphuku, ni ku yiva, ni ku dlayana, ₂₂ni vuoswi, ni ku navela rifuwo; hi kona ku humaka lunya, ni ku xisa, ni swa tingana, ni mavondzo, ni ku sandza, ni ku tikurisa, ni vuhunguki. ₂₃Hinkwaswo leswo biha leswi, swi huma endzeni ka mbilu, kutani hi swona leswi nyamisaka munhu.”

₂₄Loko a suka kwalaho, a ya etikweni ra Tiri. Kutani a nghena endlwini yin'wana, kambe a nga lavi ku tiviwa hi munhu; hambi swi ri tano a nga kotanga ku tifihla. ₂₅Kutani wansati un'wana loyi n'wana wa yena wa wanhwanyana a ngheniweke hi moya wa thyaka, loko a twile timhaka ta yena, a ta hi ku hatlisa, a nkhinsama emilengeni ya yena. ₂₆Wansati loyi a a ri wamatiko, wa rixaka ra Vasiro-Fenikiya; a kombela Yesu leswaku a hlongola demona, ri huma ka n'wana wa yena. ₂₇Kambe Yesu a ku ka yena: “Tshika vana, va rhanga va dya va xurha, hikuva a swi sasekanga ku tekela vana evuswa u nyika timbyana.” ₂₈Wansati a n'wi hlamula, a ku: “Hosi! Hambi ti ri timbyana leti nge hansi ka tafula, ti dya mahlanhla lama wisiwaka hi vana.” ₂₉Hiloko a ku ka yena: “Hikwalaho ka rito leri, famba, demona ri humile eka n'wana wa wena.” ₃₀Loko wansati a tlhelela kaya, a kuma n'wana a etlele esangwini, ni demona ri fambile.

₃₁Loko Yesu a vuya hi le tikweni ra Tiri, a hundza hi le Sidoni, a kongoma lwandle ra Galeliya hi ku tsemakanya tiko ra Dekapolisi. ₃₂Kutani va n'wi tisela munhu la feke tindleve, wa mbheveve; va khongela Yesu leswaku a n'wi tlhandleka mavoko. ₃₃Kuteloko Yesu a n'wi susile entshungwini, a n'wi tekela etlhelo, a nghenisa tintiho etindleveni ta yena, a tshwutela marha, a khumba ririmi ra yena ha wona; ₃₄kutani a languta ehenhla tilweni, a hefemuteka, a ku ka munhu loyi: “Efata!” hileswaku: “Pfuleka!” ₃₅Hiloko tindleve ta yena ti hatla ti pfuleka, na rona ririmi ra yena ri ntshunxeka, kutani a vulavula hi ku olova. ₃₆Kavaloko Yesu a va lerisa leswaku va nga byeli munhu; kambe, hambiloko a va lerisile ko tala, ko va kona va swi hangalasaka hi matimba. ₃₇Kutani vanhu va hlamala ngopfu, va ku: “Ú endlile hinkwaswo hi ndlela leyinene; ú pfula tindleve ta lava nga twiki, ú endla leswaku na timbheveve ti kota ku vulavula.”