Marka 15

₁Loko ra ha ku xa, vaprista lavakulu va hatla va lunghisa makungu ni vakulukumba, swin'we ni vatsari ni huvo hinkwayo; kuteloko va bohile Yesu, va famba na yena, va ya n'wi nyiketa eka Pilato.

₂Pilato yena a n'wi vutisa, a ku: “Xana u hosi ya Vayuda ke?” A hlamula a ku ka yena: “U vula swona.” ₃Kavaloko vaprista lavakulu va n'wi veka nandzu hi timhaka to tala. ₄Pilato a engeta a n'wi vutisa, a ku: “Xana a wu hlamuli nchumu ke? Yingisa timhaka leto tala leti va ku vekaka nandzu ha tona!” ₅Kambe Yesu a nga ha hlamulanga nchumu, Pilato a ko a hlamala.

₆Hi nkarhi wa nkhuvo Pilato a a tolovele ku ntshunxa mubohiwa un'we loyi vanhu va n'wi kombeleleke. ₇Kutani a ku ri ni un'wana la vuriwaka Barabasi, loyi a a bohiwile ni van'wana lava a va pfuxile dzolonga, va dlele na munhu edzolongeni ra kona. ₈Loko ntshungu wu khandziyile wu ya ehubyeni, wu kombela leswaku Pilato a endla hilaha a toloveleke ku va endlela hakona. ₉Pilato a va hlamula, a ku: “Xana mi rhandza leswaku ndzi mi ntshunxela hosi ya Vayuda ke?” ₁₀A a vula sweswo hi ku tiva leswaku vaprista lavakulu a va nyiketile Yesu hikwalaho ka mavondzo. ₁₁Kambe vaprista lavakulu va hlohletela ntshungu, leswaku Pilato a va ntshunxela Barabasi, ku nga ri Yesu. ₁₂Pilato a tlhela a vulavula na vona, a ku: “Loko swi ri tano, mi ri ndzi ta endla yini hi munhu loyi mi n'wi vulaka Hosi ya Vayuda ke?” ₁₃Vona va engeta va huwelela, va ku: “N'wi vambe!” ₁₄Pilato a va vutisa a ku: “Xana ú dyohile yini ke?” Vona va ba huwa leyikulu, va ku: “N'wi vambe!” ₁₅Kutani Pilato, hi ku rhandza ku tsakisa ntshungu, a va ntshunxela Barabasi; kutani loko a lerisile leswaku Yesu a biwa, a n'wi nyiketa leswaku va ya n'wi vamba.

₁₆Masocha ma famba na Yesu, ma n'wi yisa exivaveni xa yindlu ya vuhosi; kutani ma vitanana ma ya kona hinkwawo. ₁₇Kuteloko va n'wi ambexile xiambalo xo vangama xa xivunguvungu, va luka harhi ya mitwa, va n'wi tlhandleka enhlokweni. ₁₈Kutani va n'wi xeweta, va ku: “Xewani, Hosi ya Vayuda!” ₁₉Va n'wi ba nhloko hi nhonga, va n'wi tshwutela marha, va wa hi matsolo va n'wi nkhinsamela. ₂₀Kuteloko va hetile ku n'wi tseketsela, va n'wi hluvula xiambalo xo vangama xa xivunguvungu, va tlhela va n'wi ambexa swiambalo swa yena.

₂₁Va n'wi yisa ehandle ku ya n'wi vamba. Va hlangana na wanuna un'wana loyi a a ri karhi a hundza kwalaho a huma emasin'wini, kutani va n'wi sindzisa ku rhwala xihambano xa Yesu; wanuna loyi a a ri Simoni wa Kirene, tata wa Aleksandro na Rhufasi; ₂₂va yisa Yesu endhawini leyi va nge i Gologota, hileswaku “Ndhawu ya Pala”. ₂₃Va n'wi nyika vhinyo leyi nga pfanganyisiwa na murhi wa mirha; kambe a nga yi nwanga. ₂₄Hiloko va n'wi vamba, va avelana swiambalo swa yena hi ku hoxa vuhlolotwana, ku ta tiva leswi un'wana na un'wana a nga ta kuma swona. ₂₅A wu ri nkarhi wa 9 nimixo loko va n'wi vamba. ₂₆Papila ro tivisa nandzu wa yena a ri tsariwe marito lawa: “Hosi ya Vayuda.”

₂₇Va n'wi vamba ni swigevenga swimbirhi, xin'wana evokweni ra yena ra xinene, xin'wana eka lera ximatsi. [ ₂₈Hiloko ku hetiseka tsalwa leri nge: “Ú hlayiwile exikarhi ka swidyohi.”] ₂₉Vahundzi va ndlela va n'wi rhuketela, va hlakahla tinhloko va ku: “Ha! Wena la nhlanhlaka Tempele, u tlhela u yi pfuxa hi masiku manharhu, ₃₀tiponise ke, u xika exihambanweni!” ₃₁Hi mukhuva wolowo, na vona vaprista lavakulu swin'we ni vatsari va n'wi tseketsela va ku: “Munhu loyi ú ponisile van'wana, kambe yena wa tsandzeka ku tiponisa! ₃₂Mesiya Hosi ya Israele a a xike sweswi exihambanweni, leswaku hi swi vona, hi ta pfumela eka yena.” Lava nga vambiwa na yena, na vona a va n'wi sandza.

₃₃Loko ku fikile nkarhi wa 12 ninhlekanhi, munyama wu funengeta tiko hinkwaro, ku fikela nkarhi wa 3 ni ndzhenga. ₃₄Hi nkarhi wolowo wa ndzhenga, Yesu a huwelela hi rito leri tlakukeke a ku: “Eloyi, Eloyi, lama sabaktani?” hileswaku: “Xikwembu xanga, Xikwembu xanga, u ndzi tshikele yini?” ₃₅Van'wana lava a va ri kwalaho, loko va n'wi twa va ku: “Yingisani, ú vitana Eliya.” ₃₆Un'wana a tsutsuma, a ya peta xiponji endzeni ka ntsuvi, a xi tlhoma erihlangeni, a n'wi nyika leswaku a nwa, a ku: “Tshikani, hi ta vona loko kunene Eliya a ta ta, a ta n'wi hawula.” ₃₇Kavaloko Yesu a huwelela hi rito leri tlakukeke, a hlala a fa. ₃₈Kutani xisirhelelo xa Tempele xi handzuka hi le xikarhi, ku sukela ehenhla ku ya fikela ehansi.

₃₉Loko ndhuna ya dzana ra masocha leyi a yi yimile emahlweni ka yena, yi vonile hilaha a nga huwelela ni ku fa hakona, yi ku: “Hakunene munhu loyi a a ri N'wana wa Xikwembu.”

₄₀Vavasati na vona a va ri kona, va languta va ri kule; exikarhi ka vona a ku ri na Salome, na Mariya wa Magadala, na Mariya mana wa va Yakobo lontsongo na Yosi; ₄₁hi lava a va hamba va landza Yesu ni ku n'wi tirhela loko a ha ri Galeliya. A ku ri ni van'wana lavo tala lava tlhandlukeke na yena loko a ya eYerusalema.

₄₂Dyambu a ri ya eku peleni, kutani siku rero a ri ri Ravuntlhanu, ro lunghisa swa siku ra Savata. ₄₃Hikokwalaho, nkulukumba un'wana wa huvo, loyi a va ku i Yosefa wa Arimatiya, munhu wo fundzheka loyi na yena a a langutela Mfumo wa Xikwembu, a ta eka Pilato a kanye mbilu, a kombela ntsumbu wa Yesu. ₄₄Pilato a hlamala ku twa leswaku Yesu nakhale ú file. Hiloko a vitana ndhuna ya dzana ra masocha, a yi vutisa a ku: “I khale a file xana?” ₄₅Loko ndhuna ya dzana yi tiyise sweswo, a pfumelela Yosefa ku ya teka ntsumbu. ₄₆Yosefa a ya xava nceka wo saseka wo lahla ha wona; kutani a n'wi hawula, a n'wi phutsela ha wona, a n'wi veka esirheni leri kovotliweke eribyeni, kutani a vumbuluxa ribye ri pfala nomo wa sirha.

₄₇Kambe Mariya wa Magadala, na Mariya mana wa Yosi, a va languta laha a vekiwaka kona.