Marka 11

₁Loko va tshinelela Yerusalema ni miti ya Betefage na Betaniya, kusuhi ni Ntshava ya Mitlhwari, Yesu a hlawula vambirhi exikarhi ka vadyondzisiwa va yena, a va rhuma, ₂a ku: “Yanani emutini lowu vonakaka lahaya, kutani loko mi nghena ka wona, mi ta kuma ximbhongolwana lexi bohiweke, lexi nga si gadiwaka hi munhu; xi ntshunxeni, mi ta na xona haleno. ₃Loko munhu a mi vutisa a ku: ‘Mi endlela ku yini sweswo?’ mi ta ku: ‘Hosi ya xi lava; yi ta xi vuyisa sweswi.’ ”

₄Kutani va famba, va ya kuma ximbhongolwana xi ri handle, xi bohiwile enyangweni kusuhi ni ndlela, kutani va xi ntshunxa. ₅Van'wana lava a va yimile kwalaho, va ku ka vona: “Mi ntshunxela yini ximbhongolwana xexo ke?” ₆Vona va va hlamula hilaha Yesu a nga va lerisa hakona, kutani va va tshika. ₇Va ta na ximbhongolwana eka Yesu, kutani va kapeka tinguvu ta vona ehenhla ka xona, Yesu a xi gada.

₈Vanhu lavo tala va andlala tinguvu ta vona endleleni, van'wana va tshova swirhabyana leswi nga na matluka swa le nhoveni, va andlala endleleni. ₉Lava rhangeke mahlweni, ni lava landzelelaka, va huwelela, va ku:

₁₁Yesu a fika eYerusalema, a ya nghena eTempeleni, a rhendzeleka a ri karhi a languta hinkwaswo; kambe leswi a ri perile, a huma, a ya eBetaniya ni lava khume na vambirhi.

₁₂Hi siku leri tlhandlamaka loko va vuya hi le Betaniya, a twa ndlala. ₁₃Kutani a vona nkuwa lowu nga ni matluka a ha ri kulenyana; a hambuka ku ya kamba loko kumbexana a nga kuma xa nchumu eka wona, kambe loko a fika kona, a nga kumanga nchumu, loko ma nga ri matluka ntsena, hikuva a wu nga ri nkarhi wa makuwa. ₁₄Kutani a ku ka murhi lowu: “A ku nga ha vi na munhu la nga ta dya mihandzu ya wena ni siku ni rin'we!” Vadyondzisiwa va yena a va ri karhi va swi twa.

₁₅Kutani va fika eYerusalema. Kuteloko a nghenile exivaveni xa Tempele, a hlongola lava xavisaka ni lava xavaka kona, a wisetela matafula ya lava bindzurisaka mali, ni switshamu swa lava xavisaka matuva. ₁₆Naswona, a nga pfumelelanga munhu ku tsemakanya xivava xa Tempele, a rhwele xa nchumu. ₁₇Kutani a va dyondzisa, a ku: “Xana a ku tsariwanga leswaku:

₁₈Vaprista lavakulu ni vatsari va swi twa, kutani va lava hilaha va nga ta n'wi dlaya hakona; hikuva a va n'wi chava, hileswi ntshungu hinkwawo a wu hlamala dyondzo ya yena. ₁₉Kutani loko ri perile, Yesu ni vadyondzisiwa va huma emutini.

₂₀Nimixo loko va hundza kwalaho, va vona nkuwa wolowo wu omile ku sukela etimitswini. ₂₁Petro a tsundzuka leswi humeleleke, a ku ka Yesu: “Mufundhisi, vona, nkuwa lowu u nga wu rhuketela wu omile.” ₂₂Yesu a va hlamula, a ku: “Mi va ni ku pfumela eka Xikwembu! ₂₃Ndzi tiyisile ndzi ri ka n'wina, loko munhu a ku ka ntshava leyi: ‘Suka, u ya tihoxa elwandle’, a nga kanakani embilwini ya yena, kambe a pfumela leswaku leswi a swi vulaka swi ta endleka, ú ta endleriwa swona. ₂₄Hikokwalaho ndzi ri ka n'wina: Hinkwaswo leswi mi swi kombelaka hi ku khongela, pfumelani leswaku mi nyikiwile swona, kutani mi ta endleriwa swona. ₂₅Loko mi yima mi khongela, rivalelani loyi mi nga va ni mhaka na yena, leswaku na yena Tata wa n'wina la nge matilweni, a mi rivalela swidyoho swa n'wina.” [ ₂₆“Hikuva loko mi nga rivaleri van'wana, Tata wa n'wina la nga matilweni na yena a nga ka a nga mi rivaleri swidyoho swa n'wina!”]

₂₇Kutani va tlhela va vuyela Yerusalema; kakuloko Yesu a ri karhi a rhendzeleka ni xivava xa Tempele, vaprista lavakulu ni vatsari ni vakulukumba va ta ka yena ₂₈va ku: “Xana u endla swilo leswi hi matimba wahi ke? Xana i mani la nga ku nyika matimba ya ku endla swilo sweswo ke?” ₂₉Yesu a va hlamula a ku: “Ndzi ta mi vutisa xivutiso xin'we; loko mi ndzi hlamula xona, hi kona na mina ndzi nga ta mi byela lomu matimba lawa ndzi tirhaka ha wona, ma humaka kona. ₃₀Xana nkhuvulo wa Yohane a wu huma etilweni, kumbe eka vanhu ke? Ndzi hlamuleni.” ₃₁Vona va kanetana va ku: “Loko hi ku: ‘A wu huma etilweni’, ú ta ku: ‘Loko swi ri tano, hikwalaho ka yini mi nga pfumelanga eka yena ke?’ ₃₂Kumbe loko hi ku: ‘A wu huma eka vanhu’ ... (A va chava ntshungu; hikuva hinkwavo a va kholwa leswaku Yohane a a ri muprofeta wa xiviri.)” ₃₃Kutani va hlamula Yesu, va ku: “A hi swi tivi.” Hiloko Yesu u ku ka vona: “Na mina a ndzi nga mi byeli lomu matimba lawa ndzi tirhaka ha wona, ma humaka kona.”