Yoxuwa 16

₁Ndzilekana wa tiko leri va ka Yosefa va averiweke rona wu sukela enambyeni wa Yordani, kusuhi ni muti wa Yeriko, hi tlhelo ra le vuxeni bya swihlovo swa Yeriko, wu kongoma emananga. Ndzilekana lowu wu tlhandluka wu sukela eYeriko wu ya ta hi le magangeni, wu famba ku ya fika eBetele. ₂Ku suka eBetele, wu famba ku ya fika eLuzi, wu tsemakanya hi le Ataroti, yi nga ndhawu ya Vaaraki; ₃kutani wu rhelela wu ya endhawini ya Vayafeleti evupeladyambu, wu famba wu ya emutini wa Beta-Horoni-wa-le-nkoveni, kutani wu hundza wu ya eGezere, wu ya helela elwandle.

₄Va ka Yosefa, va nga va nyimba ya ka Manase ni va nyimba ya ka Efrayimi, va kumile ndzhaka ya vona.

₅Tindhawu ta va ka Efrayimi hi ku ya hi mindyangu ya vona hi leti: Evuxeni ndzilekana wa ndhawu leyi va ka Efrayimi va averiweke yona wu sukela le Ataroti-Adara, wu famba wu ya fika emutini wa Beta-Horoni-wa-le-gangeni. ₆Ku suka kona, ndzilekana wu kongoma elwandle. En'walungwini, ndzilekana i muti wa Mikimeta, kutani wu jika wu kongoma eTaana-Xilo evuxeni, wu hundza hi le vuxeni bya Yanowaka. ₇Ku suka eYanowaka wu rhelela wu kongoma le Ataroti ni le Naara, wu hundza hi le Yeriko, wu ya helela enambyeni wa Yordani. ₈Ku suka eTapuwaka, ndzilekana wu kongoma exinkobyaneni xa Kana evupeladyambu, wu ya helela elwandle. Leyi hi yona ndzhaka ya va ka Efrayimi hi ku ya hi mindyangu ya vona. ₉Tlhandlakambirhi, ku ni miti yin'wana leyi hlawuriweke exikarhi ka ndzhaka ya va ka Manase. Miti leyi hinkwayo yi nyikiwile va ka Efrayimi, ni swimitana swa yona. ₁₀Hambiswiritano, va ka Efrayimi a va hlongolanga Vakanana lava a va tshama eGezere, kutani ni namuntlha Vakanana va ha tshama exikarhi ka va ka Efrayimi, kambe va hundzukile mahlonga lama tirhaka mintirho leyo tika.