Yobo 8

₂“Marito ya wena i xidzedze lexi onhaka;

u ta vulavurisa sweswo ku fikela rini ke?

₃Xana Xikwembu-xa-matimba-hinkwawo xi tshama xi tlula nawu,

xi tshika ni ku endla leswi lulameke xana?

₄Vana va wena va ta va va xi dyoherile,

hikokwalaho xi va tshikile va fela swidyoho swa vona!

₅Kambe wena, yana eka Xikwembu, u ya kombela leswaku xi ku twela vusiwana,

hikuva xi ni matimba hinkwawo.

₆Loko hakunene u ri munhu wo lulama la tshembekaka,

xi nge hlweli ku tikomba, xi ku lwela,

xi ku tlherisela exiyin'weni xa wena xa khale;

₇kutani rifuwo ra wena lerintshwa,

ri ta tlula ngopfu lera khale hi ku tala.

₈“Vutisa timhaka eka lava khale,

u kambisisa vutlhari bya vatatana,

₉hikuva hina vanhu va manguva lawa, a hi tivi nchumu,

ku hanya ka hina laha misaveni i papanyana leri hundzaka.

₁₀Lava khale a va ku dyondzise,

va ku byela leswi va swi twisisaka.

₁₁Va ni xivuriso lexi nge:

‘Majekejeke ma nge mili erikhwarheni,

endhawini yo kala mati, nhlanga wu nge tsaki!’

₁₂Swimila leswi hakunene swi hambana na swin'wana,

swi oma swa ha ku rhumbuka, no tsemiwa swi nga si tsemiwa.

₁₃Swi tano ni vanhu lava rivalaka Xikwembu, lava va xi fularhelaka:

Swilo leswi va swi tshembaka swi hatla swi nyamalala.

₁₄Va xongotela hi swinhongana,

va tisirhelela hi swisaka swa mapume;

₁₅va tiseketela hi makhumbi ya tindlu ta vona, kambe wona ma wa,

va ma khoma, kambe ma mbundzumuka!

₁₆Lava sandzaka Xikwembu va rhanga va tsaka,

va fana ni murhi wo phaka marhavi entangeni hi nkarhi wa mpfula;

₁₇timitsu ta wona ti nga tlhava erikhwarheni,

ti nga pandza ni maribye lamakulu;

₁₈kambe siku vasandzi lava va susiwaka etikweni ra vona,

varikwavo va ta va landzula va ku: ‘A hi si tshama hi mi vona!’

₁₉Ku tsaka ka vanhu volavo ku herisa sweswo,

va tsuvuriwa emisaveni, ndhawu ya vona yi tekiwa hi van'wana.

₂₀“Tsundzuka wena Yobo, Xikwembu a xi cukumeti munhu wo tshembeka,

kambe vadyohi, xi ala ku va pfuna.

₂₁Loko a ri wena, xa ha ta ku yimbelerisa tinsimu,

minkulungwana ya ha ta huma enon'weni wa wena.

₂₂Lava va ku vengaka va ta khoma hi tingana,

miti ya lavo homboloka yi ta nyamalala.”