Yobo ú ri, ú boxile mhaka ya yena
1“Ndzi endlile ntwanano ni mahlo ya mina,
ndzi ku, a ndzi nga ha languti vanhwanyana.
2Xana Xikwembu xa le matilweni vanhu xi va hakerise ku yini,
Lowa-matimba-hinkwawo ú va avele yini ke?
3Xana ku herisiwa a hi ka lavo homboloka xana?
Makhombo, a hi ya lava endlaka leswo biha ke?
4Xana Xikwembu a xi voni tindlela ta mina,
magoza ya mina, a xi ma hlayeli xana?
5“Loko ndzi khomile ndlela ya vukanganyisi,
ni loko ndzi tsutsumele swa vuxisi,
6Xikwembu a xi ndzi pime exikalweni lexi heleleke,
xi ta swi vona leswaku ndzi hava nandzu.
7Loko ndzo tshuka ndzi hambukile endleleni,
ndzi yengiwa hi mahlo, ndzi tithyakisa ni mavoko,
8leswi ndzi swi byaleke, a swi dyiwe hi van'wana,
kumbe swi tsuvuriwa kunene!
9“Loko ndzi lo tshuka ndzi yiviwa mbilu hi nsati wa un'wana,
ni loko ndzi lo ya n'wi hlometela enyangweni ya muti wa ka vona,
10nsati wa mina a a ye a ya kandza kun'wana,
kumbe a ya tilavela swigangu.
11Hakunene vuoswi i manyala,
i nandzu lowu fanelaka ku tsemiwa ehubyeni.
12I ndzilo lowu dlayaka, lowu yisaka ekheleni ra vafi!
Wu nga hisa ni tinhundzu ta mina hinkwato.
13“Loko ndzi tshama ndzi bakanya xirilo xa nandza wa mina wa xinuna kumbe wa xisati,
siku va ndzi mangalelaka ehubyeni,
14xana ndzi ta endla yini loko Xikwembu xi nghena emhakeni ke?
Loko xi kambisisa mhaka ya kona, ndzi ta xi hlamula yini ke?
15Xana la nga ndzi vumba ekhwirini ra manana, a hi yena la nga vumba vona ke?
Loyi a hi tumbuluxeke hinkwerhu, a hi Xikwembu xin'we ke?
16“Xana ndzi tshama ndzi ala ku pfuna xisiwana,
kumbe ndzi tshika noni yi pfimba ni mahlo hi ku rila ke?
17Xana ndzi lo dya ndzi ri ndzexe,
ndzi tsona vana vo pfumala vatswari ke?
18E-e! Ndzi vile tatana eka vona, va kulele laha ka mina;
ndzi va hlayisile ni loko ndza ha ri lontshwa.
19Munhu la dlayaka hi xirhami, ndzi n'wi tsone rini xiambalo,
ndzi arile rini ku kufumeta vapfumari ke?
20Vanhu vo tano a va nga tshiki ku ndzi tlangela,
hikuva ndzi va funengetile hi voya bya tinyimpfu ta mina.
21Xana ndzi tshama ndzi ba xisiwana ehubyeni,
loko ndzi titwa ndzi seketeriwa ke?
22Loko ndzi lo dyohisa leswi,
swi nga antswa ndzi tshoveka mavoko kumbe ma tsemiwa hi le makatleni!
23Hakunene ndzi chava ngopfu ku biwa hi Xikwembu,
emahlweni ka vukulu bya xona, ndzi nge yimi.
24“Xana ndzi tshembile nsuku ku tlula mpimo,
ndzi wu vula khokholo ra mina ke?
25Xana ndzi lo tikurisa hi rifuwo ra mina,
ndzi tsakela hinkwaswo leswi ndzi nga tikumela swona xana?
26Xana ndzi tshama ndzi khongela dyambu loko ri huma,
kumbe n'weti loko wu ba mahlampfu ke?
27A ndzi lavanga ku swi tirhela hambi exihundleni,
kumbe ku ntswontswa mavoko ndzi swi gandzela!
28Lowu a wu ta va nandzu lowu fanelaka ku tsemiwa ehubyeni,
hikuva a ndzi ta va ndzi dyoherile Xikwembu xa le matilweni.
29“Xana ndza tsaka loko valala va mina va herisiwa,
kumbe loko va wela emakhombyeni xana?
30E-e! A ndzi dyohanga hi nomo wa mina,
a ndzi vulanga ndzi ku: ‘A va fe!’
31Malandza ya mina a ma si tshama ma etlela
ma nga dyanga nchumu.
32Valuveri a va etlelanga emagondzweni,
ndzi rhurherile vahundzi va ndlela emutini wa mina.
33Xana ndzi fihlele vanhu swidyoho swa mina,
ndzi tihlayisela swona exifuveni ke?
34E-e, a ndzi vanga munhu wo chava milomo ya varikwavo,
kumbe ku soriwa hi va ka vona,
la miyelaka a chava ku famba-famba.
35“Mawaku lava yingisiwaka!
Ndzi andlarile mhaka ya mina, Lowa-matimba-hinkwawo a a ndzi hlamule!
36La ndzi mangalelaka, a a tsale milandzu ya kona,
ndzi ta yi pakatsa emakatleni,
ndzi yi ambala enhlokweni
kukota harhi ya vuhosi.
37Ndzi ta tihlamulela emahlweni ka Xikwembu ehenhla ka mintirho ya mina yo lulama,
ndzi yima emahlweni ka xona onge ndzi hosi.
38“Loko nsimu ya mina yi vilela hi maendlele ya mina,
ni loko misava ya kona yi tala hi mihloti,
39kumbe loko ndzi dyile mihandzu ya yona mahala,
ndzi dlaya vinyi va yona va xiviri,
40a yi mirise mahlwehlwe ematshan'wini ya mavele,
kumbe mfava ematshan'wini ya maxalana!”
Marito ya Yobo ma helela kwala.
