Yobo 28

₁Hakunene, ku kona laha silivhere yi kumekaka kona,

yi kona ndhawu leyi nsuku wu hlunguhliwaka eka yona.

₂Nsimbhi yi ceriwa emisaveni,

koporo va yi n'okisa yi huma emaribyeni.

₃Vanhu va hlongola munyama hi rivoni,

va cela va ya fika exivindzini xa misava.

₄Va kovotla muhocho emananga,

laha vahundzi va ndlela va nga fikiki,

va tiboha kona hi tintambhu va dewula kunene, kule ni miti ya vanhu.

₅Endzeni ka misava leyi hi kumaka swakudya eka yona,

va pandza maribye hi ndzilo.

₆Endhawini yoleyo, ku ni maribye ya nkoka ya “Safiri”,

ritshuri ra kona ri tele hi nsuku.

₇Ndlela yo ya kona, makoti a ma yi tivi,

ni mawukuwuku a ma si yi vona.

₈Swiharhi leswi dlayaka a swi famba-fambi endleleni yoleyo,

ni tinghala a ti nyarhuli kusuhi na yona.

₉Munhu ú faya maribye ya kona layo nonon'hwa,

a pandza ni tintshava ku ya fika emasungulweni ya tona.

₁₀Ú cela mugodi ematambheni,

mahlo ya yena ma ri karhi ma lava-lava swilo swa nkoka.

₁₁Ú siva swinambyana endzeni ka misava leswaku swi nga ha khuluki,

rifuwo leri a ri tumberile kona, ú ri humesela erivaleni.

₁₂Vutlhari byona hi nga byi kuma kwihi,

hi kwihi laha ku twisisa ku tshamaka kona ke?

₁₃Vanhu a va tivi nxavo wa vutlhari,

naswona a byi kumeki evanhwini.

₁₄Swidziva leswikulu swi ri: “Vutlhari a byi le ka hina”,

na wona malwandle ma ri: “Ni laha ka hina, a byi kona!”

₁₅Byi nge xaviwi hi nsuku,

vanhu va nge pimi silivhere va tikumela byona.

₁₆Byi ni nkoka ku tlula nsuku wa le Ofiri,

byi tlula ni maribye yo saseka ya “Onikisi” ni ya “Safiri”.

₁₇Swilo swo vangama ni swo vonikela,

hambi swingwavila swa nsuku lowo tenga, swi nge ringani na byona;

₁₈a ha ha vuli tinkatla kumbe swibya swa “Kristala”!

Xinkwamana xa vutlhari xi ni risima ku tlula vuhlalu lebyi sasekeke.

₁₉Nxavo wa byona wu hundza wa maribye ya “Topazi” ya le Etiyopiya,

hambi wu ri nsuku lowo tenga, wu nge fiki eka byona.

₂₀Xana vutlhari byi huma kwihi ke,

hi kwihi laha ku twisisa ku tshamaka kona xana?

₂₁Hinkwavo lava hanyaka emisaveni, bya va tumbelela,

byi tumbelerile ni tinyanyana.

₂₂Hambi khele ra vafi, na rona rifu hi roxe,

swi ri: “Hi lo twa ta byona hi mahungundlela.”

₂₃I Xikwembu ntsena xi tivaka ndlela ya vutlhari,

ni ndhawu leyi byi tshamaka eka yona,

₂₄hikuva mahlo ya xona ma tlhava ni le vugimamusi,

xi tiva hinkwaswo leswi nga misaveni.

₂₅Loko xi hungisa moya hi matimba,

ni loko xi pima vukulu bya lwandle,

₂₆loko xi vekela mpfula emilawu ya yona,

ni loko xi boxa ndlela ya rihati emapapeni,

₂₇hi kona xi vonaka vutlhari xi byi kamba,

xi byi tiyisa ni ku byi twarisa.

₂₈Kutani xi vulavula na vanhu xi ku:

“Ku chava N'wini wa hinkwaswo, hi byona vutlhari;

ku hambana ni leswo biha hi kona ku twisisa!”