Yobo 24

₁“Hikwalaho ka yini Xikwembu-xa-matimba-hinkwawo xi nga tivekeli minkarhi yo ba vadyohi,

ni lava va xi tivaka va siveriwa ha yini ku vona minkarhi ya kona xana?

₂Lavo homboloka va tekela varikwavo tindhawu ta vona,

va yiva mintlhambi, va tirisela yona.

₃Va byisa mbhongolo ya n'wana wo pfumala vatswari,

ni homu ya noni, va yi khomela milandzu.

₄Swisiwana swi boheka ku va nyizela ndlela,

vapfumari hinkwavo etikweni va va chava, va tumbela.

₅Vapfumari lava va fana ni timangwa,

va ya tilavela swakudya emananga,

va ya hlota swiharhi enhoveni,

va endlela ku phamela vana va vona.

₆Va tikhela guxe emasin'wini,

ensin'wini ya vhinya ya lowo homboloka vo khwaja kunene.

₇Va etlela va nga funengelanga nchumu,

hi xixika, va dlawa hi xirhami.

₈Va neriwa hi mpfula va ri etintshaveni,

tindlu ta vona i mabako.

₉Xihlangi xo feriwa hi tata wa xona xi susiwa veleni ra mana wa xona,

vapfumari va tekeriwa swilo swo khomela milandzu ya vona.

₁₀Va famba-famba va nga ambalanga nchumu,

va rhwexiwa swirhundzu, va ri ni ndlala,

₁₁va cheleta mirhi ya mitlhwari ninhlekanhi,

va pyanya ni swichocho ensin'wini ya vhinya, kambe va fa hi torha.

₁₂Emitini ya vona, lava dlawaka va cema,

lava tlhaviwaka va kombela ku pfuniwa,

kambe Xikwembu a xi na mhaka ni maxangu lawa.”

“Ku ni vanhu lava vengaka ku vonakala,

va nga lavi ku famba erivaleni;

a va twanani ni swa nhlekanhi.

₁₄Mudlayi ú pfuka hi mahlamba-ndlopfu,

a ya dlaya vapfumari ni swisiwana;

nivusiku, a hi ku yiva ka yena!

₁₅Na yena muoswi, ú tirha loko ri perile,

ú ri: ‘Ku hava la ndzi vonaka!’

a tisiva ni xikandza.

₁₆Makhamba ma tshova tindlu exinyamini,

loko ri xa, ma tumbela,

a ma twanani ni ku vonakala.

₁₇Munyama wo chavisa, hinkwavo va wu vula ‘nhlekanhi’,

exinyamini xo khwìxìì va titwa va tshamisekile.

₁₈“Vanhu vo homboloka i mavivi yo khukhuriwa hi mati;

rifuwo ra vona ri rhukaniwile etikweni,

emasin'wini ya vona ya vhinya, ku hava vatirhi.

₁₉Enkarhini wa dyandza, mumu wu herisa mati emilambyeni;

vadyohi va nyamalarisa sweswo loko va ya exivandleni xa vafi;

₂₀va rivariwa hi vamana wa vona,

swivungu swi va dya swi tiphina,

ku hava loyi a va tsundzukaka.

Hakunene vanhu lavo homboloka

va tshoviwa ku fana ni rihunyi.

₂₁“Vanhu lava va xanisa wansati la nga mhika,

noni, va ala ku yi pfuna.

₂₂Kambe hi matimba ya xona, Xikwembu xi hlongola lava tiyeke;

loko xi pfuka, a va ha tshembi ku hanya.

₂₃Xi nga va tshika va titwa va hlayisekile,

kambe xi le ku xiyaxiyeni ka tindlela ta vona.

₂₄Va kateka nkarhinyana, kutani va nyamalala;

va vuna kukota xiluva lexi faka,

kumbe min'oko ya maxalana leyi tsemiweke.

₂₅Xana a swi tano ke? I mani la nga ndzi vulaka muhembi,

a kaneta leswi ndzi swi vulaka xana?”