Yobo 12

₂“Swa vonaka, mo vulavula onge mi tiko hinkwaro,

vutlhari byi ta fa siku mi faka!

₃Kambe na mina ndzi ni ku twisisa kukota n'wina,

a mi ndzi tluli hi vutivi;

leswi mi swi vuleke, swi tiva hi mani na mani.

₄Khale a ndzi khongela Xikwembu, kutani xi ndzi hlamula;

kambe sweswi ndzi hundzuke xihlekiso eka vanakulorhi,

mina munhu wo lulama wo pfumala nandzu, ndza hlekuriwa.

₅Vanhu lava tsakeke va ri, ku xaniseka i xisolo,

kutani va ba munhu loyi a nga kusuhi ni ku wa.

₆Emitini ya swigevenga, ku tsakiwile;

lava rhuketelaka Xikwembu, va tshamisekile,

va ri, xona xi le mavokweni ya vona.

₇“Kambe wena nakulorhi, vutisa swiharhi, swi ta ku dyondzisa;

na tona tinyanyana ti ta ku byela ntiyiso.

₈Vulavula na misava, yi ta ku komba ndlela,

na tona tinhlampfi ti ta ku tisela mahungu.

₉Swivumbiwa leswi hinkwaswo swi tiva mhaka leyi:

HOSI Xikwembu hi xona xi nga endla hinkwaswo hi matimba ya xona.

₁₀Hi xona xi hlayisaka vutomi bya leswi hanyaka hinkwaswo,

munhu un'wana ni un'wana ú hanyisiwa hi xona.

₁₁Ku ni xivuriso lexi nge:

‘Swakudya swi nantswa hi nomo, marito ma hleriwa hi tindleve;

₁₂vutlhari byi na lavo dyuhala, lava khale hi vona va twisisaka.’

₁₃Kasi ntiyiso hi lowu: Vutlhari ni matimba swi na Xikwembu,

hi xona xi tsundzuxaka vanhu, xi va nyikaka ku twisisa.

₁₄“Leswi Xikwembu xi swi wiseke, swi nge pfuxiwi hi munhu;

munhu loyi xi nga n'wi pfalela ekhotsweni, a nge pfuleriwi hi un'wana.

₁₅Loko xi yimisa mpfula, milambu ya phya;

loko xi nisa ndhambi, misava ya onhaka.

₁₆Matimba ni vutlhari swi na xona;

muxisi ni muxisiwa va tiva hi xona.

₁₇Tindhuna xi ti tekela vutlhari,

vaavanyisi xi va hundzula xihlekiso.

₁₈Xi herisa matimba ya vafumi,

xi va ambexa swiambalo swa mahlonga.

₁₉Vaprista xi va tekela vutlhari,

lavo chaviseka xa va tsongahata.

₂₀Xi miyeta vanhu lava tshembiwaka,

lava dyuhaleke xi va pfilunganya miehleketo.

₂₁Vafumi va matiko xi va vangela tingana,

xi tekela tinhenha matimba ya tona.

₂₂Xi paluxa leswi nga ndzeni ka swidziva leswikulu,

laha a ku ri ni xinyami xo chavisa, xi tisa ku vonakala.

₂₃Xi kurisa matiko, xi tlhela xi ma lovisa,

xi hlengeleta vamatiko, xi tlhela xi va hangalasa.

₂₄Varhangeri va matiko, xi va dlaya miehleketo,

xi va chochoverisa emananga va nga kumi ndlela;

₂₅va gugurhuteka exinyamini, va nga voningi hi nchumu,

xi va dedelekisa kukota swidakwa.”