Xikwembu xi tiva leswi swa ha taka
1N'wina va ka Yakobo, rhiyani ndleve, ndzi vula n'wina mi thyiweke vito ra Israele,
n'wina mi humaka erixakeni ra Yuda:
Mi tiyisa leswi mi swi hlambanyaka hi vito ra HOSI Xikwembu xa Israele,
mi tivula vanhu va xona, kambe swilo leswi
a mi swi vuli swi huma etimbilwini ta n'wina.
2Mi tidzunisa, mi ku mi vaaki va muti lowo hlawuleka,
mi vula leswaku mi tiseketela hi Xikwembu xa Israele,
lexi vito ra xona ri nga HOSI ya matimba hinkwawo.
3HOSI Xikwembu xi ri:
“Swilo leswi humeleleke, ndzi mi tivisile swona khale,
ndzi swi vurile hi ndzexe, hi nomo wa mina,
kutani hi ku copeta ka tihlo, ndzi endla leswaku swi humelela.
4Ndzi swi tivile leswaku mi vanhu vo ka tindleve,
va tinhamu to sihalala ku fana ni nsimbhi,
va tinhloko to oma kukota ribye.
5Hikokwalaho, swilo leswi swi nga ta humelela, ndzi mi tivisile swona khale,
ndzi mi byerile swona swa ha ri kule,
hikuva a mi ta ku: ‘Leswi swi endliwile hi swikwembu swa hina leswi hi tivatleleke ni ku tivumbela swona;
hi swona swi leriseke leswaku swi humelela!’
6“Mi swi twile leswi ndzi swi vuleke, vonani, hinkwaswo swi humelerile;
kutani n'wina, swi twariseni!
Kambe namuntlha, ndzi mi tivisa swilo leswintshwa,
leswi a mi nga swi tivi, hikuva a swa ha tumberile.
7Swa ha ku tumbuluxiwa sweswi-sweswi, a hi swa khale,
namuntlha hi ko mi sungulaka ku swi twa,
hikuva a ndzi nga lavi leswaku mi ku:
‘Hi swi tivile khale!’
8Swilo leswi, a mi si tshama mi swi twa, ni ku swi tiva a mi swi tivi,
ku sukela khale a swi fikanga etindleveni ta n'wina,
hikuva a ndzi swi tiva leswaku a mi tshembekanga;
ku sukela loko mi velekiwile, mi tiviwa mi ri lava tiarisaka.
9“Eku kariheni ka mina, ndzi tikhomile, ndzi mi lehisela mbilu,
leswaku vito ra mina ri dzunisiwa, ni leswaku ndzi nga mi herisi.
10Vonani, ndzi mi kamberile hi ku mi hoxa endzilweni wa maxangu,
ku fana ni loko va basisa silivhere hi ku yi n'okisa, kambe ndzi kuma leswaku a mi basanga.
11Ndzi endlile sweswo hikwalaho ka vito ra mina ntsena,
hikuva a ndzi nga lavi leswaku ri onhiwa.
Ndzi nga ka ndzi nga pfumeli
leswaku ku dzuneka ka mina ku nyikiwa un'wana.
12“Ndzi yingiseni, n'wina va ka Yakobo,
ndzi vula n'wina Vaisraele, lava ndzi va vitaneke.
Hi mina Loyi-a-nga-kona,
loyi a a ri kona eku sunguleni,
loyi a nga ta va kona hilaha ku nga heriki.
13Masungulo ya misava ma endliwile hi voko ra mina,
hi mina ndzi vambeke matilo;
loko ndzi swi vitana,
swi hatla swi hlengeletana hinkwaswo.
14“Hlengeletanani hinkwenu, mi ndzi yingisa:
Exikarhi ka swikwembu, ku hava lexi tiviseke
leswaku munhu loyi ndzi n'wi rhandzaka mina HOSI,
hi yena la nga ta hetisa makungu ya mina hi tlhelo ra muti wa Babilona, a hlasela Vakalediya.
15Hi mina ntsena ndzi tiviseke timhaka leti, ndzi tlhela ndzi vitana munhu loyi;
ú tisiwile hi mina, kutani ú ta humelela eka leswi a swi endlaka.
16Tshinelani ekusuhi, ndzi ta mi byela leswi:
Ku sukela eku sunguleni, a ndzi si tshama ndzi vulavulela exihundleni,
swilo hinkwaswo swi humelela mina ndzi ri kona.”
HOSI N'wini wa hinkwaswo ú ndzi nyikile Moya wa yena,
a ndzi rhuma.
Xikwembu xi ta kutsula vanhu va xona
17Mukutsuri wa n'wina, HOSI Xikwembu,
Muhlawuleki wa Israele, ú vurisa sweswo, ú ri:
“Hi mina HOSI Xikwembu xa n'wina,
lexi xi mi dyondzisaka ku endla leswi swi nga ta mi vuyerisa,
ndzi mi komba ni ndlela leyi mi fanelaka ku hanya ha yona.
18Loko a mi lo yingisa milawu ya mina,
ingi mi kumile ku rhula loku fanaka ni mati lama khulukaka,
ku lulama ka n'wina a ku ta ndlandlamuka kukota magandlati elwandle.
19Vana va n'wina a va ta va va tele kukota sava,
hambi va ri vatukulu va n'wina, a va ta fana ni swiribyana swa sava hi ku tala;
a swi nga ta endleka ni siku ni rin'we
leswaku va herisiwa, ku sala ku pfumala na un'we loyi ndzi nga ta va tsundzuka ha yena.”
20Sukani eBabilona, mi huma etikweni ra Vakalediya,
banani minkulungwana mi twarisa mhaka leyi,
yi tiviseni ku ya fika evugimamusi, mi ku:
“HOSI Xikwembu xi kutsurile va ka Yakobo malandza ya xona!”
21Vanhu lava HOSI Xikwembu xi va fambiseke emananga,
a va karhatiwanga hi torha,
hikuva xi va humeserile mati eribyeni;
xi ri pandzile, kutani mati ma huma hi matimba.
22HOSI Xikwembu xi ri: “Vanhu lavo homboloka,
va nge pfuki ni siku ni rin'we va kumile ku rhula!”
