Esaya 46

₁Bele na Nebo, swikwembu swa le Babilona, swa nkhinsama, swi lava ku wa;

swifaniso leswi swi rhwariwa hi tihomu ni timbhongolo.

Leswi Vababilona a va swi tlakula, swi hundzuke ndzhwalo

lowu rhwariwaka hi swifuwo leswi karheleke.

₂Swikwembu leswi swa nkhinsama, swi lava ku wa,

swi tsandzeka ku tiponisa,

swi ya evukhumbini hi xiviri xa swona!

₃HOSI Xikwembu xi ri:

“N'wina va ka Yakobo, ndzi lombeni tindleve,

ndzi vula n'wina hinkwenu masalela ya Vaisraele:

Hi mina ndzi mi rhwaleke ku sukela loko mi velekiwile,

ku sukela loko mi vile kona, hi mina ndzi mi tlakuleke.

₄Ndzi ta va kona mi kondza mi dyuhala,

ndzi ta mi tlakula mi kondza mi basa tinhloko;

mi endliwile hi mina, kutani ndzi ta mi bebula,

ndzi ta mi tlakula, ndzi mi ponisa.

₅“Xana ú kona munhu loyi mi nga ndzi fanisaka na yena,

kumbe loyi mi nga ndzi ringanisaka na yena xana?

Ndzi ringana na mani, naswona ndzi fana na mani?

₆Vanhu va humesa nsuku lowo tala eminkwameni ya vona,

va pima na silivhere hi swikalu,

va swi yisa eka mufuri wa nsuku, va n'wi thola leswaku a va endlela xikwembu ha swona,

kutani va nkhinsama va xi gandzela.

₇Xikwembu xa kona, va xi tlakula va xi tlhandleka emakatleni, va xi rhwala,

kutani va ya xi veka endhawini ya xona, xi yimisa sweswo,

a xi pfi xi suka laha xi vekiweke kona.

Loko munhu a yisa xirilo eka xona, a xi hlamuli,

naswona a xi n'wi ponisi emakhombyeni.

₈“N'wina va-ma-ka-tindleve, anakanyani timhaka leti, mi ti veka embilwini,

mi nga tshuki mi ti rivala.

₉Tsundzukani ni leswi humeleleke eminkarhini ya khale;

Xikwembu hi mina, ku hava xin'wana,

mina ndzi Xikwembu, a ku na loyi a fanaka na mina.

₁₀Mina ndzi vula ka ha ri ku sunguleni, hilaha swilo swi nga ta humelela hakona,

swilo leswi swi nga si humelelaka, ndzi swi tivisile khale;

ndzi vurile ndzi ku: ‘Makungu ya mina ma tiyile,

hinkwaswo leswi ndzi tiyimiseleke ku swi endla, ndzi ta swi endla!’

₁₁Ndzi vitanile koti ri huma evuxeni,

a nga wanuna wo huma etikweni ra le kule, loyi a telaka ku hetisa makungu ya mina.

Leswi ndzi swi vulaka, ndzi ta endla leswaku swi humelela,

ndzi bohile makungu, kutani ndzi ta ma hetisisa.

₁₂“Ndzi lombeni tindleve, n'wina vanhu lava tinonon'hwisaka,

n'wina mi ehleketaka leswaku ku ntshunxiwa ka ha ri kule:

₁₃Siku leri ndzi nga ta mi ntshunxa ha rona, ndzi ri tshinete kusuhi, a ra ha ri kule;

ri nge hlweli ku fika, siku leri ndzi nga ta mi ponisa ha rona;

muti wa Siyoni wu ta kuma ku pona,

tiko ra Israele, ndzi ta ri nyika ku dzuneka ka mina.”