Esaya 45

₁HOSI Xikwembu xi vurisa sweswo hi tlhelo ra Korexe,

xi ri xi n'wi hlawurile, xi n'wi khoma hi voko,

leswaku xi ta n'wi hlurisa matiko,

a tekela tihosi matlhari ya tona;

xi ta n'wi pfulela timbanti ta miti,

leswaku tinyangwa ti tshama ti pfulekile.

₂Eka Korexe, HOSI Xikwembu xi ri:

“Ndzi ta ku rhangela emahlweni,

ndzi mbundzumuxa tintshava;

timbanti ta koporo, ndzi ta ti faya,

ndzi tshovelela ni tinsimbhi to goga ha tona.

₃Ndzi ta ku nyika xuma lexi tumbetiweke,

lexi fihliweke swinene,

kutani u ta tiva leswaku hi mina HOSI Xikwembu xa Israele,

lexi xi ku vitaneke hi vito.

₄Ndzi ku vitanile hi vito ra wena,

leswaku u ta pfuna va ka Yakobo malandza ya mina,

ndzi vula Vaisraele vahlawuriwa vanga;

hambileswi u nga ndzi tiviki,

ndzi ku nyikile xivongo lexikulu.

₅HOSI Xikwembu hi mina ntsena, a ku na un'wana,

ehandle ka mina, a ku na xikwembu xin'wana.

Ndzi ta ku nyika matimba, hambileswi u nga ndzi tiviki.

₆Kutani ku sukela evuxeni ku ya fika evupeladyambu,

vanhu hinkwavo va ta swi tiva leswaku hi mina ntsena ndzi nga HOSI Xikwembu,

ku hava un'wana.

₇Hi mina ndzi tisaka ku vonakala, ndzi vanga ni xinyami,

ndzi tisa minkateko, ndzi vanga ni mahlomulo,

leswi hinkwaswo swi endliwa hi mina HOSI.

₈“N'wina matilo, nisani mberha ya leswo lulama,

mapapa a ma swi chululele ehansi.

Wena misava, pfuleka leswaku ku ta huma leswi ponisaka,

ni leswo lulama swi ta mila eka wena;

swilo leswi swi endliwile hi mina HOSI.”

₉Ú ni khombo, munhu loyi a kanetanaka ni muendli wa yena!

Mi tshama mi vona mbita yi kanetana ni muvumbi wa yona?

Xana vumba byi nga vutisa loyi a byi pfuvaka, byi ku:

“U lava ku vumba yini?”

Xana mbita yi nga byela muvumbi wa yona leswaku a nga na vutivi ke?

₁₀Xana n'wana a nga vutisa vatswari va yena, a ku:

“Hikwalaho ka yini mi ndzi velekile ndzi ri leswi ndzi nga xiswona, xana?”

₁₁HOSI Xikwembu, xona Muhlawuleki,

ni Muvumbi wa Israele, xi vurisa sweswo xi ri:

“Xana mi ndzi tengisela yini eka leswi khumbaka mina ni vana va mina,

naswona xana mi ni fanelo yo ndzi lerisa entirhweni wa mina, xana?

₁₂Hi mina ndzi endleke misava,

ndzi tumbuluxa ni vanhu lava tshamaka eka yona,

matilo ndzi ma vambile hi mavoko ya mina,

hambi swi ri leswi nga tilweni, swi lawuriwa hi mina hinkwaswo.

₁₃Korexe ú hlohleteriwile hi mina leswaku a ta tirha leswo lulama,

ndzi ta n'wi basisela tindlela hinkwato leti a nga ta famba ha tona;

hi yena la nga ta pfuxa muti wa mina wa Yerusalema,

a ntshunxa ni vanhu va mina evukhumbini;

a nga tirheli ku hakeriwa kumbe ku nkhensiwa.”

HOSI Xikwembu xa matimba hinkwawo xi vurisa sweswo.

₁₄HOSI Xikwembu xi vurisa sweswo xi ri:

“Rifuwo ra tiko ra Egipta, ni mabindzu ya vanhu va le Etiyopiya,

ni ya vanhu lavo leha va le Seba,

swi ta tisiwa eka n'wina, swi va swa n'wina;

vanhu lava va ta mi landza,

va ta ta va bohiwile, va fika va mi nkhinsamela, va mi khongela va ku:

‘Xikwembu, hi lexi xi nga na n'wina, a ku na xin'wana,

ehandle ka xona, xikwembu xin'wana ku hava.’ ”

₁₅Hakunene wena Xikwembu xa Vaisraele, wena muponisi wa vona,

u Xikwembu lexi titumbetaka!

₁₆Hinkwavo lava endlaka swifaniso swa swikwembu,

va ta khomiwa hi tingana, va hlangana tinhloko;

va ta famba swin'we hinkwavo, va pfilunganile miehleketo.

₁₇Kambe HOSI Xikwembu xi ta ponisa Vaisraele hilaha ku nga heriki,

va nga ka va nga khomiwi hi tingana, kumbe ku hlanganisiwa tinhloko ni siku ni rin'we.

₁₈HOSI Xikwembu xi tumbuluxile matilo,

hi xona xi nga Xikwembu hakunene!

Xi vumbile ni misava,

xi yi endla yi ri leyi tiyeke,

leyi vanhu va kotaka ku tshama eka yona:

A xi yi vumbelanga ku va leyi nga pfuniki nchumu.

Kutani xi vurisa sweswo xi ri:

“Hi mina HOSI Xikwembu, ku hava un'wana!

₁₉A ndzi vulavulanga exihundleni,

kumbe exivandleni lexi nga ni xinyami;

a ndzi byelanga va ka Yakobo, ndzi ku:

‘Ndzi laveni laha ku nga riki na nchumu.’

Mina HOSI ndzi vulavula ntiyiso,

ndzi tivisa vanhu leswi nga swona.”

₂₀HOSI Xikwembu xi ri:

“Hlengeletanani, n'wina mi poneke ematikweni,

tanani, mi tshinela kusuhi.

Vanhu lava famba-fambaka ni swifaniso swo vatliwa swa swikwembu swa vona,

lava khongelaka swikwembu leswi nga kotiki ku ponisa,

a va tivi nchumu!

₂₁Boxani mhaka mi yi andlala,

kambe rhangani mi twanana swinene!

I mani la tiviseke khale leswi nga ta humelela,

i mani la swi vuleke swa ha ri kule, xana?

Xana a hi mina HOSI ke?

Ehandle ka mina, a ku na xikwembu xin'wana,

hi mina ntsena ndzi nga Xikwembu

xo lulama, lexi ponisaka.

₂₂“Hundzulukelani eka mina leswaku mi ta ponisiwa,

n'wina mi akeke emisaveni hinkwayo,

hikuva Xikwembu hi mina ntsena, a ku na xin'wana.

₂₃Leswi ndzi swi vulaka, swi tiyile,

swi nga ka swi nga hundzuluxiwi.

Ndzi tibohile hi ku hlambanya, ndzi ku:

‘Vanhu hinkwavo va ta ndzi nkhinsamela,

hinkwavo va ta tiboha ku ndzi tirhela.’

₂₄Va ta vulavula hi mina, va ku:

‘La nyikaka matimba ni ku hlula, i HOSI Xikwembu ntsena!’ ”

Hinkwavo lava a va lwa na HOSI Xikwembu,

va ta ta eka xona va ri ni tingana.

₂₅Loko va ri Vaisraele, xi ta va lwela hinkwavo,

kutani vona va ta xi dzunisa.