Esaya 42

“Vonani nandza wa mina loyi ndzi n'wi seketelaka,

muhlawuriwa wa mina loyi ndzi n'wi tsakelaka ngopfu;

ndzi cherile Moya wa mina ehenhla ka yena,

kutani ú ta tisa ku lulama ematikweni.

₂A nga ka a nga huweleli a ba huwa,

naswona a nge rhendzeleki na magondzo, a ri karhi a vulavula.

₃Rihlanga leri khinyekeke, a nga ka a nga ri tshovi,

ni rivoni leri ngo keti-keti, a nge ri timi;

ú ta va la tshembekeke,

loyi a tisaka ku lulama.

₄A nga ka a nga heli matimba a lan'wa;

ú ta kondza a tisa ku lulama emisaveni.

Vanhu va matiko ya le kule va le ku languteleni

ka leswi a nga ta va dyondzisa swona.”

₅HOSI Xikwembu, xona Xikwembu lexi tumbuluxeke matilo xi ma vamba,

xi andlala ni misava ni leswi milaka eka yona,

xona lexi endleke leswaku vanhu lava tshamaka eka yona

va va ni vutomi, va hefemula,

xi byela nandza wa xona, xi ri:

₆“Hi mina HOSI Xikwembu!

Ndzi ku vitanerile ku ta tirha leswo lulama,

ndzi ku khomile hi voko ndzi ku hlayisa;

ndzi ta tirhisa wena ku endla ntwanano ni vanhu hinkwavo,

hi wena u nga ta tisa ku vonakala ematikweni.

₇U ta pfula mahlo ya lava nga voniki,

lava pfaleriweke ekhotsweni, u ta va humesa;

u ta va susa exinyamini lexi va tshamaka eka xona.

₈Mina, ndzi HOSI Xikwembu, hi rona vito ra mina,

ku hava xikwembu xin'wana lexi ndzi nga xi nyikaka ku dzuneka ka mina;

swifaniso leswi vatliweke swa swikwembu, ndzi nge swi nyiki ku twala ka mina.

₉Vona, leswa khale swi hundzile,

sweswi ndzi lava ku tisa leswintshwa;

ndzi ku tivisa swona swi nga si humelela.”

₁₀Sumani risimu lerintshwa, mi yimbelelela HOSI Xikwembu;

n'wina vanhu va misava hinkwayo, xi twariseni!

Xi dzuniseni n'wina mi fambaka elwandle,

na n'wina swivumbiwa hinkwaswo leswi nge ka rona;

yimbelelani na n'wina mi tshamaka ematikweni ya le kule.

₁₁Hambi va ri va le mananga ni va le mitini ya kona, a va huwelele va ba huwa,

va nga vanhu lava tshamaka emitini ya Kedari;

lava akeke emutini wa Sela a va yimbelele va tsakile,

a va yime tinhlohlorhini ta tintshava va ba minkulungwana.

₁₂Na n'wina mi akeke ematikweni ya le kule,

dzunisani HOSI Xikwembu, mi xi twarisa.

₁₃HOSI Xikwembu xi fana ni nhenha leyi humaka nyimpi,

xi kombisa vukari bya xona kukota nghwazi;

xa huwelela xi ba huwa leyikulu,

xi komba matimba ya xona emahlweni ka valala va xona.

₁₄HOSI Xikwembu xi ri:

“Ndzi tikhomile ku ringana,

i khale ndzi miyerile, ndzi nga vuli nchumu!

Sweswi ndzi ta ba huwa kukota wansati la nga ku tintshunxeni,

ndzi ta hefemuteka, ndzi talelwa.

₁₅Ndzi ta mbundzumuxa tintshava ni switsunga,

ndzi omisa swimila swa kona hinkwaswo;

milambu ndzi ta yi hundzula swihlale,

ndzi ta phyisa ni swidziva.

₁₆Vanhu lavo ka va nga voni lava,

ndzi ta va fambisa hi ndlela leyi va nga yi tiviki,

ndzi ta va tisa hi mabudula

lawa va nga si tshamaka va famba ha wona;

xinyami lexi nga mahlweni ka vona ndzi ta xi hundzula ku vonakala,

tindhawu leti nga fambekiki ti ta va rivala.

Swilo leswi, ndzi ta swi endla hinkwaswo,

a ndzi nga siyi na xin'we xa swona.

₁₇Lava tshembaka swifaniso leswi vatliweke,

vona lava byelaka swifaniso leswi vumbiweke va ku:

‘Hi n'wina swikwembu swa hina’,

va ta hlongoriwa, va tlhela va ri ni tingana letikulu.”

₁₈HOSI Xikwembu xi ri:

“N'wina vanhu vo pfumala tindleve, yingisani,

pfulani mahlo mi languta, n'wina vanhu vo ka va nga voni.

₁₉Xana ú kona munhu wo fe mahlo kumbe tindleve

kukota nandza wa mina loyi ndzi n'wi rhumaka, xana?

Ndzi ri xana ú kona loyi a feke mahlo ni tindleve

ku fana ni nandza loyi mina HOSI Xikwembu ndzi tihlawuleleke yena, xana?

₂₀N'wina Vaisraele, mi vona swilo swo tala, kambe a swi vuli nchumu eka n'wina;

tindleve ta n'wina a ti pfalekanga,

kambe a mi twi nchumu.”

₂₁HOSI Xikwembu xi kombisile vukulu ni ku dzuneka ka Nawu wa xona,

xi swi endlile hi ku tsaka, hikuva i Xikwembu lexi lulameke.

₂₂Kambe Vaisraele va phangheriwile swilo swa vona,

hinkwavo va hoxiwile emakheleni ni ku pfaleriwa emakhotsweni;

va khometeriwile, ku pfumala ni wo va lamulela,

valala va phanghelana hi vona, ku hava na munhu loyi a nge: “Va tshikenee!”

₂₃Xana exikarhi ka n'wina, va kona vanhu lava eminkarhini leyi taka va nga ta rhiya ndleve,

va yingisa va ri karhi va xiyaxiya, xana?

₂₄Xana loyi a nyiketeke va ka Yakobo emavokweni ya vaphanghi i mani xana?

Ndzi ri i mani loyi a nyiketeke Vaisraele eka swigevenga, xana?

A hi un'wana, loko a nga ri HOSI Xikwembu lexi hi xi dyoheleke,

hi hambuka endleleni ya xona, hi ala ni ku yingisa milawu ya xona.

₂₅Hikokwalaho, HOSI Xikwembu xi chululerile vukari bya xona lebyi pfurhaka ehenhla ka Vaisraele,

xi va vangele ni tinyimpi leto chavisa;

vukari bya HOSI Xikwembu byi va rhendzerile, byi va hisa, kambe a va twisisanga nchumu,

va tshwile, kambe a swi va dyondzisanga nchumu!