Esaya 41

“N'wina vanhu va matiko ya le kule, miyelani mi ndzi yingisa.

Pfuxetani matimba ya n'wina;

humelani erivaleni, mi vulavula,

tanani hi ta kanela mhaka.

₂“Xana munhu loyi wa le vuxeni, loyi minkarhi hinkwayo a hlulaka,

ú rhumile hi mani xana?

I mani loyi a n'wi nyikeke matimba yo hlula matiko,

a kandziyela ni tihosi ehansi, xana?

Hi fumu ra yena, ú endla leswaku vanhu va sala va fana ni ritshuri,

a va hahisa hi vurha, tanihi mavivi.

₃Ú va hlasela a hundza hi ku olova,

milenge ya yena yi nga khumbi ni le hansi.

₄Xana i mani loyi a endleke leswaku swilo swi va hi ndlela leyi, xana?

Loyi a vonaka leswaku vanhu va va kona emisaveni minkarhi hinkwayo,

hi mina HOSI, loyi a a ri kona eku sunguleni,

loyi a nga ta va kona eku heteleleni.

₅“Vanhu va le matikweni ya le kule, va swi vonile, kutani va chava;

misava hinkwayo ya ninginika, vanhu va hlengeletana, va ta.

₆Un'wana ni un'wana ú pfuna mutirhi-kulobye,

va khongotelana, va ku: ‘Khomani swi tiya!’

₇Muvatli ú tiyisa mufuri wa swa nsuku,

loyi a tirhaka hi hamula, ú tiyisa loyi a baka xigala-nyundzu,

a ku: ‘U swi tsotsosele swinene!’

kutani va swi belela hi swipikiri, leswaku swi nga ha susiwi.”

₈“Loko mi ri n'wina Vaisraele, malandza ya mina,

ndzi vula n'wina va ka Yakobo,

vatukulu va munghana wa mina Abrahama,

ndzi mi hlawurile.

₉Ndzi mi tekile emakun'wini ya misava,

ndzi mi vitanile mi ri etindhawini ta le kule,

ndzi ku: ‘Mi malandza ya mina,

ndzi mi hlawurile, ndzi nga ka ndzi nga mi cukumeti!’

₁₀Mi nga chavi, hikuva ndzi na n'wina,

mi nga rhurhumeli, hikuva ndzi Xikwembu xa n'wina;

ndzi ta mi tiyisa, ndzi mi pfuna,

ndzi mi hlulela valala hi voko ra mina.

₁₁“Hinkwavo lava va mi hlundzukeleke,

va ta tsongahatiwa, va khomisiwa tingana;

vanhu lava lwaka na n'wina

a va nga ha vi kona, va ta hela va ku bì!

₁₂Lava holovaka na n'wina,

mi ta va lava, mi va pfumala,

lava va mi hlaselaka,

a va nga ha vi kona, va ta nyamalala,

₁₃hikuva mina HOSI Xikwembu xa n'wina,

ndzi mi khome hi voko,

hi mina ndzi nge: ‘Mi nga chavi,

ndzi ta mi pfuna.’ ”

₁₄HOSI Xikwembu xi vurisa sweswo, xi ri:

“Hambileswi mi solekeke, mi nga chavi n'wina va ka Yakobo,

ndzi vula n'wina Vaisraele!

Mina ndzi ta mi pfuna;

mukutsuri wa n'wina, hi mina Muhlawuleki wa Israele.

₁₅Vonani, ndzi ta mi endla xileyi lexintshwa xo hula ha xona,

lexi nga ni meno layo tontswa;

mi ta hula tintshava mi ti cakanyetela,

swintshabyana, mi ta swi siya swi fana ni mungu;

₁₆mi ta swi peperha, moya wu swi hahisa,

xihuhuri xi ta swi hangalasa,

kutani mi ta kuma ku tsaka eka mina HOSI,

mi va mi dzuneka eka mina Muhlawuleki wa Israele.

₁₇“Loko swisiwana ni vapfumari va omelwa hi mhaka ya torha,

kutani va famba va lava mati va ma pfumala,

mina HOSI Xikwembu ndzi ta hlamula swikhongelo swa vona,

ndzi nga ka ndzi nga va tshiki, mina Xikwembu xa Israele.

₁₈Ndzi ta boxa milambu ya mati eswitsungeni leswi omeke,

ndzi boxa ni swihlovo eminkoveni;

mananga ndzi ta ma hundzula swidziva,

ndzi khulukisa ni swinambyana emakwandzasini.

₁₉Ndzi ta mirisa mirhi ya kedari emananga,

ni minga, ni mirhi ya mirta, ni mitlhwari;

laha ku omeke, ndzi ta humesa mirhi ya kipresi,

ni minkuhlu, ni miphayini.

₂₀Loko vanhu va swi vona, va ta tiva

leswaku loyi a swi endleke hi mina HOSI,

va ta tshama va ri karhi va swi ehleketa, va twisisa

leswaku hi mina Muhlawuleki wa Israele loyi a swi tumbuluxeke.”

₂₁HOSI Xikwembu, xona mufumi wa va ka Yakobo, xi vurisa sweswo, xi ri:

“Hlamuselani mhaka ya n'wina, n'wina swikwembu swa matiko,

tanani ni vumbhoni bya n'wina!

₂₂Tanani mi ta hi byela leswi nga ta humelela;

hi byeleni leswi nga tshama swi humelela, ni leswaku a swi vula yini,

hi ta kota ku swi twisisa, hi tiva ni leswi swi heriseke xiswona;

vhumbhani ni leswi nga ta humelela eminkarhini leyi taka.

₂₃Hi byeleni leswaku ku ta humelela yini,

kutani hi ta swi tiva leswaku hakunene mi swikwembu;

endlani xilo xin'wana, ku nga va xo saseka kumbe xo biha,

hi ta mi hlamala, hi mi chava.

₂₄Vonani, a mo va nchumu,

a ku na lexi mi nga xi tirhaka,

lava va mi namarhelaka,

va ndzi nyangatsa.

₂₅“Ndzi vitanile munhu un'wana, a huma en'walungwini, kutani ú tile;

ndzi n'wi vitanile a ri evuxeni, kutani ú ta ndzi khongela;

ú ta kandziyela tihosi ku fana ni ndzhope,

kumbe vumba lebyi pfuviwaka hi muvumbi wa timbita.

₂₆Xana exikarhi ka swikwembu swa vamatiko,

xi kona lexi vhumbheke timhaka leti xana, leswaku hi ta ku: ‘A xi nga hembi!’?

Ku hava lexi vhumbheke kumbe ku tivisa nchumu,

a ku na munhu loyi a tshamaka a swi twa swi vulavula.

₂₇Hi mina ntsena ndzi tiviseke va le Siyoni timhaka leti, ti nga si humelela,

ndzi rhumerile mahungu lamanene eYerusalema.

₂₈Kambe loko ndzi xiyaxiya exikarhi ka swikwembunyana leswi,

a ndzi kumi na xin'we lexi nga vaka ni rito;

loko ndzi swi vutisa swivutiso, a swi hlamuri.

₂₉Vonani, hinkwaswo a swi pfuni nchumu,

a ku na ntirho lowu swi wu endlaka,

swifaniso leswi vatliweke leswi, a hi nchumu!”