Xikwembu xi ta katekisa tiko ra xona, xi vuyisa ni lava nga vukhumbini
1Mananga ni tindhawu leti omeke swi ta tsaka,
makwandzasi ma ta ba minkulungwana,
ku ta mila swiluva swa nhova, swi baleka swinene,
2kutani rikhwarha ri ta tsaka ri yimbelela;
ri ta saseka ku fana ni ntshava ya Lebanoni,
ri phatima ku fana ni ntshava ya Karmele ni masimu ya le Xaroni.
Kutani vanhu hinkwavo va ta vona ku dzuneka ka HOSI Xikwembu,
ni vukulukumba bya xona, Xikwembu xa hina.
3Lava va nga ha kotiki ku tirha nchumu, va nyikeni matimba,
tiyisani ni lava va nga ha laviki ku famba-famba.
4Khongotelani lava nga ku kanakaneni, mi ku:
“Tiyani, mi nga chavi!
Vonani, Xikwembu xa n'wina xi ta ta xi ta mi rihisela eka valala va n'wina,
xi ta mi lwela, xi mi ponisa!”
5Enkarhini wolowo, mahlo ya lava nga voniki ma ta pfuleka,
ni lava nga twiki va ta pfuleka tindleve,
6swilema swi ta tlula-tlula ku fana ni timbavala,
timbheveve ti ta ba minkulungwana ya ntsako,
emananga ku ta baleka mati,
ni le makwandzasini ku ta khuluka milambu;
7laha a ku hisa ngopfu, ku ta va ni tiva ra mati,
ndhawu yo oma ngopfu yi ta humesa swihlovo;
lomu mahlolwa a ma rhendzeleka-rhendzeleka ni ku wisa kona,
byanyi byi ta hundzuka tinhlanga ni majekejeke.
8Etikweni ku ta va na gondzo lerikulu,
leri nga ta thyiwa
Gondzo-ro-Hlawuleka;
vanhu lava nga tengangiki va nga ka va nga fambi ha rona,
ri ta va ra lavo tenga ntsena,
la fambaka ha rona, hambi a nga tivi ndlela, a nga ka a nga lahleki.
9Gondzo leri a ri nga vi na tinghala,
swiharhi leswi dlayaka a swi nga yi eka rona,
ni xin'we xa swona a xi nga tshineli,
eka rona ku ta famba vanhu lava HOSI Xikwembu xi va kutsuleke.
10Loko HOSI Xikwembu xi va kutsurile, va ta vuya;
va ta kongoma emutini wa Siyoni va ri karhi va ba minkulungwana;
ntsako lowu nga heriki wu ta va khubumeta,
va ta tshama va ri karhi va hlekelela va tsakile,
maxangu ni ku konya swi ta nyamalala.
