Esaya 1

₂N'wina matilo, yingisani, na wena misava, rhiya ndleve!

HOSI Xikwembu xa vulavula, xi ri:

“Ndzi wundlile vana ndzi va kurisa,

kambe va ndzi hundzukerile.

₃Homu yi tiva n'wini wa yona,

ni mbhongolo yi tiva lomu mufuwi wa yona a yi phamelaka kona;

kasi Vaisraele, vona vanhu va mina,

a va ndzi tivi, no twisisa a va twisisi.”

₄Yo, tiko ra vadyohi, vanhu lava nga lo pyì, hi vubihi,

rixaka ra mikhuva leyo biha, leri hanyaka hi manyala ntsena!

Va tshikile HOSI Xikwembu,

va sandza Muhlawuleki wa Israele,

va tlhela va n'wi fularhela.

₅Leswi mi yaka emahlweni mi tiarisa, xana ma ha ta biwa hi kwihi,

hikuva nhloko hinkwayo ya vava,

ni matimba a ma ha ri na wona.

₆Ku sukela eswikunwanini ku ya fika enhlokweni,

ku hava laha ku nga vaviki;

miri hinkwawo i mafelangati ni swilondza,

a wu si hlantswiwa kumbe ku boheleriwa;

wu tele maphokolo lama humaka ngati,

ni murhi a wu cheriwanga.

₇Tiko ra n'wina i marhumbi ntsena,

miti yi hisiwile hi ndzilo;

vanhu va le handle va mi tekele tiko,

mi ri karhi mi swi vona;

tiko i marhumbi ntsena,

ri herisiwile hi vanhu vambe.

₈Muti wa Siyoni wu sale erivaleni,

wu fana ni ntsonga wa murindzi ensin'wini ya vhinya,

wu fana ni dladla ensin'wini ya marhakarhaka,

wonge wo va muti lowu rhendzeriweke hi valala.

₉Loko HOSI ya matimba hinkwawo

a yi nga siyanga van'wana va hina va hanya,

tiko ra hina a ri ta sala ri fana na Sodoma,

a ri ta va ri hundzuke Gomora.

₁₀N'wina tihosi leti fanaka ni ta le Sodoma,

yingisani rito ra HOSI Xikwembu!

Na n'wina vanhu lava fanaka ni va le Gomora,

rhiyani ndleve mi yingisa swiletelo swa Xikwembu xa hina!

₁₁HOSI Xikwembu xi ri:

“Xana leswi mi ndzi humeselaka magandzelo layo tala,

mi ri ndzi endla yini ha wona, xana?

Mina ndzi karhele ku hiseriwa tinyimpfu,

ni mafurha ya swifuwo leswi noneke;

hambi yi ri ngati ya tinkuzi, ni ya swinyimpfana, ni ya swiphongho,

a ya ha ndzi tsakisi.

₁₂Mi byele hi mani ku humesa swilo leswi,

loko mi ta emahlweni ka mina ku ta ndzi gandzela, xana?

Mo tela ku tshumbutela swivava swa mina ntsena.

₁₃Mi nga ha tisi tinyiko ta n'wina to ka ti nga pfuni nchumu,

ni mirhi ya n'wina ra risuna ya ndzi nyenyetsa;

minkhuvo ya n'wina ya ku tshama ka n'weti ni ya Savata ni ku rhambana ka n'wina,

ndzi nga ka ndzi nga swi tiyiseli, hikuva mi hlanganisa vubihi ni tinhlengeletano to hlawuleka.

₁₄Minkhuvo ya n'wina ya ku tshama ka n'weti, ni leyin'wana leyi vekiweke,

ndza yi venga;

yi hundzukile ndzhwalo eka mina,

kutani ndzi karhele ku wu rhwala.

₁₅Loko mi tshambuluta mavoko ya n'wina,

ndzi tisiva mahlo ndzi languta etlhelo;

a ndzi nga mi yingisi,

hambi mo endla swikhongelo leswo tala,

hikuva mavoko ya n'wina ma tele ngati.

₁₆Hlambani, mi basa;

mintirho ya n'wina leyo biha,

yi suseni emahlweni ka mina;

mi nga ha tlheli mi dyoha,

₁₇dyondzani ku endla leswinene,

mi tikarhatela leswo lulama;

tshinyani lava tshikelelaka van'wana,

mi sirhelela lava pfumalaka vatswari

mi lwela ni tinoni.”

₁₈HOSI Xikwembu xi ri:

“Tanani hi kanela mhaka swin'we:

Hambiloko swidyoho swa n'wina swi mi tshwukisile mi fana ni xivunguvungu,

ndzi ta mi basisa, mi fana ni gamboko;

ni loko swi mi tshwukisile mi fana ni ngati,

ndzi ta mi basisa mi fana ni voya lebyi basisiweke bya tinyimpfu.

₁₉Loko mi tikarhata mi ndzi yingisa,

misava yi ta mi humesela leswinene;

₂₀kambe loko mi tiarisa mi ndzi fularhela,

mi ta herisiwa hi fumu.

Ndzi vulavurile, mina HOSI!”

₂₁Muti wo tshembeka, wo lulama ngopfu,

sweswi wu hundzuke nghwavava!

Muti lowu a wu tshama lavo lulama

sweswi i kaya ra vadlayi!

₂₂We Yerusalema, khale a wu fana ni silivhere,

kambe sweswi a wa ha ri nchumu;

a wu nandziha kukota vhinyo,

kambe sweswi wa phyama.

₂₃Varhangeri va wena va tiarisa ngopfu,

va twanana ni makhamba;

hinkwavo va tsakela ku xaviwa,

va rhandza ngopfu tinyiko;

a va lweli lava pfumalaka vatswari,

ni nkarhi wo sirhelela tinoni, a va na wona.

“Khombo! Ndzi ta chululela vukari bya mina ehenhla ka lava va ndzi vengaka;

lava lwaka na mina, ndzi ta tirihisela eka vona.

₂₅Ndzi ta mi hundzukela, ndzi mi ba,

ndzi mi basisa ku fana ni loko va basisa silivhere hi ndzilo,

thyaka leri mi nga na rona, ndzi ta ri susa hinkwaro.

₂₆Ndzi ta tlhela ndzi mi nyika vaavanyisi vo fana ni lava khale,

ni vatsundzuxi vo fana ni lavo sungula,

kutani mi ta vuriwa muti lowo lulama,

lowu tshembekeke.”

₂₇Muti wa Siyoni wu ta kutsuriwa loko wu endla leswo lulama

ni loko vaaki va wona va tisola, va endla leswi lulameke.

₂₈Loko va ri vadyohi ni lava fularheleke Xikwembu,

vona va ta dlayiwa swin'we;

lava tshikaka HOSI Xikwembu,

va ta heriseriwa makumu.

₂₉Mi ta khomiwa hi tingana hikwalaho ka mirhi ya minkuhlu leyi a yi mi tsakisa,

mintanga leyi mi nga lo tihlawulela yona yi ta mi nyumisa ngopfu.

₃₀Mi ta fana ni murhi wa nkuhlu

lowu matluka ya wona ma vunaka,

mi ta kota ntanga lowu pfumalaka mati.

₃₁Munhu wa matimba ú ta fana ni mavivi,

swiendlo swa yena swi ta fana ni nhlahle ya ndzilo:

Ú ta tshwa ni swiendlo swa yena,

ku pfumaleka ni mutimeli.