Va ka Efrayimi va tivangele rifu
1Khale loko va ka Efrayimi va vulavula, a va rhurhumerisa vanhu;
a va chaviseka exikarhi ka Vaisraele,
kambe sweswi va wele enandzwini wo gandzela Baali, va tivangela rifu.
2Ku dyoha ka vona ku ya ku nyanya:
Va n'okisa silivhere ya vona, va tivumbela swikwembu swa swifaniso;
swifaniso leswi, va swi endla hi vukheta,
hinkwaswo swi vumbiwa hi lava tivaka maendlele ya kona.
Kutani van'wana va vulavula ha vona, va ku:
“Vanhu lava va nga eku humeseni ka gandzelo,
va ntswontswa rhole!”
3Hikokwalaho, va ta fana ni hunguva nimixo,
kumbe mberha leyi hatlisaka ku dzudzeka;
va ta fana ni mungu lowu hahisiwaka hi moya exivuyeni,
kumbe musi lowu tuvikaka wu huma endlwini.
4Ku sukela etikweni ra Egipta,
mina HOSI ndzi vile Xikwembu xa n'wina;
a mi na xin'wana Xikwembu ehandle ka mina,
ehandle ka mina ku hava loyi a nga mi pfunaka.
5Hi mina ndzi mi hlayiseke emananga,
etikweni leri omeke.
6Kambe loko va fikile endhawini leyi noneke, va dya va xurha,
kutani eku xurheni ka vona, va tikurisa;
hiloko va ndzi rivala;
7hikokwalaho, ndzi ta va tela ku fana ni nghala,
ndzi va tumbelela endleleni ku fana ni yingwe.
8Ndzi ta va bvanganyeta ku fana ni ntswele ya xinkankanka leyi yiveriweke vana va yona,
ndzi va phatlulela swifuva,
ndzi va pfotlosela ku fana ni nghala ya nkati,
ndzi va handzulela ku fana ni xivandzana.
9N'wina vanhu va tiko ra Israele, ndzi ta mi herisa mi ku bi!
Mi ta lamuleriwa hi mani xana?
10Xana hosi leyi nga ta mi ponisa yi kwihi,
ni varhangeri lava nga ta mi biyelela, va kwihi xana?
Ndzi vula vona lava mi nga te:
“Hi nyike hosi ni varhangeri!”
11Ndzi mi nyikile tihosi hi ku hlundzuka,
kutani ndzi tlhela ndzi ti susa, loko mi ndzi karihisile.
12Manyala ya va ka Efrayimi ma bohiwile hi xikatsa,
swidyoho swa vona swi lemuriwile enguleni.
13Nkarhi wa vona wa ku velekiwa wu fikile,
kambe vona va fana ni n'wana wo ka a nga tlharihanga,
loyi a alaka ku huma ekhwirini.
14Xana ndzi nga va kutsula ematimbeni ya xivandla xa vafi xana?
Xana ndzi nga va ponisa eka rifu xana?
We rifu, mintungu ya wena yi kwihi,
we xivandla xa vafi, ndzhombo wa wena wu kwihi ke?
Sweswi a ndza ha ri na ku twela vusiwana.
15Hambi va nga tsaka ku fana ni mavele ya khava,
moya wa le vuxeni wa HOSI Xikwembu wu ta hunga wu huma emananga;
swihlovo swa vona swi ta phya,
swinambyana swa vona swi ta oma;
moya lowu wu ta herisa
swilo swa vona hinkwaswo swa nkoka.
16Va le Samariya va ta fela swidyoho swa vona,
hikuva va fularherile Xikwembu xa vona;
va ta dlayiwa hi banga,
vana va vona va ta phyandlaseriwa,
vavasati lava tikeke va ta handzuriwa makhwiri.
