Rirhandzu ra Xikwembu eka vanhu va xona
1Israele ndzi n'wi rhandzile loko a ha ri n'wana,
ndzi vitanile n'wananga a huma Egipta.
2Loko ndzi va vitana, vona vo ala, va ndzi fularhela;
va ya emahlweni va humesela Baali emagandzelo,
va hisela swikwembu swa hava emirhi ya risuna.
3Va ka Efrayimi va dyondzisiwile hi mina ku famba,
hi mina a ndzi va tlakula;
kambe sweswi a va ha tsundzuki
leswaku va hanyisiwile hi mina.
4Ndzi va fambisile hi moya wa ntwelavusiwana ni tintswalo,
kutani eka vona ndzi hundzukile mupfuni
loyi a va vevukiselaka mpingu;
ndzi titsongahatile ndzi ta eka vona,
ndzi ta va phamela swakudya.
5Va ta tlhelela etikweni ra Egipta,
kutani va ta fumiwa hi hosi ya Vaasiriya,
hikuva va arile ku vuyela eka mina.
6Banga ri ta rhendzeleka ni miti ya vona,
ri ta pulukanya timhandze etinyangweni ta miti ya vona,
ri va dungadunga emakhokholweni ya vona.
7Vanhu va mina va ni ntolovelo wa ku ndzi fularhela,
hikokwalaho va rhwexiwile mpingu,
ku hava loyi a nga ta va rhula wona.
8Xana ndzi nga swi kotisa ku yini ku mi tshika n'wina va ka Efrayimi xana?
Xana ndzi nga mi nyiketa eka van'wana n'wina Vaisraele xana?
Xana ndzi nga mi tshika ku fana ni muti wa Adama,
kumbe ku mi endla leswi ndzi swi endleke va le Seboyimi, xana?
Sweswi mbilu ya mina yi wile,
ndzi tele tintswalo ni rirhandzu.
9Ndzi ta hambana ni ku hlundzuka ka mina lokukulu,
a ndzi nga ha engeti ndzi herisa va ka Efrayimi,
hikuva mina ndzi Xikwembu, a ndzi munhu;
mina la kwetsimeke, ndzi le xikarhi ka n'wina,
a ndzi nga ti ndzi ta mi herisa.
10Va ta landzelela HOSI Xikwembu,
xi ri karhi xi bonga ku fana ni nghala;
kutani loko vanhu va xona va twa ku bonga ka xona,
va ta vuya hi ku rhurhumela va huma evupeladyambu;
11va ta vuya hi ku rhurhumela ku fana ni tinyanyana, va huma etikweni ra Egipta,
va ta vuya hi le tikweni ra Asiriya, va fana ni matuva.
HOSI Xikwembu xi vula sweswo xi ri:
“Mina ndzi ta va tlherisela emitini ya vona.”
Mavunwa ya va ka Efrayimi
12Va ka Efrayimi va ndzi rhendzerile hi mavunwa,
vanhu va tiko ra Israele va ndzi rhendzerile hi vumbabva;
kambe vanhu va Yuda vona va ha famba etindleleni ta Xikwembu,
va ha tshembekile eka Lowo kwetsima.
