Ezekiele 43

₁Kutani mupimi a ndzi yisa enyangweni leyi langutaka evuxeni. ₂Kutani ndzi vona ku vonakala ka Xikwembu xa Israele, ku ta hi le vuxeni; ku vulavula ka xona a ku fana ni mpfumawulo wa magandlati ya le lwandle, naswona ku vonakala ka xona a ku voninga misava hinkwayo. ₃Xivono lexi a xi fana ni lexi ndzi kombiweke xona, siku Xikwembu xi teke ku ta herisa muti wa Yerusalema; naswona a xi fana ni xivono lexi ndzi nga kombiwa xona eribuweni ra nambu wa Kebara; kutani ndzi wela hansi hi mombo. ₄Ku dzuneka ka HOSI Xikwembu ku fika ku nghena eTempeleni hi nyangwa leyi langutaka evuxeni. ₅Kutani Moya wu ndzi tlakula, wu ndzi tisa exivandleni xa le ndzeni emahlweni ka Tempele, kutani ndzi vona Tempele hinkwayo yi tele hi ku dzuneka ka HOSI Xikwembu.

₆Loko mupimi a ha yimile kusuhi na mina, ndzi twa rito ra un'wana la vulavulaka na mina a ri endzeni ka Tempele, ₇a ku: “We Ezekiele, tiva leswaku xiluvelo xa mina, ndzi xi vekile exivandleni xexo; hi kona laha ndzi kandziyaka kona. Ndzi ta tshama exikarhi ka Vaisraele hilaha ku nga heriki; hikokwalaho Vaisraele ni tihosi ta vona a va nga ha nyamisi vito ra mina hi ku gandzela swikwembu swa hava kumbe hi ku lahla varhangeri va vona exivandleni lexi. ₈Va akile tindlu ta vona ni muti wa vona wa ntsindza kusuhi ngopfu ni Tempele ya mina; ho hambanisiwa hi khumbinyana ntsena! Va nyamisile vito ra mina hi ku endla swa manyala, kutani ndzi va herisile eku hlundzukeni ka mina. ₉Loko Vaisraele va hambana ni vukhongeri bya vona bya hava, ni loko va tshika ku lahla tihosi ta vona kwala Tempeleni, ndzi ta tshama exikarhi ka vona hilaha ku nga heriki.

₁₀“Kutani wena Ezekiele, u ta komba Vaisraele leswaku Tempele yi yimise ku yini, kutani va ta khomiwa hi tingana hikwalaho ka swidyoho swa vona, loko va ta va va kambisisile maakele ya yona. ₁₁Siku va tisolaka, va tshika hinkwaswo leswi a va swi endla khale, u ta va komba xivumbeko xa Tempele, ni maakele ya yona, ni tinyangwa ta yona leti vanhu va nghenaka ni ku huma ha tona, ni mimpimo ya yona hinkwayo; u ta va komba ni milawu leyi tirhisiwaka eka yona, ni swiletelo swa kona hinkwaswo, kutani u ta swi tsala va ri karhi va ku vona; hi ndlela leyi, va ta hlayisa xiyimo xa yona hinkwaxo ni swiletelo swa kona hinkwaswo, va landzelela swona. ₁₂Nawu wa Tempele hi lowu: Ndhawu ya yona hinkwayo ehenhla ka ntshava, a yi ve leyi hlawulekeke swinene, matlhelo hinkwawo. Lowu hi wona nawu wa Tempele!”

₁₃Loko alitari yi pimiwa hi rihlanga leri tirhisiweke eku pimeni ka Tempele, a yi komba mimpimo leyi: Masungulo ya yona a ma vonaka ma humile 50 cm ku ya henhla, kutani a ma endla yinhla leyi anameke 50 cm ku ya endzeni; yinhla ya kona a yi ri ni nkomo lowu leheke 25 cm ku ya henhla, lowu endlaka nkonya matlhelo hinkwawo ya alitari. Kutani ku sukela kwalaho masungulweni, alitari a yi ri ni xivumbeko lexi ku ya henhla: ₁₄Xiphemu xo sungula xa yona a xi lehile 1 m ku ya henhla, xi hela hi ku endla yinhla nakambe leyi anameke 50 cm ku ya endzeni. Kutani ku sukela kwalaho a ku ri ni xiphemu xa vumbirhi xa alitari lexi leheke 2 m ku ya henhla, ku tlhela ku va ni yinhla leyi anameke 50 cm ku ya endzeni. ₁₅Kutani xiphemu xo hetelela a xi ri xitiko xa alitari, na xona xi lehile 2 m ku ya henhla, xi ri ni timhondzo ta mune etikonweni ta xona. ₁₆Xitiko lexi xa alitari a xi ri ni matlhelo ya mune yo ringana, ma lehile 6 m. ₁₇Yinhla yo hetelela leyi anameke 50 cm ku ya endzeni laha xitiko xi sungulaka kona, na yona a yi ri ni matlhelo ya mune yo ringana, ma lehile 7 m; naswona yinhla ya kona a yi ri ni nkomo lowu leheke 25 cm ku ya henhla, lowu endlaka nkonya matlhelo hinkwawo ya alitari. Xo hetelela: A ku ri ni swikhandziyo swa alitari, swi languta evuxeni.

₁₈Kutani Xikwembu xi ku ka mina: “We Ezekiele, tiva leswaku mina HOSI N'wini wa hinkwaswo, ndzi vekile milawu ya matirhisele ya alitari, yi nga leyi: Siku alitari yi helaka ku akiwa, ku ta hisiwa magandzelo ehenhla ka yona, yi tlhela yi xuviwa. ₁₉Mina HOSI N'wini wa hinkwaswo ndzi ri, lava va nga ta ndzi humesela magandzelo alitarini, hi vona vaprista ntsena, vona va ka Sadoki, va nyimba ya ka Levhi. U ta va lavela nkuzi ya gandzelo ro susa swidyoho, ₂₀kutani loko va yi dlayile, u ta teka ngatinyana ya yona, u xuva ha yona timhondzo leta mune ta alitari, ni tikhona ta mune ta yinhla ya le henhla, ni nkomo wa kona ematlhelo hinkwawo ya alitari; hi mukhuva lowu u ta basisa alitari, leswaku yi lulamiseriwa ntirho wa yona. ₂₁Kutani nkuzi leyi dlayiweke egandzelweni ro susa swidyoho, yi ta tekiwa yi yisiwa endhawini yin'wana leyi hlawuriweke kusuhi ni Tempele, yi hiseriwa kona, ehandle ka xivava xa magandzelo. ₂₂Hi siku leri tlhandlamaka, u ta humesa gandzelo ro susa swidyoho hi ku dlaya xiphongho lexi nga solekiki, u engeta u basisa alitari hi ngati ya xona, kukota leswi u swi endleke hi ngati ya nkuzi. ₂₃Kutani loko u hetile magandzelo lawa, u ta hlawula nkuzi leyi nga solekiki ni khuna leri nga solekiki, ₂₄u ta na swona emahlweni ka mina HOSI; vaprista va ta swi n'wan'wasela hi munyu, kutani va ta swi tlhava, va ndzi humesela ha swona gandzelo leri hisiwaka. ₂₅U ta heta masiku ya 7 u ri karhi u humesa magandzelo siku rin'wana ni rin'wana hi swifuwo leswi: Mbuti, ni nkuzi, ni nyimpfu ya khuna, swi ri leswi nga solekiki loko u swi hlawula. ₂₆Masiku lawa ya 7, alitari yi ta va eku basisiweni, leswaku yi lulamiseriwa ntirho wa yona, yi khanguriwa. ₂₇Loko vhiki ra kona ri ta va ri herile, hi kona vaprista va nga ta pfumeleriwa ku yima alitarini, va humesa magandzelo ya n'wina yo susa swidyoho ni ya xinakulobye masiku hinkwawo. Kutani mina ndzi ta swi tsakela ndzi swi amukela. Ndzi vula sweswo mina HOSI N'wini wa hinkwaswo.”