Eksoda 36

₁“Kutani Besalele na Oholiyabu ni vavanuna hinkwavo lava nga ni vutivi bya ntirho, lava HOSI Xikwembu xi va nyikeke vutlhari ni ku twisisa, ni ku kota mintirho hinkwayo eku endleni ka xivandla lexo hlawuleka, va ta tirha hi ku landza hinkwaswo leswi HOSI Xikwembu xi leriseke swona.”

₂Kutani Muxe a vitana Besalele na Oholiyabu, ni vavanuna hinkwavo lava nga ni vutivi bya ntirho, lava HOSI Xikwembu xi va nyikeke miehleketo ya vutlhari, ni hinkwavo lava tinyiketeleke ku tirha, leswaku va ta, va ta nghena entirhweni. ₃Kwalaho Muxe a veka emavokweni ya vona mihlengo hinkwayo leyi Vaisraele va yi humeseke, leswaku yi ta pfuna entirhweni wa ku endla xivandla lexo hlawuleka, kambe Vaisraele a va ya emahlweni va tisa mihlengo ya vona eka Muxe, mpundzu wun'wana ni wun'wana. ₄Hiloko vatirhi hinkwavo lava tivaka ntirho lava a va ri entirhweni exivandleni lexo hlawuleka, va suka lomu a va tirha kona, va ta eka Muxe, ₅va fika va ku ka yena: “Vanhu va tisa swilo leswo tala ku tlula leswi swi lavekaka entirhweni lowu HOSI Xikwembu xi hi leriseke ku wu endla!” ₆Hiloko Muxe a rhumela xileriso emixaxeni hinkwayo, a ku: “Ku nga vi na loyi a ha tikarhatelaka ku humesa nhlengo wa xivandla lexo hlawuleka, hambi a ri wanuna kumbe wansati.” Kutani a yimisa vanhu ku tisa mihlengo. ₇Swilo leswi vatirhi a va ri na swona, a swi ringana ku heta ntirho hinkwawo, swi tlhela swi sala.

₈Kutani vavanuna hinkwavo lava a va ri ni vutivi bya ntirho exikarhi ka vatirhi, va endla Ntsonga lowo Hlawuleka hi swisirhelelo swa khume, va swi endla hi ntsembyani wo saseka lowu lukiweke, ni voya bya tinyimpfu bya muhlovo wa rihlaza ra tilo, ni wa xivunguvungu, ni lowo tshwuka, va swi sasekisa hi ku swi rhungelela swifaniso swa tikerubu; ₉xisirhelelo xin'wana ni xin'wana a xi ri ni mimpimo leyi: 14 m ku leha ni 2 m ku anama; swisirhelelo hinkwaswo a swi ri ni mimpimo yo ringana.

₁₀Va hlanganisa ntlhanu wa swisirhelelo, swi endla xin'we; ni leswin'wana swa ntlhanu, va swi hlanganisisa sweswo. ₁₁Nsomo wa xisirhelelo xa le handle, eka swisirhelelo swa ntlhanu leswo sungula, va wu rhungelela marimi hi tingoti ta rihlaza ra tilo; na wona nsomo wa xisirhelelo xa le handle, eka swisirhelelo swa ntlhanu leswa vumbirhi, va wu rhungelela marimi. ₁₂Va rhungelela marimi ya 50 eka nsomo wa xisirhelelo lexo hetelela; marimi lawa a ma langutanile. ₁₃Kutani va endla swikhweketo swa 50 swa nsuku, va khomanisa swisirhelelo hi swona; hi ndlela leyi, Ntsonga lowo Hlawuleka wu hlangana wu va xilo xin'we lexi heleleke.

₁₄Va endla swin'wana swisirhelelo hi voya bya timbuti, swi va swa ntsonga wa vumbirhi ehenhla ka Ntsonga lowo Hlawuleka; va endla swisirhelelo leswi swi ri 11. ₁₅Swisirhelelo leswi a swi ri ni mimpimo leyi: 15 m ku leha, ni 2 m ku anama; swisirhelelo leswi swa 11 a swi ri ni mimpimo yo ringana. ₁₆Kutani va hlanganisa ntlhanu wa swisirhelelo swi endla xin'we, ni leswin'wana swa 6 va swi hlanganisisa sweswo. ₁₇Nsomo wa xisirhelelo xo sungula eka leswa ntlhanu, va wu rhungelela marimi ya 50, na wona nsomo wa xisirhelelo lexo hetelela eka leswa 6, va wu rhungelela marimi ya 50. ₁₈Kutani va endla swikhweketo swa 50 swa koporo, swo hlanganisa ha swona Ntsonga leswaku wu va xilo xin'we lexi heleleke. ₁₉Naswona, va endla xo funengeta Ntsonga hi madzovo lama tlhuvutsiweke ya tinyimpfu ni ya timbuti.

₂₀Kutani va vatla mapulangi hi murhi wa munga, ya ku yimisa Ntsonga ha wona. ₂₁Pulangi rin'wana ni rin'wana a ri ri ni mimpimo leyi: 5 m ku leha, ni 75 cm ku anama. ₂₂Epulangini rin'wana ni rin'wana a ku ri ni timhingu timbirhi to hlanganisa mapulangi lawa; va endlisa sweswo ni le mapulangini hinkwawo ya Ntsonga. ₂₃Mapulangi ya Ntsonga, va ma veka hi ndlela leyi: Mapulangi ya 20 a ma ri etlhelo ra le dzongeni. ₂₄Ehansi ka mapulangi lawa ya 20 va veka minkotloto ya 40 ya silivhere, mimbirhi ehansi ka pulangi rin'we, laha ku nga ta nghena timhingu ta rona timbirhi, ni minkotloto mimbirhi ehansi ka rin'wana pulangi, laha ku nga ta nghena timhingu ta rona timbirhi. ₂₅Etlhelweni lera vumbirhi ra Ntsonga, en'walungwini, a ku ri ni mapulangi ya 20, ₂₆ni minkotloto ya wona ya 40 ya silivhere, mimbirhi ehansi ka pulangi rin'we, ni mimbirhi ehansi ka rin'wana pulangi. ₂₇Va veka mapulangi ya 6 endzhaku ka Ntsonga hi tlhelo ra vupeladyambu. ₂₈Etinhleni ta Ntsonga leta le ndzhaku, va yimisa mapulangi mambirhi. ₂₉Mapulangi lawa a ma hambanile ehansi, kambe ehenhla a ma hlanganisiwile exingwavileni lexo sungula. Mapulangi ya tinhla letimbirhi va ma yimisa hi ndlela leyi, mambirhi eyinhleni yin'we. ₃₀Mapulangi hinkwawo ya le tinhleni a ma ri 8, ma ri ni minkovotlo ya wona ya 16 ya silivhere, mimbirhi ehansi ka pulangi rin'wana ni rin'wana.

₃₁Kutani va vatla timhandze to hingakanya ha tona ta murhi wa munga, va ti veka hi ndlela leyi: Ntlhanu wa timhandze a ti hingakanya emapulangwini ya tlhelo rin'we ra Ntsonga, ₃₂ntlhanu wa tona ti hingakanya emapulangwini ya tlhelo lerin'wana ra Ntsonga, ni tin'wana ta ntlhanu ti hingakanya emapulangwini lama nga endzhaku ka Ntsonga, hi tlhelo ra vupeladyambu. ₃₃Mhandze ya le xikarhi yo hingakanya mapulangi, va yi veka yi suka emakumu ka Ntsonga, yi ya fika emakumu ka wona. ₃₄Kutani va nameka nsuku emapulangwini ya Ntsonga, va vekela ni swingwavila swa nsuku, laha timhandze leto hingakanya ha tona ti nga ta tlhomiwa kona; na tona timhandze leti, va ti nameka nsuku.

₃₅Kutani va endla xisirhelelo hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke, va xi sasekisa hi ku xi rhungelela swifaniso swa tikerubu. ₃₆Xisirhelelo lexi, va xi vatlela mune wa tiphuphu hi murhi wa munga, va ti nameka nsuku; va vekela swikhweketo swa nsuku eka tona, va ti vumbela ni minkotloto ya mune ya silivhere. ₃₇Naswona va endla xisirhelelo xo pfala nyangwa ya Ntsonga hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani lowo saseka lowu lukiweke, lowu rhungeleriweke mavalavala; ₃₈va xi vatlela ni ntlhanu wa tiphuphu, ni swikhweketo swa tona; va nameka nsuku etinhlokweni ta tona ni le swimhandzaneni swa tona swa ku hayeka xisirhelelo; kambe minkovotlo ya tona leya ntlhanu yona a yi ri ya koporo.