Eksoda 33

₁Kutani HOSI Xikwembu xi ku ka Muxe: “Sweswi, suka laha ndhawini leyi, wena ni vanhu lava u va humeseke etikweni ra Egipta, mi ya etikweni leri ndzi ri tshembiseke Abrahama, na Isaka, na Yakobo hi ku hlambanya, ndzi ku ka vona: ‘Tiko leri ndzi ta ri nyika vatukulu va n'wana.’ ₂Ndzi ta rhumela ntsumi leyi yi nga ta mi rhangela emahlweni; ndzi ta hlongola Vakanana, ni Vaamori, ni Vahiti, ni Vaperesi, ni Vahivhi, ni Vayebusi. ₃Tiko leri mi yaka eka rona ri khuluka ntswamba ni vulombe; kambe mina a ndzi nga fambi exikarhi ka n'wina, hikuva leswi mi nga vanhu lava tinonon'hwisaka, ndzi nga tshuka ndzi mi herisela makumu endleleni.”

₄Loko vanhu va twa timhaka leti to tika leti, va tlhaveka timbilu, ku pfumaleka ni un'we loyi a ambaleke swo tibombisa ha swona. ₅HOSI Xikwembu a xi byerile Muxe xi ku: “Tivisa Vaisraele leswaku ndzi ri: ‘Mi vanhu lava omeke tinhloko; loko ndzo tshuka ndzi fambile na n'wina nkarhinyana, ndzi nga mi herisela makumu. Hikokwalaho, hluvulani leswi mi tibombisaka ha swona, mina ndzi ta vona leswi ndzi nga ta endla swona hi n'wina.’ ” ₆Kutani Vaisraele va hluvula swo tibombisa ha swona; a va ha swi ambalanga, ku sukela entshaveni ya Horebe, ni ku ya emahlweni.

₇Enkarhini lowu, Muxe a a toloverile ku teka ntsonga, a ya wu vamba ehandle kule ni mixaxa, a wu thya vito a ku i “Ntsonga-wo-hlangana-na-HOSI”. Kutani un'wana ni un'wana loyi a a lava ku vutisa timhaka eka HOSI Xikwembu, a a huma a ya eka ntsonga lowu, ehandle ka mixaxa. ₈Minkarhi hinkwayo, loko Muxe a huma emixaxeni a ya entsongeni lowu, vanhu hinkwavo a va suka va yima, un'wana ni un'wana enyangweni ya nxaxa wa yena, va languta Muxe a kondza a nghena entsongeni. ₉Loko Muxe a nghenile entsongeni, papa ri nembelela, ri fika ri yima enyangweni ya ntsonga, kutani HOSI Xikwembu xi vulavula na yena. ₁₀Kutani loko vanhu va vona papa rero enyangweni ya ntsonga, a va nkhinsama hinkwavo va khongela, un'wana ni un'wana a ri enyangweni ya nxaxa wa yena. ₁₁Hi ndlela leyi, HOSI Xikwembu a xi hamba xi vulavula na Muxe xi n'wi langutile, ku fana ni munhu loko a vulavula ni nakulobye. Minkarhi hinkwayo loko Muxe a tlhelela emixaxeni, jaha leri a ri n'wi pfuna, a nga yena Yoxuwa n'wana Nuni, a ri sala kwale ntsongeni.

₁₂Kutani Muxe a ku ka HOSI Xikwembu: “Vona, u te ka mina: ‘Fambisa vanhu lava!’ Kambe a wu ndzi kombanga loyi ndzi nga ta famba na yena; kasi u vurile hi wexe leswaku wa ndzi tiva swinene, ni leswaku wa ndzi tsakela. ₁₃Hikokwalaho, loko hakunene u ndzi tsakela, ndzi kombela leswaku u ndzi komba makungu ya wena, ndzi ta kota ku ku tiva, ndzi kota ni ku ku tsakisa; naswona tsundzuka leswaku vanhu lava, hi rona tiko ra wena.” ₁₄Hiloko HOSI Xikwembu xi ku: “Mina hi ndzexe ndzi ta famba na n'wina, ndzi mi yisa lomu mi nga ta tshamiseka kona.” ₁₅Kutani Muxe a ku ka HOSI Xikwembu: “Loko wena hi wexe u ta ka u nga fambi na hina, hi tshike kwala, u nga hi susi exivandleni lexi. ₁₆Loko u nga fambi na hina, xana swi ta vonaka hi mukhuva wihi leswaku mina ni vanhu va wena wa hi tsakela xana? Mhaka leyi endlaka leswaku hi va vanhu lava hlawuriweke exikarhi ka hinkwavo lava hanyaka emisaveni, xana a hi leswi wena u fambaka na hina xana?” ₁₇Kutani HOSI Xikwembu xi ku ka Muxe: “Mhaka leyi u yi kombelaka, ndzi ta yi endla, hikuva ndza ku tsakela, naswona ndza ku tiva swinene.”

₁₈Kutani Muxe a ku: “Ndzi kombela leswaku u ndzi komba ku vonakala ka wena.” ₁₉HOSI Xikwembu xi hlamula xi ku: “Ndzi ta hundza hi le mahlweni ka wena ndzi ri karhi ndzi ku komba vunene bya mina hinkwabyo, ndzi twarisa vito ra mina ra ‘HOSI’ emahlweni ka wena. Ndzi ta komba tintswalo eka lava ndzi nga ta va komba tona, ndzi twela vusiwana lava ndzi nga ta va twela byona.” ₂₀Xi engeta xi ku: “Loko wu ri mombo wa mina wona, u nga ka u nga wu voni, hikuva a ku na munhu loyi a nga hanyaka, loko a ndzi vona.” ₂₁Kutani HOSI Xikwembu xi ku: “Vona, ndhawu hi leyi kusuhi na mina, laha u nga ta yima kona, ehenhla ka ribye; ₂₂loko ndzi hundza hi ku vonakala ka mina, ndzi ta ku nghenisa ebakweni ra ribye, ndzi ku khubumeta hi xandla xa mina; kutani loko ndzi ta va ndzi hundzile, ₂₃ndzi ta susa voko ra mina, kutani u ta vona xikosi xa mina, kambe mombo wa mina wona u nga ka u nga wu voni.”