Eksoda 24

₁Kutani HOSI Xikwembu xi ku ka Muxe: “Tlhandluka u ta haleno ka mina, wena na Aroni, na Nadabu, na Abihu, ni vakulukumba va Israele vo ringana 70. Loko ma ha ri kule, nkhinsamani mi khongela. ₂Wena Muxe, hi wena ntsena u nga ta tshinela kusuhi na mina HOSI; lava u nga na vona va nga tshuki va ta kusuhi; vanhu lavan'wana vona ni ku ringeta ku khandziya va nga ringeti!”

₃Kutani Muxe a ya tivisa vanhu marito hinkwawo ya HOSI Xikwembu ni swileriso swa xona hinkwaswo; vanhu hinkwavo va hlamula hi nomo wun'we, va ku: “Hinkwaswo leswi HOSI Xikwembu xi leriseke swona, hi ta swi endla.” ₄Kutani Muxe a tsala hinkwaswo leswi vuriweke hi HOSI Xikwembu. Siku leri tlhandlamaka a pfuka nimixo swinene, a aka alitari ehansi ka ntshava, a yimisa ni maribye lamakulu ya 12 ku ringanisa tinyimba ta Israele ta 12. ₅Kutani Muxe a rhuma majaha ya Israele ku tlhava tihomu, va humesela HOSI Xikwembu magandzelo lama hisiwaka ni ya xinakulobye. ₆Muxe a chela ngati yin'wana eminkambaneni, leyin'wana a xuva alitari ha yona. ₇Kutani a teka buku ya Ntwanano, a yi hlayela Vaisraele, kutani va ku: “Hinkwaswo leswi HOSI Xikwembu xi nga swi vula, hi ta swi endla; naswona hi ta yingisa.” ₈Kutani Muxe a teka ngati, a xuva vanhu ha yona, a ku: “Leyi i ngati ya ntwanano lowu HOSI Xikwembu xi nga wu endla na n'wina, hi ku landza marito lawa hinkwawo.”

₉Muxe a khandziya ntshava a ri na Aroni, na Nadabu, na Abihu, ni vakulukumba va Israele va 70. ₁₀Kutani va vona Xikwembu xa Israele; laha hansi ka milenge ya xona a wonge hiloko ku ri ni maribye ya nkoka swinene ya “safiri”, yo phatima ku fana ni rihlaza ra tilo. ₁₁HOSI Xikwembu a xi endlanga nchumu eka varhangeri lava va Israele, kambe va xi vonile, kutani va tshama ehansi va dya, ni ku tima torha.

₁₂Kutani HOSI Xikwembu xi ku ka Muxe: “Tlhandlukela haleno ka mina entshaveni, u fika u ndzi yimela; kutani ndzi ta ku nyika maribye ya swiphepherhele, lawa ndzi tsaleke nawu ni swileriso eka wona, eku letela Vaisraele ha swona.” ₁₃Kutani Muxe na Yoxuwa museketeri wa yena va suka va famba; Muxe a sungula ku tlhandlukela entshaveni ya Xikwembu, ₁₄kutani a byela vakulukumba a ku: “Hi yimeleni kwala hi kondza hi vuya. Aroni na Huri va ta sala na n'wina, kutani un'wana ni un'wana loyi a nga ta va ni mhaka leyi a lavaka ku pfuniwa eka yona, a a ye eka vona.”

₁₅Kutani Muxe a tlhandlukela entshaveni ya Sinayi, hiloko papa ri khubumeta ntshava. ₁₆Ku vonakala ka HOSI Xikwembu ku tshama ehenhla ka ntshava. Yi khubumetiwa hi papa masiku ya 6, kutani hi siku ra vu-7, HOSI Xikwembu xi vitana Muxe xi ri endzeni ka papa. ₁₇Vaisraele a va vona ku vonakala ka HOSI Xikwembu, ehenhla ka ntshava, ku fana ni ndzilo lowu pfurhaka. ₁₈Kutani Muxe a nghena epapeni, a tlhandlukela entshaveni. Muxe ú tshamile entshaveni masiku ya 40 ni vusiku bya kona.