Eksoda 1

₁Vana va Yakobo lava yeke etikweni ra Egipta na tata wa vona, va ri ni mindyangu ya vona, hi lava: ₂Rhuveni, na Simiyoni, na Levhi, na Yuda, ₃na Isakara, na Zebuloni, na Benjamini, ₄na Dani, na Neftali, na Gadi, na Asere. ₅Vana va Yakobo ni vatukulu va yena hinkwavo a va ri 70, ku katsa na Yosefa loyi a ku ri khale a ri etikweni ra Egipta. ₆Swi fike laha Yosefa, ni vamakwavo hinkwavo, ni hinkwavo lava kuleke eminkarhini yoleyo, va hundzeke emisaveni. ₇Kambe vanhu va rixaka ra Israele va tswalelene va andza, ntsengo wa vona wu ya wu kula, matimba ya vona ma engeteleka ngopfu swinene, kutani va tata tiko hinkwaro.

₈Loko ku hundzile nkarhi, ku vekiwa hosi leyintshwa etikweni ra Egipta; hosi leyi a yi tivanga nchumu hi Yosefa, ₉kutani yi ku ka vanhu va yona: “Ma swi vona leswaku Vaisraele va sungula ku hi tlula hi ku tala ka vona ni matimba ya vona! ₁₀A hi va endleni hi mano leswaku va nga andzi ngopfu, hikuva loko va tala kutani nyimpi yi tshuka yi humelela, va ta yima ni valala va hina, va lwa na hina, kutani va ta suka etikweni va hi balekela.” ₁₁Hiloko Vaegipta va veka valanguteri, leswaku va xanisa Vaisraele hi ku va rhwexa mintirho yo tika. Kutani Vaisraele va akela Faro miti ya Pitomu na Ramsese yo hlayisela tinhundzu ta yena eka yona. ₁₂Kambe, hambileswi a va xaniseka, Vaisraele va ya va andza, va tata tiko, kutani Vaegipta va sungula ku va chava.

₁₃Hikokwalaho, Vaegipta va tirhisa Vaisraele hi tihanyi letikulu; ₁₄va va xanisa hi ku va nyika mintirho leyo tika ya ku pfuva ndzhope ni ku endla switina, va va nyika ni mintirho ya tinxaka-xaka ya le masin'wini. Emintirhweni leyi hinkwayo, a va va tirhisa hi tihanyi letikulu.

₁₅Kutani hosi ya Egipta yi lerisa tisungukati timbirhi ta Vaheveru, Xifira na Puwa, yi ku ka tona: ₁₆“Loko mi ri karhi mi pfuna vavasati va Vaheveru eku tintshunxeni ka vona, langutani swinene n'wana leswaku i wa yini: Loko a ri wa mufana, n'wi dlayeni! Kambe loko a ri wa nhwanyana, n'wi tshikeni a hanya.”

₁₇Kambe vavasati lava va tisungukati a va chava Xikwembu, kutani a va endlanga leswi hosi ya Egipta yi va leriseke swona: Va tshika vana va vafana va hanya. ₁₈Kavaloko hosi yi va vitana, yi ku ka vona: “Mi endlele yini ku tshika vana va vafana va hanya, xana?” ₁₉Vona va hlamula Faro, va ku: “Vavasati va Vaheveru va tiyile, a va fani ni vavasati va Vaegipta! Loko lava va tisungukati va nga si fika eka vona, va va kuma va tintshunxile!” ₂₀Hikokwalaho Xikwembu xi katekisa tisungukati; Vaisraele vona va ya va andza, matimba ya vona ma engeteleka ngopfu. ₂₁Naswona Xikwembu xi andzisa mindyangu ya lava va tisungukati, hikuva a va xi kombile xichavo. ₂₂Kutani Faro a lerisa tiko ra yena hinkwaro, a ku: “N'wana un'wana ni un'wana wa mufana loyi a nga ta velekiwa eka Vaheveru, n'wi cukumeteni enambyeni, kambe mi tshika vanhwanyana hinkwavo va hanya!”