Vaefesa 6

₁Vana, yingisani vatswari va n'wina, hikuva hi swona leswi lulameke emahlweni ka Hosi. ₂Matsalwa ma ri: “U va ni xichavo eka tata wa wena ni ka mana wa wena” (hi wona nawu lowo rhanga lowu nga ni xitshembiso), ₃“leswaku u kateka, ni leswaku u hanya masiku layo tala emisaveni leyi.” ₄Na n'wina vatatana, mi nga dyisi vana va n'wina embitsi, kambe mi va kurisa, hi ku va laya ni ku va dyondzisa ta Hosi.

₅N'wina mahlonga, yingisani vini va n'wina va laha misaveni, hi xichavo ni ku titsongahata, mi swi endla hi timbilu to basa, ku fana ni loko mi tirhela Kriste hi xiviri; ₆naswona, ku nga ri ntsena loko va mi langutile, wonge hi loko mi lava ku tsakisa vanhu, kambe, leswi mi nga mahlonga ya Kriste, endlani ku rhandza ka Xikwembu hi mbilu hinkwayo. ₇Tirhani ntirho wa n'wina hi ku tsaka, ku fana ni loko mi tirhela Hosi, ku nga ri vanhu; ₈tsundzukani leswaku Hosi yi ta nyika un'wana ni un'wana, hambi hlonga, hambi la nga riki hlonga, hi ku ya hi leswinene leswi a swi endleke. ₉Na n'wina vini, endlisani sweswo eka mahlonga ya n'wina: Tshikani ku va holovela-holovela, mi ri karhi mi tiva leswaku n'wina ni mahlonga ya n'wina mi ni n'wini un'we ematilweni, ni leswaku a nga yi hi nghohe.

₁₀Eku heteleleni, ndzi ri, tiyani swinene, mi namarhela Hosi, mi tiseketela hi ntamu wa yona lowu nga tsandziwiki ha nchumu. ₁₁Havaxelani swisirhelelo ni matlhari hinkwawo lawa Xikwembu xi mi nyikaka wona, leswaku mi ta kota ku yima mi lwa ni mano layo biha ya Diyavulosi. ₁₂Hikuva a hi lwi ni vanhu va misava leyi, kambe hi lwa ni mimoya leyo biha leyi nge henhla emimpfhukeni: Hi lwa ni tindhuna, ni vafumi, ni tihosi leti fumaka ta nguva leyi ya munyama. ₁₃Hikokwalaho hlomani swisirhelelo ni matlhari hinkwawo ya Xikwembu wa ha ri nkarhi, leswaku mi ta kota ku tilwela hi siku ra khombo; kutani loko mi ta va mi lwile ku ya fika makumu, mi ta tikuma ma ha tiyile.

₁₄Loko swi ri tano, tshamani mi tilulamisile. Tikhameni hi ntiyiso wu va vamba ra n'wina. Ambalani ku lulama xi va xisirhelelo xa n'wina xa le xifuveni, ₁₅ni ku hisekela ku twarisa Evhangeli ya ku rhula ti va tintanghu ta n'wina. ₁₆Minkarhi hinkwayo, rhwalani ku pfumela, xi va xitlhangu xa n'wina, kutani mi ta kota ku timela ha xona miseve hinkwayo leyi pfurhaka ya nyavuntswaka. ₁₇Amukelani ku ponisiwa, xi va xihuku xa n'wina xa le nhlokweni, kutani Rito ra Xikwembu ri va fumu ra n'wina leri Moya wu mi nyikaka rona. ₁₈Endlani hinkwaswo leswi hi ku khongela, mi kombela ku pfuniwa hi Xikwembu; khongelani minkarhi hinkwayo hilaha Moya wu mi letelaka hakona. Hikokwalaho, tshamani mi hitekile, mi nga karhali ku khongelela vahlawuriwa va Xikwembu hinkwavo. ₁₉Na mina mi ndzi khongelela, leswaku Xikwembu xi ndzi pfula xifuva loko ndzi lava ku dyondzisa, ndzi ta kota ku vulavula ndzi nga chavi nchumu, ni ku tivisa vanhu xihundla xa Evhangeli. ₂₀Ndzi muyimeri wa Evhangeli leyi, hambiloko ndzi pfaleriwile ekhotsweni, hikokwalaho khongelani leswaku ndzi tiya nhlana, ndzi yi vula hilaha ndzi fanelaka ku yi vula hakona.

₂₁Tixiko, makwerhu la rhandzekaka ni mupfuni la tshembekaka entirhweni wa Hosi, ú ta mi tivisa mahungu hinkwawo ya mina, leswaku na n'wina mi ta tiva hinkwaswo swa ku hanya ka mina ni leswi ndzi swi endlaka. ₂₂Hi swona leswi endlaka leswaku ndzi n'wi rhumela ka n'wina, mi ta tiva hilaha hi pfukeke hakona, naswona a ta kota ku mi tiyisa timbilu.

₂₃Ku rhula ni rirhandzu leri nga ni ku pfumela, a swi ve ni vamakwerhu, swi huma eka Xikwembu Tatana, ni ka Hosi Yesu Kriste. ₂₄Tintswalo a ti ve ni hinkwavo lava rhandzaka Hosi ya hina Yesu Kriste hi rirhandzu leri nga onhakiki!