Daniele 9

₁“Hi lembe ro sungula ra ku fuma ka Dariyosi n'wana Ahasuwerusi wa rixaka ra Vameda (loyi a a vekiwile ku va hosi ya Vakalediya), ₂mina Daniele a ndzi ri eku hlayeni ka Matsalwa, ndzi anakanya ta malembe ya 70 lawa muti wa Yerusalema wu fanelaka ku tshama wu ri rhumbi, hilaha HOSI Xikwembu xi byeleke muprofeta Yeremiya hakona.

₃“Kutani ndzi hundzuluka ndzi languta eka Xikwembu N'wini wanga, ndzi huwelela eka xona ndzi rila ndzi ri karhi ndzi titsona swakudya, ndzi ambele leswo khwaxa, ndzi tichele ni nkuma enhlokweni. ₄Eku khongeleni ka mina, ndzi vula swidyoho swa hina hinkwerhu eka Xikwembu xanga, ndzi ku: We N'wini wa hina, wena Xikwembu lexikulu xo chavisa, hi rirhandzu ra wena lero tshembeka, u hlayisa ntwanano wa wena ni lava va ku rhandzaka, lava nga rivaliki milawu ya wena. ₅Kambe hina hi ku dyoherile, hi endlile leswo biha, hi tivangele nandzu hi ku ku fularhela hi tlula milawu ya wena. ₆Vaprofeta va nga malandza ya wena, va vulavurile hi vito ra wena, va khongotela tihosi ta ka hina, ni tindhuna ta kona, ni vatata wa hina, ni vanhu hinkwavo, kambe a hi va yingisanga. ₇We N'wini wa hina, u Xikwembu xo lulama, kambe hina hi tivangele tingana letikulu namuntlha, ndzi vula hina hinkwerhu: Vanhu va le Yuda, ni lava akeke eYerusalema, ni Vaisraele hinkwavo, lava nga kusuhi ni lava nga kule, ematikweni hinkwawo lawa u va hangalaseleke eka wona, hikuva va lwile na wena, va nga ha tshembeki. ₈We HOSI Xikwembu xa hina, hina ni tihosi ta ka hina ni tindhuna ta tona ni vatata wa hina, hi ni tingana letikulu, hikuva hi ku dyoherile. ₉Wena Xikwembu N'wini wa hina, u ni tintswalo, u rivalela vanhu swidyoho; kambe hina hi ku fularhele, ₁₀hi ala ku yingisa rito ra wena, we HOSI Xikwembu xa hina, hi tshika ni milawu ya wena leyi u hi nyikeke yona hi milomo ya vaprofeta malandza ya wena. ₁₁Hina hinkwerhu Vaisraele, hi tlurile nawu wa wena hi wu tshika, hi ala ku yingisa rito ra wena. Hikokwalaho leswi hi ku dyoheleke we Xikwembu, hi weriwile hi ndzhukano lowu Muxe nandza wa wena a wu tsaleke eNawini, lowu a wu tiyiseke hi ku hlambanya. ₁₂We HOSI, u hetisisile marito ya wena lawa u nga ma vula ehenhla ka hina ni le henhla ka lava va hi fambisaka, kutani u hi tisele ku xaniseka lokukulu ngopfu. Mhaka yo fana ni leyi yi humeleleke emutini wa Yerusalema, a yi si tshama yi va kona laha misaveni. ₁₃Mahlomulo lawa hinkwawo, ma hi humelerile hilaha swi tsariweke hakona eka Nawu wa Muxe, kambe hambiswiritano we HOSI Xikwembu xa hina, a hi hundzukanga, a hi tshikanga swidyoho swa hina, naswona a hi kombelanga leswaku u hi twela vusiwana; marito ya wena ya ntiyiso, a hi ma yingisanga. ₁₄Hikokwalaho, we HOSI, u tilulamisele ku hi vangela maxangu lawa, kutani ma hi fikele. Wena HOSI Xikwembu xa hina, minkarhi hinkwayo u endla leswi lulameke ntsena kambe hina a hi yingisi rito ra wena.

₁₅“We N'wini wa hina ni Xikwembu xa hina, hi wena u hi humeseke etikweni ra Egipta, hi matimba ya wena lamakulu, u titwarisa ha swona ku ta fika ni namuntlha. Kambe hina hi ku dyoherile, hi endla leswo biha. ₁₆Wena N'wini wa hina, u hi lwerile minkarhi leyo tala. Namuntlha, hi kombela leswaku u rheleta vukari bya wena, u tshika ku hlundzukela muti wa Yerusalema entshaveni ya wena leyo hlawuleka, hikuva matiko hinkwawo lawa ya hi rhendzeleke, ma hlekule muti lowu ma monya na hina vanhu va wena, hi mhaka ya leswi hi ku dyoheleke, hina ni vatata wa hina. ₁₇Sweswi ke, wena Xikwembu xa hina, amukela ku khongela ka mina nandza wa wena, u yingisa ku rila ka mina, u tlhela u languta hi tintswalo xivandla xa wena lexo hlawuleka, hikuva xi onhakile ngopfu. ₁₈We Xikwembu xanga, rhiya ndleve u yingisa. Pfula mahlo u languta maxangu ya hina ni ku onhaka ka muti lowu wu thyiweke vito ra wena. Loko hi tisa swirilo swa hina eka wena, a hi leswaku hi tshemba ku lulama ka hina, e-e, kambe hi tshemba ntsena tintswalo ta wena letikulu. ₁₉We HOSI, hi yingise! HOSI, hi rivalele! HOSI, twana xirilo xa hina, u hatla u hi lwela, hikwalaho ka leswi u nga swona, we Xikwembu xanga, ni hikwalaho ka muti lowu wa wena ni vaaki va wona lava thyiweke vito ra wena.

₂₀“Ndzi yile emahlweni ndzi khongerisa sweswo, ndzi tivula swidyoho swa mina ni swa tiko ra hina ra Israele, ndzi tisa ni xirilo xa mina eka HOSI Xikwembu xa mina, hi tlhelo ra ntshava ya xona leyo hlawuleka; ₂₁kutani loko ndzi ri karhi ndzi khongerisa sweswo, ku humelela wanuna loyi va nge i Gabriele, loyi ndzi n'wi voneke eka xivono xa mina xo rhanga, a ta hi ku haha a fika kusuhi na mina. A wu ri nkarhi wa magandzelo ya madyambu, ₂₂kutani a a tela ku ta ndzi hlamusela timhaka. A ku ka mina: ‘We Daniele, ndzi tile haleno namuntlha leswaku ndzi ta ku pfula miehleketo. ₂₃Enkarhini lowu u yiseke xirilo xa wena eka Xikwembu, Xikwembu xi humesile rito, kutani ndzi tele ku ta ku tivisa rona. Tiva leswaku Xikwembu xa ku tsakela swinene; hikokwalaho ringeta ku twisisa rito ra xona, u kuma nhlamuselo ya xivono.

₂₄“ ‘Xikwembu xi bohile leswaku a ku nga hundzi malembe ya 70 ntsena, kambe ku ta hundza nkarhi wa malembe ya 7 lama hlayiwaka ka 70, leswaku timhaka ta vanhu va ka n'wina ni ta muti wa ka n'wina lowo hlawuleka ti kondza ti hetiseka: Enkarhini wolowo, ku homboloka ni ku dyoha swi ta hela; milandzu yi ta rihiwa, ku ta va ni ku lulama loku nga heriki; swivono ni marito ya vaprofeta swi ta hetiseka, kutani xivandla lexo hlawuleka ngopfu xi ta nyiketiwa hi vuntshwa eka Xikwembu. ₂₅Tiva mhaka leyi u yi twisisa: Ku ta rhanga ku hundza nkarhi wa malembe ya 7 lama hlayiwaka ka 7, ku sukela loko ku humile xileriso xa ku aka muti wa Yerusalema hi vuntshwa, ku fikela loko mufambisi lontshwa a ta vekiwa hi ku cheriwa mafurha enhlokweni. Endzhaku ka sweswo, magondzo ya muti ni rirhangu ra wona swi ta va eku pfuxiweni nkarhi wa malembe ya 7 lama hlayiwaka ka 62. Minkarhi ya kona yi ta va leyo tika swinene. ₂₆Eku heleni ka nkarhi lowu wa malembe ya 7 lama hlayiwaka ka 62, muhlawuriwa wa Xikwembu ú ta dlayiwa, ku ri hava la n'wi yimelelaka. Kutani ku ta humelela mufumi un'wana la nga ta herisa muti ni Tempele hi mavuthu ya yena. Ku hela ka swona ku ta fana ni ndhambi: Ku ta va ni tinyimpi ni maxangu ku fikela makumu, hilaha swi bohiweke hakona. ₂₇Hi nkarhi wa malembe ya 7, mufumi loyi ú ta sindzisa lavo tala leswaku va tirhisana na yena; kutani loko ku hundzile malembe manharhu na hafu, ú ta sivela vanhu ku tlhava swifuwo swa magandzelo kumbe ku humesa nhlengo. Ú ta hatla a tirha swa yena swa manyala, a onhetela hinkwaswo; kambe ku herisiwa ka muonhi loyi, Xikwembu xi ku bohile khale, kutani ku ta n'wi wela hi xitshuketa.’ ”