Ta Pawulo loko a ri le Efesa
1Loko Apolosi a ri eKorinto, Pawulo a huma hi le ndzeni ka tiko ra Asiya, a rhelela a ya elwandle le Efesa, laha a nga kuma vadyondzisiwa va nga ri vangani kona; 2kutani a va vutisa a ku: “Xana mi amukerile Moya lowo Kwetsima siku mi pfumeleke xana?” Va ku ka yena: “E-e, a hi si twa leswaku ku ni Moya lowo Kwetsima.” 3“Xana mi khuvuriwile hi nkhuvulo wihi ke?” ku vutisa Pawulo. Va ku “Hi nkhuvulo wa Yohane.” 4Kutani Pawulo a ku: “Hi nkhuvulo wa yena, Yohane ú khuvurile lava a va hundzukile; a a byela vanhu ku pfumela eka loyi a a ta ta endzhaku ka yena, hileswaku yena Yesu.” 5Loko va twa sweswo, va khuvuriwa hi vito ra Hosi Yesu.
6Pawulo a va tlhandleka mavoko, kutani Moya lowo Kwetsima wu ta ehenhla ka vona; va vulavula hi tindzimi tin'wana, va ri karhi va twarisa Rito. 7Vavanuna volavo a va lava ku va 12.
8Pawulo a nghena esinagogeni, a vulavula a nga chavi nchumu; kutani, hi tin'hweti tinharhu, a hlamulana ni vanhu va kona, a va khorwisa etimhakeni ta Mfumo wa Xikwembu. 9Kambe van'wana va sungula ku tinonon'hwisa ni ku tiarisa, va sola Ndlela ya Hosi emahlweni ka nhlengeletano hinkwayo; hiloko Pawulo a hambana na vona, a titekela vadyondzisiwa hi tlhelo; kutani siku rin'wana ni rin'wana a hlamulana na vanhu exikolweni xa Tirano. 10Swi fambile hi ndlela yoleyo hi malembe mambirhi, ku kondza loko hinkwavo lava akeke etikweni ra Asiya, Vayuda ni vamatiko, va twa rito ra Hosi.
Ta vana va majaha va ka Skeva
11Xikwembu a xi endla mintirho ya matimba yo hlamarisa ngopfu hi ku tirhisa Pawulo; 12swi fika laha vanhu va nga tisela vavabyi maduku ni swiambalo leswi khumbeke miri wa yena, kutani vavabyi lava va hola, ni mimoya leyo biha yi huma eka vona.
13Kambe Vayuda van'wana lava a va famba-famba, va ri karhi va hlongola mademona, va ringeta ku tirhisa vito ra Hosi Yesu leswaku va ta hanyisa lava ngheniweke hi mimoya leyo biha, kutani va ku: “Ha mi lerisa ha Yesu, yena loyi Pawulo a n'wi vulaka.” 14Lava endlaka sweswo, a ma ri majaha ya 7 ya muprista lonkulu un'wana, Muyuda loyi a va ku i Skeva. 15Kambe moya lowa biha wu va hlamula, wu ku: “Yesu, ndza n'wi tiva, ndzi tiva na Pawulo, kambe n'wina mi vamani ke?” 16Kutani munhu loyi a a ri ni moya lowo biha, a va tlulela, a va hlula hinkwavo, a va pfinya, va ko va huma endlwini ya kona hi ku tsutsuma, va nga ambalanga nchumu, va vavisiwile. 17Mhaka leyi yi tiviwa hi Vayuda ni Vagriki hinkwavo lava akeke le Efesa; ku chava lokukulu ku va khoma hinkwavo, kutani vito ra Hosi Yesu ri kurisiwa swinene. 18Lavo tala lava nga hundzuka vapfumeri, va ta, va tivula ni ku paluxa leswi a va swi endla khale. 19Kutani lavo tala exikarhi ka lava a va tirhile swa masalamusi, va hlengeleta tibuku ta vona, va ti hisa emahlweni ka vanhu hinkwavo; kutani loko ku hlayiwa nxavo wa tona, ku kumeka leswaku wu endla timali ta silivhere to ringana 50 000. 20Hi mukhuva wolowo rito ra Hosi ri nava hi matimba, ri ya ri tiya.
Ta dzolonga ra le Efesa
21Endzhaku ka loko timhaka leti ti humelerile, Pawulo a boha makungu ya ku ya eYerusalema, a ta rhanga hi ku hundza eMakedoniya ni le Akaya; kutani a ku: “Loko ndzi ta va ndzi yile kona, ndzi fanele ku ya vona ni le Rhoma.” 22Kavaloko a rhuma Timotiya na Erasto, vavanuna vambirhi exikarhi ka vapfuni va yena, leswaku va ya le Makedoniya; kutani yena, a xwa masiku ma nga ri mangani etikweni ra Asiya.
23Kambe enkarhini wolowo ku humelela dzolonga lerikulukumba hikwalaho ka Ndlela ya Hosi: 24Mufuri un'wana wa swilo swa silivhere, loyi a va ku i Demetriyo, a a endla swifanisonyana swa silivhere swa tempele ya Artemi, a vuyisela vatirhi-kulobye bindzu leri tivikanaka swinene. 25Kutani a va hlengeleta swin'we ni lava tirhaka ntirho wo fana ni wa vona, a ku ka vona: “Vavanuna, ma swi tiva leswaku hi fumisiwa swinene hi bindzu leri; 26Kutani ma swi vona, ni ku swi twa, leswaku Pawulo loyi ú kucetele vanhu lavo tala, ku nga ri la Efesa ntsena, kambe ú lavile ku eneta ni tiko hinkwaro ra Asiya; wa va hambukisa hi ku vula leswaku swikwembu leswi endliweke hi vanhu a hi swikwembu. 27Kutani ku nga humelela khombo ra leswaku ntirho lowu wa hina lowu, wu sungula ku soriwa; ku nga ri sweswo ntsena, kambe na yona tempele ya Artemi, xikwembu lexikulu, yi nga hundzuka mafenya, kutani vukulukumba bya loyi a gandzeriwaka hi tiko ra Asiya hinkwaro ni matiko hinkwawo, byi hatla byi hundzuka swa hava.”
28Loko va twa sweswo, va tala vukari, va huwelela, va ku: “I nkulu, Artemi wa Vaefesa!” 29Kutani muti hinkwawo wu endla dzolonga. Va khoma Gayo na Aristarko, Vamakedoniya vambirhi lava a va famba-famba na Pawulo, kutani hinkwavo va tsutsumela na vona endhawini ya mintlangu. 30Pawulo a a lava ku nghena entshungwini, kambe vadyondzisiwa va n'wi sivela; 31naswona van'wana exikarhi ka tindhuna ta tiko ra Asiya, lava a va ri vanakulobye va Pawulo, va rhumela rito eka yena, va n'wi khongela leswaku a nga tshuki a ya tikomba endhawini ya mintlangu. 32Enkarhini wolowo, van'wana va huwelela swin'wana, van'wana swin'wanyana, hikuva nhlengeletano a yi pfilunganyiwe swinene, kutani lavo tala va vona a va nga tivi lexi va teleke xona.
33Kambe van'wana exikarhi ka ntshungu va hlamusela mhaka eka Aleksandro, munhu loyi a a susumeteriwile emahlweni hi Vayuda; kutani Aleksandro a kwehleta hi voko, a lava ku tihlamulela emahlweni ka tiko. 34Kambe loko va vonile leswaku i Muyuda, va heta kusuhi ni tiawara timbirhi, va ri karhi va huwelela hinkwavo hi rito rin'we, va ku: “I nkulu, Artemi wa Vaefesa!”
35Kavaloko matsalani wa muti a miyeta ntshungu, a ku: “Vaefesa va ka hina! Xana i mani la nga tiviki leswaku muti wa Vaefesa i muhlayisi wa tempele ya Artemi lonkulu ni wa xifaniso xa yena lexi weke hi le tilweni xana? 36Leswi timhaka leti ti nga kanetiwiki, mi fanele ku tikhoma, mi nga endli nchumu hi ku hatlisa; 37mi tisile vavanuna lava, kambe a va phanghanga nchumu etitempeleni, naswona a va sandzanga xikwembu xa hina. 38Loko Demetriyo ni vatirhi-kulobye va lava ku tengisana ni munhu un'wana, ku ni masiku lawa huvo yi tirhaka ha wona; naswona, vayimeri va vuhosi va kona; a va mangalelane kona! 39Kambe loko mi lava ku ya emahlweni hi mhaka leyi, yi ta avanyisiwa enhlengeletanweni leyi nga ta va yi vitaniwile hi nawu. 40Hikuva hi nga kumeka hi ri enandzwini wa ku pfuxa dzolonga, hikwalaho ka nhlengeletano leya namuntlha; kasi nkitsikitsi lowu wu pfukile ntsena, kutani a ku nga vi na lexi hi nga ta tilandzula ha xona, loko hi vutisiwa ehenhla ka wona.” Kuteloko a vurile sweswo, a hangalasa nhlengeletano.
